​​រាល់​ឧបករណ៍​បច្ចេកវិទ្យា​​ដូច​ជា​​ទូរសព្ទ Smartphone ,​ Tablet, eReader និង កុំព្យូទ័រ Laptop ​គឺ​សុទ្ធ​តែ​​ត្រូវ​បាន​បង្កើត​ឡើង​​មាន​​​ឧបករណ៍​សាកថាម​ពល​រៀង​ៗ​ខ្លួន។​ ​តែ​សម្រាប់​ Smartphone ​និង Tablet ​ស៊េរី​ទំនើប​បច្ចុប្បន្ន​នេះ​​​ភាគ​ច្រើន​​​ប្រើ​ប្រភេទ​ឆ្នាំង​សាក​​​ដូច​គ្នា​​។ ​ដូច​នេះ​ហើយ​​​ទើប​មាន​អ្នក​ប្រើ​ប្រាស់​មួយ​ចំនួន​មិន​ច្បាស់​​​ ថា​តើ​ការ​ប្រើ​​​ឆ្នាំង​សាក​ខុស​ម៉ូដែល​​អាច​ធ្វើ​ឲ្យ​​ខូច​ទូរសព្ទ ឬ Tablet ដែរ​ ឬ​​ទេ?

​ប្រភេទ​ឆ្នាំង​សាក Lightning connector ​​​​

ចំពោះ​ប្រភេទ​​ឆ្នាំង​សាក​ Lightning connector ​​​​របស់​ក្រុមហ៊ុន Apple ​ដែល​ប្រើ​សម្រាប់​សាក​ iPhone និង Tablet ​​​​​គឺ​អាច​​ប្រើ​បាន​ជា​​មួយ​គ្នា ​​មាន​ន័យ​ថា ​​ឆ្នាំង​សាក ​iPhone គឺ​អាច​ប្រើ​សម្រាប់​សាក​ iPad ​ហើយ​ឆ្នាំង​សាក​​ iPad ក៏​អាច​ប្រើ​សម្រាប់​សាក​ iPhone ​បាន​ដែរ។

​ប្រភេទ​ឆ្នាំង​សាក Micro USB

​តែ​​​ចំពោះ​​​ឆ្នាំង​សាក​ប្រភេទ​​ Micro USB ​វិញ​​គឺ​មាន​ម៉ូដែល​ជា​ច្រើន​ដូច​ជា​​ទូរសព្ទ​ Smartphone​ និង ​Tablet ​​ដែល​ដំណើរ​ការ​ដោយ​​ប្រព័ន្ធ​ប្រតិបត្តិការ​​ Android , Windows Phone និង Blackberry ​​សុទ្ធ​តែ​​ប្រើ​​ឆ្នាំងសាក​​ប្រភេទ​នេះ​ដូច​គ្នា​​។ ​ជា​ធម្មតា​​គ្រប់​ឆ្នាំង​សាក​ Micro USB ​គឺ​អាច​ប្រើ​ជា​មួយ​នឹង​ឧបករណ៍​ដែល​មាន​​រន្ធ​សាក​ USB ដូច​គ្នា​បាន​ ​​ហើយ​​វា​ក៏​អាច​​ប្រើ​​ដោត​ភ្ជាប់​ជា​មួយ​នឹង​រន្ធ​ USB របស់​កុំព្យូទ័រ​ដើម្បី​សាក​ថ្ម​បាន​ផង​ដែរ។ គ្រប់​ប្រភេទ​​​ USB Connection ​គឺ​ផ្ដល់​​កម្រិត​ថាមពល ៥ វ៉ុល​ ហើយ​កម្រិត​​អំពែរ​វិញ​គឺ​ផ្ដល់​ទៅ​តាម​ប្រភេទ​ Tablet និង Smartphone។

​​ឆ្នាំង​សាក​ដែល​ភ្ជាប់​មក​ជា​មួយ​នឹង​ Android Tablet ​គឺ​អាច​ផ្ដល់​កម្រិត​អំពែរ​ខ្ពស់​ជា​ឆ្នាំង​សាក​របស់​ Android Smartphone។​ ឧទារហណ៍​ឆ្នាំង​សាក​របស់​ Tablet គឺ​ផ្ដល់​ថាមពល​​២​អំពែរ​ ចំណែក​ឯ​ឆ្នាំង​សាក​ Smartphone គឺ​ផ្ដល់​តែ​១​អំពែរ​តែ​ប៉ុណ្ណោះ។ ​ដូច្នេះកម្រិត​អំពែរ​កាន់​តែ​​ខ្ពស់​​ ការ​សាក​ក៏​កាន់​តែ​លឿន​ដែរ។ បើ​​យក​ឆ្នាំង​​សាក​ Tablet ​ទៅ​​សាក Smartphone ​គឺ​វា​សាក​ឆាប់​ពេញ​​​​ជាង​​ការ​​យក​​ឆ្នាំង​សាក Smartphone ទៅ​សាក​ ​​Tablet។

​ការ​​​បញ្ចូល​ភ្លើង​​ជាមួយ​ឆ្នាំង​សាក​ខុស​ម៉ូដែល ​គឺ​​មិន​អាច​បង្ក​ឲ្យ​មាន​បញ្ហា​នោះ​ទេ​​ ​តែ​ចំពោះ​​ឆ្នាំង​​សាក​ដែល​មិន​មែន​ជា​ផលិតផល​ស្តង់​ដារ​ ឬ​​របស់​ក្លែង​ក្លាយ ​គឺ​មិន​​ធានា​បាន​ទេ​​ ដូច្នេះគួ​រ​ចៀស​​វាង​ការ​ប្រើ​ប្រាស់​ផលិតផល​មិន​ស្គាល់​ម៉ាក ​​ព្រោះ​វា​អាច​ធ្វើ​ឲ្យ​ខូច​ខាត​របស់​ជាទី​ស្រលាញ​របស់​អ្នក​បាន។

មួយ​វិញ​ទៀត​នោះ​​ ​គួរ​ប្រយ័ត្ន​​នៅ​ពេល​ដែល​​ធ្វើ​ដំណើរ​ទៅ​ប្រទេស​ផ្សេងៗ​ ព្រោះ​ក្នុង​បណ្ដារ​ប្រទេស​មួយ​​ចំនួន ​កម្រិត​​កំលាំង​ចរន្ត​អគ្គិសនី ​(អំពែរ និង អំពែរ)​ គឺ​មិន​ដូច​គ្នា​នេះ​ទេ។ ដូច្នេះ​​គួរ​យល់​ដឹង​ឲ្យ​បាន​ច្បាស់​ពី​កម្រិត​វ៉ុល​ និង​អំពែ​ពី​ប្រទេស​ទាំង​នោះ​​ឲ្យ​បាន​ច្បាស់​ ព្រោះ​វា​អាច​បង្ក​ឲ្យ​ខូច​​ឧបករណ៍​អេឡិកត្រូនិច​បាន៕

អាន​បន្ត៖ វិធី​ងាយៗ​​សាក​ថ្ម iPhone ចូល​លឿន​ជាង​ធម្មតា

ប្រែ​សម្រួល៖ សំនៀង

ប្រភព៖ howtogeek