គោមខ្មែរ៤០០គោម នឹងដាក់តាំងនៅស្តាតអូឡាំពិកចុងសប្ដាហ៍នេះ
- 2015-04-01 16:19:39
- ចំនួនមតិ 0 | ចំនួនចែករំលែក 0
គោមខ្មែរ៤០០គោម នឹងដាក់តាំងនៅស្តាតអូឡាំពិកចុងសប្ដាហ៍នេះ
ចន្លោះមិនឃើញ
យ៉ាងហោចណាស់គោមខ្មែរ ដែលប្រជាជនខ្មែរស្ទើរតែបំភ្លេចចោល ជំនួសវិញដោយការប្រើអំពូលភ្លើងពណ៌ តុបតែងរានសែនទេវតាថ្ងៃចូលឆ្នាំថ្មីចំនួន ៤០០គោម នឹងដាក់តាំងបង្ហាញនៅពហុកីឡដ្ឋានជាតិរាត្រីថ្ងៃសុក្រនិងសៅរ៍សប្ដាហ៍នេះ។
ការតាំងបង្ហាញគោមដែលដាក់អំពូលភ្លើងឲ្យចាំងពន្លឺរាប់រយ គោម នេះគឺជាផ្នែកមួយនៃរាត្រីពិព័រណ៍ម្ហូបខ្មែរ របស់អង្គការ PSE ដើម្បីរៃអង្គាសថវិកាសប្បុរសធម៌ ទ្រទ្រង់ការរស់នៅក្មេងក្រីក្រចំនួន៧ពាន់នាក់។
អនុប្រធានកម្មវិធីនៃអង្គការដើម្បីភាពញញឹមនៃកុមារលោក អ៊ុក សុវណ្ណ លើកឡើងថា គោមខ្មែរ ដែលធ្លាប់តាំងថ្ងៃចូលឆ្នាំ ស្ទើរត្រូវគេបំភ្លេចចោល គឺសេសសល់តិចបំផុត។ ដូច្នេះការដាក់តាំងគោម៤០០គោម ចុងសប្ដាហ៍នេះ គឺការរំលឹកឡើងវិញនូវប្រពៃណីមួយរបស់ជនរួមជាតិខ្មែរ ដែលស្ទើរផុតរលត់។
«កាលដែលនៅតូច យើងឃើញឪពុកម្ដាយយើង តាំងវាលើផ្ទះនៅពេលឆ្នាំថ្មី តែឥឡូវគេបំភ្លេចវាចោល តែបើចូលឆ្នាំចិនគេតាំងគោមចិន គឺវាគួរឲ្យស្ដាយ»។ លោក សុវណ្ណ រំលឹក។
និមល និស្សិតធនាគារនៅសកលវិទ្យាល័យជាតិគ្រប់គ្រង ថាកាលពីក្មេងៗអ្នកភូមិកញ្ញានៅខេត្តកំពត ចូលចិត្តតាំងលម្អគោមផ្កាយនៅរានទេវតាថ្ងៃចូលឆ្នាំ។ ប៉ុន្តែឥឡូវនេះ គេលែងនិយម ហើយមិនសូវដែលឃើញដូចមុនដែរ គឺតាមផ្ទះគេបែរចូលចិត្តដាក់ភ្លើងអំពូលពណ៌តូចៗ ចម្រុះពណ៌ទៅវិញ គឺមិនមានគោមបែបហ្នឹងទៀតសោះ។ «នឹកឃើញតើ ឲ្យតែពេលហ្នឹងគេព្យួររណេងរណោង យើងមកពីលេងវត្តវិញយប់ៗហ្នឹង គឺភ្លឺតាមបង្អួចផ្ទះគ្រប់ៗផ្ទះ នឹករឿងគោមហ្នឹគឺនឹកផ្ទះនឹកថ្ងៃចូលឆ្នាំហ្មងនៀក» និមលរំលឹក។
លោក សុវណ្ណ ថាគោមខ្មែរ មានសណ្ឋានច្រើនបែបដែរ តែគោមដែលនឹងតាំងនៅចុងសប្ដាហ៍នេះ គឺធ្វើឡើងមានរាងជាផ្កាយទាំងអស់ មាន៣ពណ៌គឺ ខៀវ ក្រហម លឿង។ លោកបានអំពាវនាវដល់ជនរួមជាតិ ឲ្យចូលរួមនៅថ្ងៃចុងសប្ដាហ៍នេះ ដើម្បីរំលឹកអនុស្សាវរីយ៍គោមខ្មែរ និងថែមទាំងទស្សនា ទិញទទួលទាន នូវម្ហូបខ្មែរពីគ្រប់ទិសទីជាង៧០មុខ។
ប្រភពបន្តថាប្រជាជនខ្មែរដែលចង់ឃើញ អាចរំលឹកអនុស្សាវរីយ៍ មុខម្ហូបតាមខេត្តក្រុងរបស់ខ្លួន និងអាចទិញញ៉ាំសប្បាយក្នុងតម្លៃសមរម្យមួយចានពី១ដុល្លារទៅ១ដុល្លារកន្លះប៉ុណ្ណោះ។ ការចូលរួមបន្តិចបន្តួចក្នុងកម្មវិធីនេះ នឹងជួយដល់ការរស់នៅរបស់កុមារក្រីក្រ គ្មានទីពឹងជាច្រើននាក់នៅកម្ពុជា។
សំបុត្រចូលរួមពិព័រណ៍ម្ហូបខ្មែរដ៏ធំបំផុតប្រចាំឆ្នាំ មានទាំងការតាំងគោម៤០០គោមនេះ មានដាក់លក់នៅតាមស្ថានីយប្រេង Total ហាងកាហ្វេ Brown ភោជនីយដ្ឋានទូលូសប្លង់ បណ្ដោយផ្លូវប៉ាស្ទ័រ និងមុខពហុកីឡដ្ឋានជាតិ។ គេរំពឹងថាហោចណាស់ភ្ញៀវចំនួន១ម៉ឺននាក់នឹងចូលរួមក្នុងរាត្រីសប្បុរសធម៌នេះ។ អាចទាក់ទងសាកសួរឬទិញសំបុត្រតាមទូរសព្ទលេខ ០១៧ ៧៧ ៦១ ៤៤ ឬ ០៨៦ ៨៤ ៤៤១១៕
អត្ថបទ៖ ប៉ែន សុផាន់ណា
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
