ដឹងថា កុំកុំ ធ្លាប់ខ្ចីបុលគេនៅពេលណាអត់?

2015-04-17 23:40:38
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងកម្មវិធី Talk Show ដ៏ពេញនិយម "Telling Maria" រដូវកាលទី២ របស់អ្នកស្រី Luisa Maria Leitao ចាក់ផ្សាយកាលពីថ្ងៃទី១៣ ខែមេសា តារាក្បាច់គុន កុំកុំ ត្រូវបានអញ្ជើញជាភ្ញៀវកិត្តិយស។ បង្ហាញមុខក្នុងកម្មវិធីទាំងពីរវគ្គ តារារូបនេះបានលាតត្រដាងពីការតស៊ូ មុនក្លាយជាតារាភាពយន្តល្បី ក្នុងរយៈពេល៣០ឆ្នាំមកនេះ។ មិនតែប៉ុណ្ណោះលោកក៏បានបង្ហើបឱ្យដឹង ពីរឿងរ៉ាវមួយចំនួនទៀត មុនជួបអ្នកដឹកនាំរឿង លោក Yuen Woo Ping ផងដែរ។

ជួបអ្នកដឹកនាំរឿង Yuen Woo Ping ក្នុងឆ្នាំ១៩៨០ តួឯករឿង "Ip Man” បានធ្វើជាអ្នកសម្ដែងឈុតពិបាក (Stuntman) របស់លោក Woo Ping អស់ពីរបីឆ្នាំ មុនបានសម្ដែងរឿង “Drunken Tai Chi" ចាក់បញ្ចាំងក្នុងឆ្នាំ១៩៨៤។ ក្រោយជោគជ័យក្នុងវិស័យភាពយន្ត និងទូរទស្សន៍អស់ជាច្រើនឆ្នាំ តារាវ័យ៥១ឆ្នាំ បានសម្រេចចិត្តបើកក្រុមហ៊ុនភាពយន្ត Bullet Films ដោយខ្លួនឯង នៅឆ្នាំ១៩៩៦ តែត្រូវជួបវិបត្តិហិរញ្ញវត្ថុធ្ងន់ធ្ងរ។

តារាកូនបីនិយាយថា លោកជួបវិបត្តិហិរញ្ញវត្ថុ ខណៈពេលថតភាពយន្ត "Legend of the Wolf” ដែលថតបានបន្តិច មុនតំបន់អាស៊ីជួបវិបត្តិហិរញ្ញវត្ថុ ក្នុងឆ្នាំ១៩៩៧។ ពេលនោះអ្នកទីក្រុង Guangzhou គ្មានប្រាក់គ្រប់គ្រាន់ ដើម្បីបង់ថ្លៃការចំណាយប្រចាំថ្ងៃ និងថ្លៃម្ហូបអាហារទេ ហើយលោកក៏ទៅខ្ចីបុលពីអ្នកចង់ការប្រាក់ ដើម្បីដោះស្រាយបញ្ហា។

ដោយមានការព្យាយាម តារារូបនេះ បានបន្តថតខ្សែភាពយន្តគ្មានឈប់ រហូតដល់ពេលនេះ ដោយរងគ្រោះថ្នាក់ជាច្រើន។ កុំកុំបន្ថែមថា ខ្លួនរបស់លោកដូចជាយ៉ាប់យ៉ឺនហើយ "ឥលូវខ្ញុំមានអារម្មណ៍ថា ឆ្អឹងខ្នងខ្ញុំដូចជាបាក់អីចឹង។ ខ្ញុំជួបគ្រោះថ្នាក់លើស១០០ដង ច្រើនជាង Nicholas Tse ទៅទៀត”។

បច្ចុប្បន្ន កុំកុំ កំពុងថតរឿង "Ip Man 3" ជាមួយអតីតកីឡាករប្រដាល់ទម្ងន់ធ្ងន់ ម៉ៃថៃសាន់ ហើយលោកនឹងថតខ្សែភាពយន្តហូលីវូដ "Noodle Man” នៅខែមិថុនា ខាងមុខ៕