ក្តារចុចខ្មែរលើ iOS 8 អាចបន្តយឺតយ៉ាវ ដោយសាររង់ចាំការយល់ព្រមពី Apple

2014-10-08 16:40:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ការរំពឹងទុកសម្រាប់ការដាក់ក្តារចុចខ្មែរនៅលើ iOS 8 អាចមានភាពយឺតយ៉ាវបន្ថែមទៀត បើទោះបីមានការប្រឹងប្រែងពីក្រុម 4KhmeriPhone ដើម្បីឲ្យដំណើរការទាន់ពេលវេលាក៏ដោយ។

គម្រោងដំបូង ក្តារចុចខ្មែរនេះគ្រោងដាក់ឲ្យប្រើប្រាស់នៅពេលដែល Apple បញ្ចេញប្រព័ន្ធប្រតិបត្តិការ iOS 8 នៅលើ iDevices កាលពីខែកញ្ញាកន្លងទៅ តែក៏ត្រូវពន្យារពេល។

សមាជិកក្រុម 4KhmeriPhone មួយរូបបានប្រាប់ Sabay ថា ការយឺតយ៉ាវក្នុងការបញ្ចេញក្តារចុចខ្មែរលើ iOS 8 នេះគឺមិនអាស្រ័យលើក្រុមពួកលោកទេ ដោយក្រុមបានបញ្ជូនសំណើរទៅ Apple រួចហើយ រង់ចាំតែការដាក់ឲ្យប្រើប្រាស់ជាផ្លូវការប៉ុណ្ណោះ។

សមាជិកមួយរូបនេះបានបន្តថា ប្រធានក្រុមបានខិតខំប្រឹងប្រែងយ៉ាងខ្លាំង សូម្បីពេលវេលាសេសសល់ក៏មិនមានឲ្យគ្រួសារផង ដើម្បីបង្ហើយកិច្ចការនេះឲ្យរួចរាល់។

ក្តារចុចខ្មែរមិនទាន់មាននៅលើប្រព័ន្ធប្រតិបត្តិការ iOS 8 នៅឡើយ លើកលែងតែពុម្ភអក្សរខ្មែរ។ យ៉ាងណា ក្រុម 4KhmeriPhone បានខិតខំប្រឹងប្រែងធ្វើក្តារចុចខ្មែរដើម្បីឲ្យប្រិយមិត្ត iDevices ទាំងអស់បានប្រើប្រាស់។

ប្រធានក្រុម 4KhmeriPhone ធ្លាប់បានបញ្ជាក់ថា Apple ត្រូវការធ្វើតេស្តជាមុនសិនមុនសម្រេចដាក់ឲ្យប្រើឬយ៉ាងណានោះ។

លោកបានបន្តថា ការបញ្ជូនសំណើទៅកាន់ក្រុមហ៊ុន Apple មិនមានបញ្ហាអ្វីទេនោះ។ App ក្តារចុចខ្មែរនឹងឃើញមានលើ App Store ជាមិនខានឡើយ តែគ្រាន់តែពេលវេលាជាក់លាក់ លោកមិនទាន់ហ៊ានអះអាង។

ក្តារចុចខ្មែរទាំង ៤ ជួរ និង ៥ ជួរមានវចនានុក្រមណែនាំពាក្យខ្មែរពេលវាយ ដែលអាចវាយលេខ និង អក្សរដោយមិនបាច់ឆ្លាស់ Key។ ប្រិយមិត្តពេញចិត្ត ៤ ជួរ ឬ ៥ ជួរ អាចជ្រើសរើសប្រើតាមចិត្តដែលប្រិយមិត្តត្រូវការ។ សម្រាប់ App ក្តារចុចខ្មែរនេះគឺអាចប្រើបានគ្រប់ iPhone ,iPad ,iPod និងអាចប្រើជាលក្ខណៈផ្តេក បញ្ឈរ បានដោយរីករាយ។

ប្រធានក្រុមរូបនេះបញ្ជាក់ថា App ក្តារចុចខ្មែរដែលបានដាក់សំណើនេះគឺក្នុង Versions 1.0 ដោយ Versions នេះនៅមានបញ្ហាបន្តិចបន្តួច។ ចំណែក Versions ក្រោយៗលោកបានរៀបចំរួចរាល់ហើយ លោកនឹងដាក់សំណើបន្តបើសិនជា Apple បានបញ្ចេញ Versions 1.0 ឲ្យប្រើប្រាស់។

អានអត្ថបទ៖ បង្កើត Apple ID តាម iPhone មិនបាច់ប្រើ Credit Card ក៏បានដែរ

អានអត្ថបទ៖ Note 4 មកដល់ស្រុកខ្មែរក្នុងអំឡុងខែតុលា ក្នុងតម្លៃស្រពិចស្រពិល

អត្ថបទ៖ ដារ៉ាឆានី