ទឹក​ដី​អង្គរ​នៃ​ប្រទេស​កម្ពុជា គឺ​ជា​គោលដៅ​ទេសចរណ៍​ដ៏​ពេញ​និយម​សម្រាប់​ភ្ញៀវ​ទេសចរ​ទូទាំង​ពិភពលោក។ ជាក់​ស្ដែង​ថ្មី​ៗ​នេះ ខេត្ត​សៀមរាប ដែល​ជា​ទី​ប្រជុំ​ប្រាសាទ​បុរាណ​ល្បី​ៗ​នៅ​កម្ពុជា បាន​ជាប់​ចំណាត់ថ្នាក់​លេខ​ពីរ ក្នុង​ចំណោម​គោលដៅ​ទេសចរណ៍​ពេញ​និយម​បំផុត​លើ​ពិភពលោក ចាត់​ថ្នាក់​ដោយ​គេហទំព័រ TripAdvisor។

ក្នុង​ចំណោម​ភ្ញៀវ​ទេសចរ​បរទេស​ជា​ច្រើន​ដែល​បាន​មក​​ដល់​ទឹកដី​អច្ឆរិយ​មួយ​នេះ ​ក៏​​មានតារា​ល្បី​ៗ និង​ជន​ល្បី​ៗ​ជា​ច្រើន​ដែរ ​ដែល​បាន​មក​តាម​រយៈ​រូបភាព​ផ្សេង​ៗ ដូច​ជា​ដំណើរ​ទស្សនកិច្ច ដំណើរ​កម្សាន្ត​លក្ខណៈ​ឯកជន ក៏​ដូច​ជា​ការ​ថត​ភាពយន្ត​ជា​ដើម។ ខាង​ក្រោម​នេះ​គឺ​ជា​អនុស្សាវរីយ៍​តារា និង​ជន​ល្បី​ៗ​ជា​ច្រើន​រូប​នៅ​ទឹកដី​អង្គរ​កម្ពុជា៖​

១. Michelle Obama

លោក​ជំទាវ​ទី​មួយ Michelle Obama ដែល​ជា​ភរិយា​របស់​ប្រធានាធិបតី​សហរដ្ឋអាមេរិក Barack Obama បាន​​មក​បំពេញ​ទស្សនកិច្ច​​ជា​ផ្លូវការ​នៅ​កម្ពុជា កាល​ពី​ថ្ងៃ​ទី២០ ដល់​ថ្ងៃ​ទី២២ ខែ​មីនា ឆ្នាំ​២០១៥។ ដំណើរ​ទស្សនកិច្ច​នេះ ផ្ដោត​ទៅលើ​ការ​ផ្សព្វផ្សាយ​គំនិត​ផ្ដួចផ្ដើម​អប់រំ​ស្ត្រី​ជា​អន្តរជាតិ​ ថ្មី​មួយ​ដែល​មាន​ឈ្មោះ​ថា “Let Girls Learn”។

២. Beyonce និង Jay-Z

តារា​ចម្រៀង​អាមេរិក Beyonce និង​ស្វាមី Jay Z បាន​មក​ធ្វើ​ដំណើរ​កម្សាន្ត​ស្ងាត់​ៗ នៅ​តំបន់​ប្រាសាទ​អង្គរ កាល​ពី​ដើម​ខែ​មករា ឆ្នាំ​២០១៥។

៣. Elvin Ng

តារា​សម្ដែង​សិង្ហបុរី Elvin Ng បាន​មក​​ថត​ភាពយន្ត "ដំរី​មរកត" នៅ​ខេត្ត​សៀមរាប កាល​ពី​ខែ​មិថុនា ឆ្នាំ​២០១៤។

៤. ក្រុម​តារា​សម្ដែង​ "Iris 2”

តារា​សម្ដែង​កូរ៉េ Lee Bum Soo, Im Soo Hyang, និង​សមាជិក​ក្រុម Beast Yoon Doojoon បាន​មក​ថត​រឿង​ភាគ "Iris 2” នៅ​ប្រាសាទ​អង្គរវត្ត កាល​ពី​ខែ​ធ្នូ ឆ្នាំ​២០១២។

៥. Marian Rivera និង Dingdong Dantes

តារា​សម្ដែង​ហ្វីលីពីន Marian Rivera និង​ស្វាមី Dingdong Dantes បាន​មក​លេង​ប្រាសាទ​អង្គរវត្ត​ កាល​ពី​ ឆ្នាំ​២០១២។

៦. SHINee

ក្រុម​ចម្រៀង​កូរ៉េ​ខាង​ត្បូង SHINee បាន​មក​ថត​ឈុត​ពាណិជ្ជកម្ម​សម្រាប់​កម្មវិធី "One Fine Day” នៅ​​ប្រាសាទ​ជា​ច្រើន​នៅ​ខេត្ត​សៀមរាប កាល​ពី​ឆ្នាំ​២០១០។

៧. Rain

តារា​ចម្រៀង​កូរ៉េ Rain បាន​មក​ថត​ពាណិជ្ជកម្ម​កាមេរ៉ា Nikon នៅ​ប្រាសាទ​បាយ័ន កាល​ពី​ឆ្នាំ​២០០៨។

៨. Mark Zuckerburg និង​ភរិយា

ស្ថាបនិក​បណ្ដាញ​សង្គម​ Facebook Mark Zuckerburg និង​ភរិយា Chan Priscilla បាន​មក​លេង​ប្រាសាទ​អង្គរវត្ត​កាល​ពី​ថ្ងៃ​ទី២៥ ខែ​ធ្នូ ឆ្នាំ​២០០៧។

៩. Angelina Jolie

តារា​សម្ដែង​សញ្ជាតិ​អាមេរិក-កម្ពុជា Angelina Jolie បាន​មក​ថត​រឿង "Lara Croft: Tomb Raider” នៅ​ប្រាសាទ​តាព្រហ្ម​ កាល​ពី​ឆ្នាំ​២០០០។

ចុច​អាន៖ ឆ្នាំ២០១៤​ តារា​បរទេស​ច្រើន​ណាស់​បាន​មក​ជួយ​ខ្មែរ

ដោយ៖ វ៉ាន់ថន