តំបន់កម្សាន្តល្បីៗទាំង៥ មនុស្សទៅលេងច្រើនថ្ងៃចូលឆ្នាំថ្មី

2015-04-07 19:06:10
ចំនួនមតិ 0 | ចំនួនចែករំលែក 0

ចន្លោះមិនឃើញ

បុណ្យចូលឆ្នាំថ្មីមិនមែនត្រឹមតែជាឱកាស ដែលប្រជាជនទូទាំងប្រទេសកម្ពុជាបានជួបជុំបងប្អូន ធ្វើម្ហូបអាហារជូនចាស់ៗ និងទៅវត្តប្រគេនលោកប៉ុណ្ណោះទេ ប៉ុន្តែថែមទាំងជាពេលវេលាដែលទាំងអស់គ្នាអាចទៅលំហែកាយនៅរមណីយដ្ឋានណាមួយ។ ក្រោយពីជួបជុំជូនបាយសម្លបងប្អូន និងប្រគេនចង្ហាន់ព្រះសង្ឃរួច គេតែងសង្កេតឃើញថា មនុស្សជាច្រើនបានទៅលេងនៅតំបន់កម្សាន្តផ្សេងៗ។

ក្នុងចំណោមតំបន់កម្សាន្តនានា ខាងក្រោមជាកន្លែងដ៏ទាក់ទាញមានមនុស្សទៅលេងច្រើនរាល់បុណ្យចូលឆ្នាំថ្មីម្ដងៗ។

កោះដាច់ រាជធានីភ្នំពេញ

បើអ្នកពុំធ្វើដំណើរទៅខេត្ត ឬត្រូវស្នាក់នៅក្នុងរាជធានីភ្នំពេញអំឡុងពេលបុណ្យចូលឆ្នាំ ប៉ុន្តែចង់រកកន្លែងកម្សាន្តណាក្បែរផ្ទះ អ្នកអាចទៅកម្សាន្តនៅកោះដាច់។ កោះដាច់មានឆ្នេរខ្សាច់ដ៏ធំល្វឹងល្វើយមួយ។ នៅទីនោះ អ្នកអាចអង្គុយលើខ្យុស (ខ្ទមឫស្សី) ដែលដាក់ក្បែរមាត់ទឹក កម្សាន្តអារម្មណ៍ ញ៉ាំអាហារផ្សេងៗ និងងូតទឹកលេង។

ភ្នំបូកគោ ខេត្តកំពត

ជារមណីយដ្ឋានដ៏ល្បីល្បាញមួយរបស់ខេត្តកំពត មានមនុស្សទៅកម្សាន្តមិនសូវដាច់ សូម្បីតែថ្ងៃធម្មតា។ ប៉ុន្តែសម្រាប់ថ្ងៃបុណ្យចូលឆ្នាំថ្មីរាល់ឆ្នាំ មនុស្សម្នាជាច្រើនបានទៅកម្សាន្តទៅទីនោះ។ អ្នកដំណើរទាំងឡាយត្រូវចំណាយពេលប្រហែល៤០នាទីដើម្បីឡើងទៅដល់កំពូលភ្នំ តាមមធ្យោបាយជារថយន្ត ឬទោចក្រយានយន្ត។ គេនឹងប្រទះឃើញកាស៊ីណូទាំងថ្មី ទាំងចាស់។ អ្វីដែលធ្វើឲ្យមនុស្សនិយមទៅកម្សាន្តនៅលើភ្នំបូកគោនេះ គឺគេអាចឃើញពពកអណ្ដែតនៅក្បែរខ្លួនគេ ឯអាកាសធាតុក៏ត្រជាក់ខ្លាំងណាស់ដែរ។

ចំបក់ ខេត្តកំពង់ស្ពឺ

ជាទូទៅគេស្គាល់គិរីរម្យយ៉ាងច្បាស់ ខណៈរមណីយដ្ឋានចំបក់វិញគឺពុំសូវស្គាល់ប៉ុន្មាននោះទេ។ ចំបក់ស្ថិតនៅមិនឆ្ងាយពីគិរីរម្យប៉ុន្មានឡើង គឺមានច្រកចូលតែមួយ ប៉ុន្តែបែកគ្នាត្រង់កន្លែងឆ្លងស្ពាន ដោយផ្លូវទៅគិរីរម្យត្រូវជិះឡើងភ្នំតាមផ្លូវខាងឆ្វេងដៃ ហើយផ្លូវទៅចំបក់ត្រូវទៅមុខត្រង់។ ពេលទៅដល់ទីស្នាក់ការលក់សំបុត្រចូលទស្សនារមណីយដ្ឋានចំបក់ អ្នកមកកម្សាន្តទាំងអស់តម្រូវឲ្យថ្មើរជើង ឬជិះរទេះគោ ដើម្បីកុំឲ្យមានសំឡេងម៉ាស៊ីនរំខានដល់ពពួកសត្វព្រៃទាំងឡាយ។ គេត្រូវធ្វើដំណើរប្រហែលជាបួនគីឡូទើបទៅដល់ទឹកធ្លាក់ ដែលមានកម្ពស់ជិត១០ម៉ែត្រ។ អ្នកដំណើរទាំងឡាយតែងមកអង្គុយលេងជាក្រុមគ្រួសារ គូស្នេហ៍ មិត្តភ័ក្ដិ ញ៉ាំអាហារកម្សាន្តលើផ្ទាំងថ្ម ក្រោមម្លប់ឈើព្រៃ និងមានទឹកធ្លាក់បាចសាចបន្តិចៗ ញ៉ាំឲ្យបរិយាកាសនៅទីនេះមានសភាពត្រជាក់។

សេកសក បាត់ដំបង

ជារមណីយដ្ឋានដ៏ល្បីរបស់អ្នកខេត្តបាត់ដំបង។ រាល់ពេលបុណ្យទានធំៗម្ដងៗ យុវជនយុវតី មនុស្សចាស់ប្រុសស្រីតែងនៅកម្សាន្តហែលទឹកលេង ក្បែរផ្ទាំងថ្មដ៏ធំល្វឹងល្វើយ ក្នុងស្ទឹងនៃរមណីយដ្ឋានសេកសកនេះ ដែលស្ថិតនៅចម្ងាយប្រមាណជា៦០គីឡូម៉ែត្រពីទីរួមខេត្តបាត់ដំបង។

បឹងយក្សឡោម ខេត្តរតនគិរី

បឹងភ្នំភ្លើងនេះតែងមានមនុស្សទៅកម្សាន្តជាប្រចាំ ហើយបើចំថ្ងៃបុណ្យទានអីចេះទៀតនឹងរឹតតែសម្បូរមនុស្សទៅកម្សាន្ត។ អ្នកដំណើរទាំងឡាយអាចក្រាលកន្ទេល ញ៉ាំអាហារជួបជុំគ្រួសារ ញាតិមិត្ត និងគូស្នេហ៍ នៅជុំវិញមាត់បឹង។ ក្រោយញ៉ាំអាហាររួច គេអាចគេងកម្សាន្ត និងងូតទឹកបឹងយក្សឡោមដ៏ថ្លាយង់ ត្រជាក់ដល់ថ្លើម៕

ម៉េចដែរ ប្រិយមិត្តមានចង់ទៅកម្សាន្តនៅរមណីយដ្ឋានណាមួយទេ ចូលឆ្នាំនេះ?