ទ្រព្យសម្បត្តិគូស្នេហ៍ Lee Min Ho និង Suzy បូកបញ្ចូលគ្នាបាន ៣០លានដុល្លារ

2015-04-24 13:05:41
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែងកូរ៉េ Lee Min Ho និង Suzy បានក្លាយជាគូស្នេហ៍ថ្មោងថ្មីមួយគូ ដែលទទួលបានការចាប់អារម្មណ៍យ៉ាងខ្លាំងពីសំណាក់អ្នកគាំទ្រ ដោយតារាទាំងពីររូប សុទ្ធតែអ្នកល្បីដូចគ្នា ហើយក៏ជាតារាលេចធ្លោដូចគ្នាដែរបើនិយាយពីរឿងហិរញ្ញវត្ថុ។ បើសរុបបញ្ចូលគ្នា ទ្រព្បសម្បត្តិរបស់អ្នកទាំងពីរមានចំនួន ៣០លានដុល្លារ។

តារាវ័យ ២៧ឆ្នាំ Lee Min Ho ត្រូវគេរំពឹងថាមានទ្រព្យសម្បត្តិសរុបចំនួន ២០លានដុល្លារ។ នៅក្នុងប្រទេសចិន តួឯករឿង "Gangnam Blues” រូបនេះអាចទទួលបានតម្លៃខ្លួនខ្ពស់ជាងនៅប្រទេសកំណើតរបស់ខ្លួន ដល់ទៅពីរឬបីដង។ តារាសម្ដែងរូបនេះអាចរកចំណូលបាន ៣លានដុល្លារក្នុងមួយឆ្នាំ ពីការថតបង្ហាញម៉ូដឲ្យផលិតផលផ្សេងៗ។

រីឯ Suzy វិញក្រៅពីជាតារាចម្រៀងក្នុងក្រុម miss A នាងក៏ជាតារាសម្ដែង និងម៉ូដែលលេចធ្លោម្នាក់ដែរ។ នាងត្រូវបានគេដឹងថាមានទ្រព្យសម្បត្តិចំនួន ១០លានដុល្លារ និងជាតារាឈានមុខគេក្នុងផលិតកម្ម JYP Entertainment។ បន្ទាប់ពីម្ចាស់មេដាយមាសអូឡាំពិកផ្នែកស្គីទឹកកក Kim Yuna តារាចម្រៀង Suzy គឺជាតារាស្រីលេចធ្លោក្នុងពិភពសិល្បៈកូរ៉េ និងធ្លាប់បានលេចមុខក្នុងឈុតពាណិជ្ជកម្មជាង ៣០ខុសៗគ្នា តាំងពីចាប់ផ្ដើមចូលសិល្បៈនៅឆ្នាំ២០១០។

កន្លងមកតារាកូរ៉េភាគច្រើនតែងបាត់បង់ប្រជាប្រិយបន្ទាប់ពីបែកធ្លាយព័ត៌មានស្នេហា ប៉ុន្តែសម្រាប់ Lee Min Ho និង Suzy វិញ ទីផ្សាររបស់ពួកគេកាន់តែកើនឡើងខ្ពស់បន្ទាប់ពីធ្លាយព័ត៌មាននេះ។ ថ្មីៗនេះ Lee Min Ho បានក្លាយជាតារាម៉ូដែលសម្រាប់ក្រុមហ៊ុនអេឡិចត្រូនិក LG ហើយក្រុមហ៊ុនមួយចំនួនដែល Suzy បានថតពាណិជ្ជកម្មឲ្យ ក៏បាននិយាយដែរថាមុខជំនួញរបស់ពួកគេកាន់តែដំណើរការល្អឡើង ក្រោយពីមានព័ត៌មាននេះ ៕

ចុចអាន៖Suzy បញ្ជាក់ឲ្យដឹងមូលហេតុដែលនាងស្រឡាញ់ Lee Min Ho

ប្រែសម្រួល៖ វ៉ាន់ថន ប្រភព៖hancinema