ជា សត្យា ក្រៅពីចូលរួមស្រាវជ្រាវរកឃើញធ្នូបុរាណខ្មែរ តែជាអ្នកនិពន្ធបទភ្លេងលាក់មុខ

2015-04-22 23:27:08
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រៅពីសហការចូលរួមស្រាវជ្រាវរកឃើញធ្នូបុរាណខ្មែរដែលបានបាត់បង់រាប់រយឆ្នាំជាមួយលោក ទិល ចាន់លីន ដែលជាអ្នកស្រាវជ្រាវផ្ទាល់ ការពិត លោក ជា សត្យា ក៏ជាអ្នកនិពន្ធបទភ្លេងដ៏ពូកែម្នាក់តាំងពីឆ្នាំ ១៩៩៨ ហើយប្រកបដោយឆន្ទៈមិនចម្លងពីបរទេសទៀតផង។

“បទរបស់ខ្ញុំភាគច្រើនផលិតហើយ គឺបោះទៅឱ្យផលិតកម្មនៅក្រៅស្រុកប៉ុណ្ណោះ ទើបមិនសូវមានអ្នកស្គាល់"។ ជា សត្យា បញ្ជាក់មកកាន់ Sabay រសៀលនេះ។ លោកបញ្ជាក់ថា ដោយរវល់នៅក្នុងការងារស្រាវជ្រាវផ្សេងៗរួមទាំងធ្នូបុរាណខ្មែរ ដែលបាត់បង់ទៅជាច្រើនរយឆ្នាំនៅតាមជញ្ជាំងប្រាសាទនានាមានអង្គរវត្តជាដើមនោះ ធ្វើឱ្យមិនមានពេលគ្រប់គ្រាន់នៅក្នុងការសរសេរ Melody ប៉ុន្មានទេ។

រហូតមកដល់អ្នកនិពន្ធខាងលើ និពន្ធបទភ្លេងថ្មីបានប្រមាណជាង ១០០ បទ មកហើយ។ បទចម្រៀងមួយចំនួនបានទទួលការគាំទ្រគួរកត់សម្គាល់ដូចជា បទ "បើសិនគ្មានអូន" និង "កុំអាណិតបង" ច្រៀងដោយ Jimmy Kiss។ ក្រៅពីនេះក៏មានបទចម្រៀងមួយចំនួន ដែលមិនទាន់ផ្សព្វផ្សាយជាសាធារណៈនៅឡើយ និង ស្ថិតនៅក្នុងគម្រោងដ៏ខ្លីខាងមុខ។

អ្នកនិពន្ធរូបនេះបន្តថា៖ " អ្នកនិពន្ធសំខាន់ សរសេរឱ្យមានលក្ខណៈខ្មែរ និង ច្រៀងមានដង្ហើមជាខ្មែរផងដែរ"។ អ្នកស្រាវជ្រាវខាងលើឱ្យដឹងទៀតថា ដើម្បីបានសាច់ភ្លេងដូច្នេះទាល់តែព្យាយាមសិក្សាពីមូលដ្ឋានភ្លេងខ្មែរ ឬបទភ្លេងចម្រៀងផ្សេងៗរបស់អ្នកនិពន្ធជំនាន់អធិរាជសំឡេងមាស ស៊ីន ស៊ីសាមុត។

អ្នកនិពន្ធរូបនេះបានបញ្ជាក់ថា កំពុងរៀបចំផែនការពង្រឹងការតែងនិពន្ធបទភ្លេងថ្មីបន្ថែមទៀត ដោយសហការជាមួយលោក យឹង យ៉ន, Jimmy Kiss និង សមាជិកមួយចំនួនទៀត ដើម្បីប្រកួតប្រជែង ឬបង្ហាញចម្រៀងមានលក្ខណៈខ្មែរ ទៅកាន់ពលរដ្ឋនៅបណ្ដាប្រទេសជាសមាជិកអាស៊ាន ក៏ដូចជា ពិភពលោក៕

អានអត្ថបទ៖ ក្រុមហ៊ុនធំៗ ៣ ប្រាប់ថា វិស័យបង្ហាញម៉ូដនៅកម្ពុជាកំពុងរីកចម្រើន

អានអត្ថបទ៖ នាយ កុយ បញ្ជាក់ពីវត្តមានរបស់នាយ ក្រឹម យប់មិញ

បទ៖ បើសិនគ្មានអូន