១ឈុតចំហទ្រូងដល់ផ្ចិតរបស់ Lopez ផ្អើលពេញពិភពលោក

2015-04-09 17:44:44
ចំនួនមតិ 0 | ចំនួនចែករំលែក 0

ចន្លោះមិនឃើញ

បើរាប់ពីឆ្នាំ២០០០ មកទល់ពេលនេះ មានរយៈពេល១៥ឆ្នាំហើយ ប៉ុន្តែរ៉ូបមួយឈុតរបស់តារាចម្រៀង Jennifer Lopez នៅតែក្លាយជាប្រធានបទក្ដៅគគុក ក្នុងវិស័យសារព័ត៌មាន និងអ្នកលេងអ៊ីនអឺណិតជុំវិញពិភពលោក។

តារាសម្ដែងអាមេរិក បានស្លៀករ៉ូបសូត្រ Versace នេះ ចូលក្នុងកម្មវិធី Grammy Awards លើកទី២៤ ក្នុងថ្ងៃទី២៣ ខែកុម្ភៈ ឆ្នាំ២០០០ ក្នុងទីក្រុង Los Angeles សហរដ្ឋអាមេរិក។ វត្តមាន Lopez ជាមួយនឹងរ៉ូបពណ៌បៃតង ពោរពេញដោយស្លឹករុក្ខជាតិត្រូពិក និងដើមឫស្សី ធ្វើឱ្យមនុស្សជាច្រើនចាប់អារម្មណ៍ យ៉ាងខ្លាំងនាពេលនោះ។

មិនតែប៉ុណ្ណោះ រ៉ូបរបស់ Lopez ក៏ធ្វើឱ្យប្រធានក្រុមហ៊ុន Google លោក Eric Schmidt ចាប់អារម្មណ៍ ហើយ Eric និយាយថា វាធ្វើឱ្យលោកមានគំនិត បង្កើតមុខងារថ្មីគឺ Google Image។ មូលហេតុធ្វើឱ្យលោក បង្កើតមុខងារថ្មីនេះ ដោយសារអ្នកលេងអ៊ីនធឺណិតច្រើនណាស់ ចាប់អារម្មណ៍ និងចង់ឃើញរូបភាព ជាជាងឃើញអត្ថបទ និងតំណភ្ជាប់ (Link)។

មុខងារ Google Image ដាក់ឱ្យដំណើរការនៅខែកក្កដា ឆ្នាំ ២០០១ ដែលកាលនោះមាន២៥០លានរូបដាក់ឱ្យ Search ។ មកត្រឹមឆ្នាំ២០១០ ចំនួនរូបភាពកើនឡើងដល់ជាង១០ពាន់លានរូប។

តើរ៉ូប Green Versace របស់ Lopez មានប្រវត្តិយ៉ាងណា?

រ៉ូបសូត្រល្បីដល់ថ្នាក់ធ្វើឱ្យមេធំៗរបស់ Google បង្កើតបានមុខងារថ្មីនេះ គឺរចនាដោយអ្នកច្នៃម៉ូដ នាង Donatella Versace បង្ហាញពីព្រៃពណ៌បៃតង សមុទ្របៃតង ឬព្រៃត្រូពិកបៃតង។

មុនពេលល្បីលើកម្រាលព្រំក្រហម ក្នុងកម្មវិធី Grammy Awards រ៉ូបនេះត្រូវបានស្លៀកដោយ Versace ផ្ទាល់ ពេលនាងចូលរួមកម្មវិធី Met Gala កាលពីថ្ងៃ៦ ខែធ្នូ ឆ្នាំ១៩៩៩។ ក្រោយមកស្លៀកបង្ហាញម៉ូដដោយ តារាម៉ូដែល Amber Valletta ហើយឆ្នាំ២០០០ វាត្រូវគេដាក់លក់ ក្នុងតម្លៃ ១៥ ០០០ដុល្លារអាមេរិក។ នៅខែមករា ឆ្នាំដដែលនោះ តារាចម្រៀងអង់គ្លេស Geri Halliwell ក្រុម Spice Girl បានពាក់រ៉ូបនេះ ចូលកម្មវិធី NRJ Music Awards ប៉ុន្តែមិនមានការចាប់អារម្មណ៍ផុលផុសទេ។

បន្ទាប់មកទៀត Lopez បានស្លៀកវាចូលក្នុងកម្មវិធី Grammy Awards លើកទី២៤ នៅថ្ងៃទី២៣ ខែកុម្ភៈ ឆ្នាំ២០០០ ក្នុងទីក្រុង Los Angeles ជាមួយមិត្តប្រុស Sean Combs ដែលធ្វើឱ្យទស្សនិកជន ចាប់អារម្មណ៍ខ្លាំងមិនគួរឱ្យជឿ។

ពេលនោះហើយនាង និងតារាសម្ដែងប្រុស David Duchovny បង្ហាញមុខលើឆាក មុខមហាជនច្រើនកុះករ ដើម្បីទទួលពាន Best R&B Album។ Lopez បានប្រកាសប្រាប់ទស្សនិកជនថា "នេះជាលើកទីមួយហើយ ក្នុងរយៈពេល៥-៦ឆ្នាំ ដែលគ្មានអ្នកណាមើលមកខ្ញុំច្រើនបែបនេះទេ"៕