ស្ងាត់ៗ សាយ រតនៈ ចេញមុខសម្ពោធភោជនីយដ្ឋានតម្លៃរាប់ម៉ឺនដុល្លារ សុទ្ធតែតារាល្បីៗចូលរួម

2015-04-06 17:11:25
ចំនួនមតិ 0 | ចំនួនចែករំលែក 0

ចន្លោះមិនឃើញ

សាយ រតនៈ បានចេញមុខសម្ពោធភោជនីយដ្ឋានមួយតម្លៃរាប់ម៉ឺនដុល្លារ នៅចុងសប្ដាហ៍កន្លងទៅនេះ ដោយអញ្ជើញអ្នកសិល្បៈចូលរួមពីរថ្ងៃជាប់គ្នា។

សាយ រតនៈ ផ្ដល់បទសម្ភាសន៍

ពិធីករល្បីឈ្មោះខាងលើបានអះអាងថា ភោជនីយដ្ឋានយីហោ Costar Pub and Seafood តម្លៃរាប់ម៉ឺនខាងលើនេះ ជាកម្មសិទ្ធិបងប្រុសធម៌ ប៉ុន្តែ លោកជាអ្នកចេញមុខជំនួស។ សាយ រតនៈ ឱ្យដឹងថា៖ "បើនិយាយទៅ ខ្ញុំគ្រាន់តែជាអ្នកមានហ៊ុនតិចតួចប៉ុណ្ណោះ អ្នកដែលម្ចាស់តែម្ដងជាបងធម៌ទៅវិញទេ"។ លោកបន្តថា ខ្លួនទទួលបន្ទុកផ្នែកការផ្សព្វផ្សាយ និង កម្មវិធីសិល្បៈ។

បងប្រុសធម៌របស់ សាយ រតនៈ ធ្វើបទសម្ភាសន៍

ពិធីករកម្មវិធី "រាត្រីកម្សាន្ត" ខាងលើនិយាយទៀតថា ការពិតទៅភោជនីយដ្ឋាននេះ បានដំណើរការជិត ៣ ខែ កន្លងមកហើយ ប៉ុន្តែទើបកំណត់ពេលសម្ពោធថ្មីៗនេះ ប៉ុណ្ណោះ។ ទោះបីជាយ៉ាងណា នៅក្នុងរយៈពេលកន្លងមក មានការគាំទ្រពីអតិថិជនបណ្ដើរៗហើយ រួមមានទាំងអ្នកនៅក្នុងចង្កោមសិល្បៈផងដែរ។

ក្នុងពេលដដែល សាយ រតនៈ បញ្ជាក់ថា ភោជនីយដ្ឋានរបស់លោក បើកទទួលរៀបចំកម្មវិធីនានា ដូចជា ខួបកំណើត ជាដើម ហើយក៏មានការបញ្ចុះតម្លៃ ២០% ចំពោះអតិថិជន VIP។ សាយ រតនៈ បង្ហាញក្ដីសង្ឃឹមថា អតិថិជននឹងបន្តគាំទ្រភោជនីយដ្ឋានខាងលើ ដែលមានចំណែកភាគហ៊ុន ឱ្យដូចជាការគាំទ្រកម្មវិធី "រាត្រីកម្សាន្ត" ៕