Gerrard នឹងរស់នៅក្នុងវិមានតម្លៃជិត២៥លានដុល្លារ នៅអាមេរិក

2015-04-01 17:03:36
ចំនួនមតិ 0 | ចំនួនចែករំលែក 0

ចន្លោះមិនឃើញ

Steven Gerrard បានត្រៀមខ្លួនរួចរាល់អស់ហើយ ដើម្បីនឹងរស់នៅក្នុងជីវិតស៊ីវិល័យមួយ និងនៅក្នុងវិមាន Malibu តម្លៃ១៦,៨លានផោន (ជិត២៥លានដុល្លារ) នៅឆ្នេរភាគខាងលិចនៃសហរដ្ឋអាមេរិក ជាមួយនឹងគ្រួសាររបស់ខ្លួន ខណៈដែលប្រធានក្រុម Liverpool រូបនេះ នឹងទៅលេងឲ្យក្រុម LA Galaxy ក្រោយចប់រដូវកាលនេះ។

អតីតប្រធានក្រុមជម្រើសជាតិតោកំណាចអង់គ្លេស Gerrard នឹងធ្វើការផ្លាស់ប្ដូរដ៏ធំបំផុតមួយក្នុងជីវិត ពោលគឺត្រូវចាកចេញពីក្រុមហង្សក្រហម ដែលខ្លួនធ្លាប់លេងឲ្យអស់រយៈពេល១៧ឆ្នាំ ហើយកីឡាករវ័យ៣៤ឆ្នាំ នឹងនាំប្រពន្ធរបស់ខ្លួន Alex និងកូនស្រីទាំង៣នាក់ Lilly-Ella ១០ឆ្នាំ, Lexie ៨ឆ្នាំ និងកូនស្រីពៅ Lourdes វ័យ៣ឆ្នាំ ទៅជាមួយផងដែរ។

បើតាមសេចក្ដីរាយការណ៍ វិមានតម្លៃ១៦,៨លានផោននេះ គឺជាការផ្ដល់ជូន និងការចំណាយដោយក្លិបថ្មីរបស់ Gerrard (LA Galaxy) ក្នុងកិច្ចសន្យា១ឆ្នាំកន្លះ។ វិមានដ៏ប្រណិតនេះ មានបន្ទប់គេងចំនួន៦ និងបន្ទប់ទឹកចំនួន៩។ ជាពិសេសគឺមានទេសភាពដ៏ស្រស់ស្អាត ដោយមានទាំងទេសភាពភ្នំ និងមហាសមុទ្រប៉ាស៊ីហ្វិក ទៀតផង។

Gerrard នឹងបញ្ចប់អាជីពជាកីឡាកររបស់ក្រុមហង្សក្រហម Liverpool នៅចុងខែឧសភា ហើយកីឡាករសំណព្វចិត្តរបស់អ្នកគាំទ្រក្រុមហង្សក្រហមរូបនេះ នឹងចាកចេញពីទឹកដីអង់គ្លេស ទៅកាន់សហរដ្ឋអាមេរិក នៅដើមខែមិថុនាខាងមុខ៕

ចុចអាន៖ Gerrard សុំទោសអ្នកគាំទ្រ និងមិត្តរួមក្រុម ក្រោយកាតក្រហម

ប្រែសម្រួល៖ វិន ជីវ័ន្ត ប្រភព៖ Daily Mail