ល្បែងប្រជាប្រិយខ្មែរបង្កើនស្នាមញញឹមនិស្សិតលេងហើយទប់សំណើចមិនជាប់

2015-04-11 17:47:11
ចំនួនមតិ 0 | ចំនួនចែករំលែក 0

ចន្លោះមិនឃើញ

និស្សិតជាច្រើនបានប្រមូលមកជួបជុំគ្នាលេងល្បែងប្រជាប្រិយខ្មែរ ដើម្បីស្វាគមន៍ឆ្នាំថ្មីនៅបរិវេណសាកលវិទ្យាល័យពុទ្ធិសាស្រ្តយ៉ាងសប្បាយរីករាយ ។

សំណើចនិងភាពសប្បាយរីករាយពីការលេងល្បែងប្រជាប្រិយ ញ៉ាំងឲ្យបរិយាកាសនាពេលនោះកាន់តែហ៊ោកញ្ជ្រៀវមួយកម្រិត ធ្វើឲ្យអ្នកឈរមើលភាគច្រើន ទ្រាំមិនបានសម្រុកទៅលេងជាមួយដែរ។

ព្រមជាមួយការលេងល្បែងប្រជាប្រិយចំនួន៩ខុសៗគ្នា ក៏មានការសម្ដែងសកម្មភាពពិសេសៗជាច្រើនដូចជា ការសម្ដែងរបាំ ការសម្ដែងក្បាច់គុណល្បុក្កតោ តេក្វាន់ដូ និងការច្រៀងចម្រៀងប្រជាប្រិយជាដើម។ ក្រៅពីនេះ ក៏មានស្តង់លក់ម្ហូបអាហារ និងវត្ថុអនុស្សាវរីយ៍ផ្សេងៗរបស់និស្សិតដែលចូលរួម ដោយថវិការពីការលក់មួយចំណែកគឺជួយដល់កុមារក្រីក្រ។

ប្រធានផ្នែកទំនាក់ទំនងនិងទីផ្សារនៃសាកលវិទ្យាល័យពុទ្ធិសាស្រ្ត កញ្ញា នុត រត្ថា ប្រាប់ថា ពិធីនេះរៀបចំឡើងជារៀងរាល់ឆ្នាំនៅសាកលវិទ្យាល័យពុទ្ធិសាស្រ្ត ដើម្បីអបអរពិធីបុណ្យចូលឆ្នាំខ្មែរ ដែលនឹងចូលមកដល់នាពេលខាងមុខដើម្បីលើកតម្កើងតម្លៃវប្បធម៌ខ្មែរតាមរយៈការលេងល្បែងប្រជាប្រិយ និងជាការជួបជុំបង្កើនភាពស្និទ្ធស្នាលរវាងបុគ្គលិក សាស្ត្រាចារ្យ ព្រមទាំងនិស្សិតគ្រប់ជំនាន់ផងដែរ៕