Tao ព្រមចាកចេញពីក្រុម EXO តាមបំណងឪពុក

2015-04-23 22:09:43
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅថ្ងៃទី២៣ ខែមេសានេះ ឪពុករបស់តារាចម្រៀង Tao សមាជិកក្រុម EXO បានទម្លាយប្រាប់សារព័ត៌មានចិន Sina ថាកូនប្រុសរបស់លោក បានយល់ព្រមចាកចេញពីក្រុមចម្រៀងកូរ៉េមួយនេះ តាមបំណងលោកហើយ។

ឪពុករបស់តារាចម្រៀងជនជាតិចិនរូបនេះ បានបញ្ជាក់ថាហេតុផលធំបំផុតដែលលោកចង់ឲ្យកូនប្រុសចាកចេញគឺ ដោយសារបញ្ហាសុខភាព ទាំងផ្លូវកាយ និងផ្លូវចិត្ត។ "រយៈពេល ៣ឆ្នាំបន្ទាប់ពីចូលក្រុម EXO Tao បានបង្ហាញខ្លួនក្នុងកម្មវិធីផ្សេងៗស្ទើរគ្មានពេលសម្រាក ដែលនាំឲ្យសុខភាពរបស់គេប្រឈមនឹងបញ្ហាច្រើន។ ខ្ញុំឈឺចិត្តណាស់ពេលឃើញក្រុមហ៊ុនមិនបានយកចិត្តទុកដាក់ត្រឹមត្រូវពេលកូនប្រុសរបស់ខ្ញុំមានរបួសដោយសារការសម្ដែងម្ដងៗ"។ ឪពុករបស់ Tao និយាយ។

លោកបានបន្តថា “លើកមុនពេលខ្ញុំទៅលេងប្រទេសកូរ៉េ និងព្យាយាមនាំកូនមកព្យាបាលនៅចិនវិញ ក្រុមហ៊ុនបានហៅខ្ញុំមកពិភាក្សាគ្នាពីអនាគតរបស់ Tao។ នៅពេលនោះខ្ញុំសប្បាយចិត្តណាស់ ដោយគិតថាពួកគេមើលឃើញពីការខិតខំប្រឹងប្រែងរបស់កូនប្រុសខ្ញុំ។ ប៉ុន្តែចុងបញ្ចប់គ្រប់យ៉ាងមិនកើតឡើងដូចអ្វីដែលគេនិយាយទេ។ ក្រោយមកខ្ញុំក៏សម្រេចចិត្តថាកូនប្រុសខ្ញុំត្រូវតែចាកចេញ។ វាជារឿងពិបាក និងឈឺចាប់ណាស់សម្រាប់ខ្ញុំក្នុងការសម្រេចចិត្តបែបនេះ។ Tao ស្រឡាញ់តន្ត្រី និងក្រុមរបស់គេណាស់។ បើទោះជាគេមិនទទួលបានការព្យាបាលត្រឹមត្រូវនៅពេលជួបគ្រោះថ្នាក់ របួសផ្សេងៗ ក៏គេមិនដែលបន្ទោសខាងក្រុមហ៊ុនម្ដងណាឡើយ។ ទោះយ៉ាងណា ក្នុងនាមជាឪពុក ខ្ញុំមិនអាចទ្រាំមើលកូនប្រុស ឡើងសម្ដែងលើឆាកទាំងមានរបួសតទៀតបានទេ"។

កាលពីម្សិលមិញនេះ ឪពុករបស់ Tao បានសរសេរសារដ៏វែងមួយលើបណ្ដាញសង្គម Weibo របស់ខ្លួន ដែលបង្ហាញពីបំណងឲ្យកូនប្រុសចាកចេញពីក្រុម EXO និងត្រលប់មករស់នៅជាមួយក្រុមគ្រួសារនៅប្រទេសចិនវិញ។ ដោយឡែកផលិតកម្ម SM Entertainment បាននិយាយថាបច្ចុប្បន្នគេកំពុងព្យាយាមពិភាក្សាជាមួយ Tao និងឪពុករបស់គេ ដើម្បីរកដំណោះស្រាយចំពោះបញ្ហានេះ។

ថាតើ Tao នឹងអាចចេញពីក្រុម EXO ដូច Kris និង Luhan ដែរឬយ៉ាងណា សូមរង់ចាំតាមដានជាមួយ Sabay បន្តទៀត ៕

ចុចអាន៖Kai សមាជិកក្រុម EXO សុំក្មេងស្រីអាយុ ៧ឆ្នាំរៀបការ

ប្រែសម្រួល៖ វ៉ាន់ថន ប្រភព៖ koreaboo ,allkpop