ស្អែក Mike Tyson ទៅចិនថតរឿង "Ip Man 3” របស់កុំកុំ

2015-03-25 19:04:16
ចំនួនមតិ 0 | ចំនួនចែករំលែក 0

ចន្លោះមិនឃើញ

អតីតជើងឯកកីឡាប្រដាល់ទម្ងន់ធ្ងន់ពិភពលោក Mike Tyson បានសហការជាមួយ Donnie Yen (កុំកុំ) សម្ដែងក្នុងរឿង 3D "Ip Man 3” ដែលភាពយន្តនេះនឹងចាប់ផ្ដើមថត ក្នុងប្រទេសចិននៅថ្ងៃស្អែក។ នេះបើតាមការឱ្យដឹងរបស់គេហទំព័រ Screendaily។

ប្រធានផលិតកម្ម Pegasus Motion Pictures និង ផលិតកររឿង “Ip Man 3” លោក Raymond Wong បានប្រាប់សារព័ត៌មាន THR ថា គំនិតដែលយក Tyson មកសម្ដែង ដោយសារឆ្នាំ២០១៣ កីឡាករខាំស្លឹកត្រចៀក ហូលីហ្វៀល (Evander Holyfield) រូបនេះ បានបើកគណនីបណ្ដាញសង្គមចិន Weibo ហើយប្រកាសខ្លួនប្រជែងជាមួយកុំកុំ និងសួរប្រជាជនចិនថា "អ្នកណាជាតារាក្បាច់គុនល្អបំផុតនៅចិន?”។

ប្រភពពី Jaynestars ឱ្យដឹងថា ក្រោយសួរដូច្នេះ ក្រុមអ្នកគាំទ្របានចង្អុលដាក់ កុំកុំ ហើយ Tyson តបថា “Donnie Yen? ខ្ញុំធ្លាប់ឮពីគាត់ គឺសម្ដែងរឿង "Ip Man” ។ ខ្ញុំតែងចង់សាកល្បងជំនាញវ៉ៃជាមួយគាត់"។

ប្រតិកម្មនឹងសម្ដីខាងលើ កុំកុំ បានឆ្លើយតបដែរថា "ខ្ញុំជិះទូកតែមួយជាមួយ Tyson ។ ខ្ញុំសង្ឃឹមថា បានសម្ដែងជាមួយគាត់ ក្នុងខ្សែភាពយន្តនៅពេលខាងមុខ និងប្រកួតជាមួយគ្នា"។

កុំកុំ បានគ្រោងអស់ពីរឆ្នាំ ដើម្បីបញ្ជាក់ពីការបង្ហាញខ្លួនរបស់ Tyson ក្នុងរឿង" Ip Man 3” ហើយពេលនេះពួកគេបានសម្ដែងជាមួយគ្នា ដែលនឹងបង្កើតឆាកប្រយុទ្ធដ៏ធំមួយមិនធ្លាប់មាន ក្នុងប្រវត្តិសាស្ត្រ។ ភាពយន្តនេះនឹងមានចាក់បញ្ចាំង នៅថ្ងៃបុណ្យចូលឆ្នាំចិន ឆ្នាំ២០១៦។

ក្នុងរឿង “Ip Man 3” ក៏មានការបង្ហាញពីតួអង្គ Bruce Lee (ប្រើបច្ចេកវិទ្យា CGI) ដែលដើរតួជាកូនរបស់ Ip Man។ សូមបញ្ជាក់ថា Bruce Lee ក៏ត្រូវបានគេបង្ហាញជាតួក្មេងប្រុសតូចម្នាក់ដែរ ក្នុងរឿង "Ip Man 2"៕