៧យ៉ាងធ្វើឲ្យស្នេហាដែលនៅឆ្ងាយគ្នា គង់វង្សយូរអង្វែង

2015-04-26 18:55:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាក្យចាស់លោកពោលថា "ឃ្លាតកាយ ណាយចិត្ត"។ មនុស្សស្រលាញ់គ្នាដែលរស់នៅឆ្ងាយពីគ្នា ប្រឈមមុខនឹងការបែកបាក់ ប្រសិនបើដៃគូណាម្ខាងមិនសូវជាបង្ហាញការយកចិត្តទុកដាក់ ឬមិនយល់ពីគ្នា។ ប៉ុន្តែក៏មិនមានន័យថាស្នេហានៅឆ្ងាយគ្នា មិនអាចទទួលបានជោគជ័យនោះដែរ។

ខាងក្រោមនេះ គឺជាវិធីសាស្ត្រ ៧យ៉ាង ដែលជួយឲ្យអ្នកមានស្នេហានៅឆ្ងាយគ្នា ស្រលាញ់គ្នាគង់វង្សយូរអង្វែងបាន៖

១. រក្សាទំនាក់ទំនងជាប្រចាំថ្ងៃ៖ នៅពេលដែលអ្នកមិនអាចឃើញគ្នា វាពិតជាសំខាន់ណាស់ ក្នុងការរក្សាទំនាក់ទំនងខាងផ្លូវអារម្មណ៍ ដូច្នេះក្នុងមួយថ្ងៃយ៉ាងហោចណាស់ក៏ត្រូវផ្ញើសារ ឬនិយាយទូរសព្ទជាមួយគ្នាឲ្យបានម្ដងដែរ។ អ្នកអាចផ្ញើ SMS, Chat តាម Facebook ឬមធ្យោបាយផ្សេងៗ ដែលធ្វើឲ្យដៃគូរបស់អ្នកយល់ថា អ្នកពិតជាយកចិត្តទុកដាក់ដល់គេខ្លាំងមែន។

២. រៀបចំពេលវេលាសម្រាប់ដៃគូ៖ បើអ្នកជាមនុស្សដែលរវល់ខ្លាំង រវល់នឹងការងារ ឬរវល់នឹងការសិក្សា អ្នកគួរតែប្រាប់គូស្នេហ៍របស់អ្នកតាមត្រង់ថា អ្នកពុំសូវមានពេលទំនេរច្រើនទេ។ ប៉ុន្តែអ្នកត្រូវតែរកពេលវេលាទំនេរខ្លីណាមួយ ដើម្បីផ្ញើជាសារ ឬនិយាយទូរស័ព្ទខ្លីៗជាមួយនាង ឬគាត់ ជាប្រចាំថ្ងៃ។

៣. ទៅលេងឲ្យបានញឹកញាប់៖ ព្យាយាមរកពេលវេលា ទៅលេងគូស្នេហ៍របស់អ្នកឲ្យបានច្រើនបំផុតតាមដែលអាចធ្វើទៅបាន ដើម្បីរក្សាទំនាក់ទំនងឲ្យកាន់តែស្និទ្ធស្នាល ព្រោះថាបើខានជួបមុខគ្នាដល់ទៅរាប់ឆ្នាំ ឬយូរពេក អាចនឹងធ្វើឲ្យគូស្នេហ៍របស់អ្នកនឿយណាយបាន។

៤. ព្យាយាមស្វែងយល់ពីគូស្នេហ៍៖ ពេលអ្នកនៅឆ្ងាយគ្នាយូរពេក ពេលខ្លះក៏អាចធ្វើឲ្យអ្នកមិនសូវជាដឹងពីទម្លាប់ ឬចំណង់ចំណូលចិត្តរបស់គូស្នេហ៍ខ្លួនច្រើនដែរ។ ដូច្នេះពេលជួបគ្នាម្តងៗ អ្នកត្រូវតែចំណាំថា គេចូលចិត្តធ្វើអ្វី ឬញ៉ាំអ្វី ហើយពេលជួបលើកក្រោយ អ្នកនឹងអាចធ្វើឲ្យគូស្នេហ៍របស់អ្នកភ្ញាក់ផ្អើលបាន ដោយអាចជូនជាកាដូរ ឬធ្វើអ្វីដែលរូបគេចូលចិត្តជាមួយគ្នា។

៥. ជួយគាំទ្រគ្នា ទោះនៅឆ្ងាយក៏ដោយ៖ អ្នកត្រូវតែគាំទ្រ ឬនៅខាងគូស្នេហ៍របស់អ្នកជានិច្ច នៅពេលដែលគេមានរឿង ឬជួបវិបត្តិអ្វីមួយ ហើយអ្នកត្រូវតែយកចិត្តទុកដាក់ ពិភាក្សា និងជួយលើកទឹកចិត្តដល់គូស្នេហ៍របស់អ្នកឲ្យបានច្រើន ទោះជាអ្នកនៅឆ្ងាយមិនបានមើលថែ តែក៏អាចនិយាយល្អៗ ដើម្បីឲ្យគេកក់ក្ដៅក្នុងចិត្ត។

៦. ជម្នះការធុញថប់៖ ការតប់ប្រមល់ធុញថប់ គឺជាផ្នែកមួយរបស់មនុស្ស ឬគូស្នេហ៍ទៅហើយ ជាពិសេសគឺគូស្នេហ៍ដែលនៅឆ្ងាយគ្នា តែយ៉ាងណាក្ដី អ្នកត្រូវតែជម្នះវាឲ្យបានទាំងអស់គ្នា ដោយរស់នៅជាមួយក្ដីសង្ឃឹមរួមគ្នា។

៧. ទុកចិត្តគ្នា៖ ចំណុចចុងក្រោយនេះសំខាន់ណាស់ ការជឿជាក់ និងការទុកចិត្តគ្នា គឺសំខាន់បំផុតសម្រាប់គូស្នេហ៍គ្រប់រូប មិនថានៅជិត ឬឆ្ងាយឡើយ។ ប៉ុន្តែបើអ្នកទាំងពីរនៅឆ្ងាយពីគ្នា អ្នកត្រូវតែជឿជាក់លើគូស្នេហ៍របស់អ្នក និងធ្វើទង្វើឲ្យគូស្នេហ៍របស់អ្នកជឿជាក់លើអ្នកវិញថា អ្នកពិតជាស្រលាញ់តែគេម្នាក់គត់មែន៕

តើប្រិយមិត្តយល់ស្របតាមចំណុចខាងលើនេះ ឬមានអ្វីចង់បន្ថែមដែរទេ?

-ចុចអាន៖ សញ្ញា៦យ៉ាងបញ្ជាក់ថាមិត្តប្រុសចង់រៀបការជាមួយអ្នក

ប្រែសម្រួល៖ វិន ជីវ័ន្ត ប្រភព៖ Wikihow