James Wan អ្នកដឹកនាំរឿងមកពីអាស៊ីដ៏ល្បី ជាម្ចាស់ស្នាដៃរឿង “Furious 7”

2015-04-21 15:05:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែភាពយន្ត "Furious 7” ដែលកំពុងចាក់បញ្ចាំងនិងទទួលបានការគាំទ្រខ្លាំងទូទាំងពិភពលោក គឺជាខ្សែភាពយន្តអាមេរិក និងចូលរួមសម្ដែងដោយតារាអាមេរិកស្ទើរតែទាំងអស់ ប៉ុន្តែប្រិយមិត្តដឹងទេថា លោក James Wan ដែលជាអ្នកដឹកនាំរឿងនេះ មិនមែនជាជនជាតិអាមេរិកឡើយ ប៉ុន្តែគឺជាអាស៊ី? ដើម្បីជ្រាបកាន់តែច្បាស់ ថ្ងៃនេះ Sabay សូមលើកយកជីវប្រវត្តិរបស់អ្នកដឹកនាំរឿងរូបនេះមកផ្សាយជូនប្រិយមិត្តបានដឹងទាំងអស់គ្នា៖

កុមារភាព និងការសិក្សា

James Wan គឺជាអ្នកដឹកនាំសញ្ជាតិអូស្ត្រាលី និងត្រូវបានគេស្គាល់ច្រើនក្នុងវិស័យភាពយន្តហូលីវូដ ប៉ុន្តែគេមានឈាមជ័រជាជនជាតិចិនសុទ្ធសាធ។ Wan កើតនៅថ្ងៃទី៧ ខែកុម្ភៈ ឆ្នាំ១៩៧៧ នៅទីក្រុង Kuching រដ្ឋ Sarawak ប្រទេសម៉ាឡេស៊ី ដោយមានឪពុកម្ដាយគឺជាជនជាតិចិន។ គ្រួសាររបស់ Wan បានផ្លាស់មករស់នៅប្រទេសអូស្ត្រាលីនៅពេលដែលគេមានអាយុ ៧ឆ្នាំ។ Wan មានក្ដីសុបិនចង់ក្លាយជាអ្នកផលិតភាពយន្តតាំងពីអាយុ ១១ឆ្នាំ។ ដូច្នេះក្រោយចប់មធ្យមសិក្សា គេបានចូលរៀននៅវិទ្យាស្ថានបច្ចេកវិទ្យា Royal Melbourne ដោយបានបញ្ចប់ថ្នាក់បរិញ្ញាបត្រផ្នែកសិល្បៈ។ មុននឹងចាប់ផ្ដើមមានឈ្មោះល្បីក្នុងវិស័យភាពយន្ត Wan បានផលិតភាពយន្ត “Stygain” ជាមួយ Shannon Young ដែលរឿងនេះបានឈ្នះពានរង្វាន់ “Best Guerrilla Film” ក្នុងកម្មវិធីមហោស្រពភាពយន្តទីក្រុង Melbourne កាលពីឆ្នាំ២០០០។

ជោគជ័យក្នុងអាជីពដឹកនាំភាពយន្ត

Wan បានជួប Leigh Whannell ដែលជាមិត្តភ័ក្ដិនិងដៃគូពាណិជ្ជកម្មរបស់គេពេលកំពុងសិក្សាថ្នាក់បរិញ្ញាបត្រ។ ក្រោយមកនៅឆ្នាំ ២០០៣ គេបានដឹកនាំរឿង “Saw” ដោយ Whannell គឺជាអ្នកនិពន្ធអត្ថបទរឿង ដែលរឿងនេះហើយដែលធ្វើឲ្យកេរ្តិ៍ឈ្មោះរបស់គេចាប់ផ្ដើមល្បីល្បាញក្នុងវិស័យភាពយន្តហូលីវូដ។ ចំណាយដើមទុនត្រឹម ១,២លានដុល្លារ ពួកគេមិនរំពឹងថារឿងនេះនឹងទទួលបានចំណូលច្រើនពីការបញ្ចាំងតាមរោងភាពយន្តឡើយ ដោយគិតថាសម្រាប់ចេញលក់ជា DVD ប៉ុណ្ណោះ។ យ៉ាងណា ក្រោយពេលចេញបញ្ចាំង "Saw” អាចរកចំណូលបានជាង ១០២លានដុល្លារជុំវិញពិភពលោក ដែលលើសពីការរំពឹងទុកជាច្រើនដង។

ក្រោយមក Wan និង Whannell បានក្លាយជាផលិតករសម្រាប់ខ្សែភាពយន្ត Saw ជាច្រើនវគ្គទៀត រួមមាន Saw II, Saw III, Saw IV, Saw V, Saw VI និង Saw 3D។ នៅឆ្នាំ២០០៧ James Wan បានបន្តពង្រឹងស្នាដៃដឹកនាំភាពយន្តរន្ធត់បន្តទៀត តាមរយៈរឿង "Dead Silence” និងរឿង "Death Sentence”។ ស្នាដៃជោគជ័យបន្តបន្ទាប់ទៀតរបស់លោកមានដូចជារឿង "Insidious” , “The Conjuring” , “Annabelle” និង "Furious 7”។

“Furious 7” គឺជាភាពយន្តធំបំផុតរបស់ James Wan

ប្រៀបធៀបនឹងខ្សែភាពយន្តមុនៗ "Furious 7” គឺជាភាពយន្តធំបំផុតក្នុងអាជីពរបស់ James Wan គិតទាំងទ្រង់ទ្រាយផលិតកម្ម និងការចំណាយដើមទុន។ ទោះយ៉ាងណា នៅពេលសារព័ត៌មានសួរថា គេមានការភ័យខ្លាចដែរឬទេ អ្នកដឹកនាំរូបនេះនិយាយថា គេមិនមានការភ័យខ្លាចដោយសារទំហំភាពយន្តឡើយ។ Wan និយាយថា "ចំពោះខ្ញុំ វានៅតែជាការផលិតភាពយន្តដដែល គ្រាន់តែចំណាយពេលយូរជាងមុន និងត្រូវចាត់ចែងការងារច្រើនជាងមុនតែប៉ុណ្ណឹង។ ផ្ទុយទៅវិញវាកាន់តែងាយស្រួលសម្រាប់ខ្ញុំទៅវិញទេ ព្រោះមានមនុស្សច្រើន និងសុទ្ធតែជាអ្នកមានសមត្ថភាពដើម្បីជួយខ្ញុំក្នុងដំណើរការផលិតរឿងនេះ" ៕