Gerrard និង Lampard ឈ្នះពានកិត្តិយស មុនចេញទៅលីក MLS

2015-04-27 18:49:15
ចំនួនមតិ 0 | ចំនួនចែករំលែក 0

ចន្លោះមិនឃើញ

អតីតខ្សែបម្រើជម្រើសជាតិអង់គ្លេស២រូប Steven Gerrard និង Frank Lampard បានឈ្នះពានរង្វាន់កិត្តិយស PFA Merit កាលពីម្សិលមិញ មុនពេលដែលកីឡាករទាំង២រូបនេះ ចាកចេញពី Premier League ទៅលេងនៅលីកអាមេរិក Major League Soccer ក្រោយចប់រដូវកាលនេះ។

Gerrard និង Lampard គឺជាកម្លាំងដ៏សំខាន់សម្រាប់ក្រុមជម្រើសជាតិអង់គ្លេស ដែលត្រូវបានគេហៅថាជា "រជ្ជកាលមាស" ខណៈដែលអ្នកទាំង២នេះបង្ហាញខ្លួនឲ្យអង់គ្លេសសរុបរួមបញ្ចូលគ្នា បានដល់ទៅ ២២០ប្រកួត។

ប្រធានក្រុមហង្សក្រហម Liverpool (Gerrard) បាននិយាយចំពោះដៃគូមិត្តរួមជាតិ Lampard ថា៖ "យើងលេងរួមគ្នាជាមួយក្រុមជម្រើសជាតិអង់គ្លេសយូរណាស់មកហើយ ហើយខ្ញុំពិតកោតសរសើរដល់ Frank ខ្លាំងណាស់ ចំពោះទម្រង់លេង និងភាពជោគជ័យរបស់គាត់នៅក្រុម Chelsea។ គាត់ជាកីឡាករម្នាក់លំដាប់ពិភពលោក។ ខ្ញុំរីករាយណាស់ ដែលបានទទួលរង្វាន់នេះ ព្រោះវាជាសមិទ្ធផលដែលអ្នកបានធ្វើ តាំងពីខ្ញុំនៅក្មេង ហើយខ្ញុំពិតជាខិតខំខ្លាំងណាស់ ទម្រាំបានមកដល់ថ្ងៃនេះ"។

រីឯអតីតកីឡាករក្រុម Chelsea (Lampard) បាននិយាយថា៖ "ខ្ញុំរីករាយណាស់ ព្រោះវាជាកិត្តិយសដ៏អស្ចារ្យមួយ។ ខ្ញុំចំណាយពេលជាច្រើនលេងនៅ Premier League ហើយ Gerrard ក៏ដូចគ្នា។ ខ្ញុំគោរពដល់ Gerrard ខ្លាំងណាស់ ទោះបីជាយើងទាំង២ប្រកួតតទល់គ្នាក្រុមផ្សេងគ្នា ពេលខ្លះ១ឆ្នាំប៉ះគ្នា៦ដងក៏មាន បើបានលេង Champions League ប៉ុន្តែគាត់នៅតែជាមិត្តភក្តិដ៏ល្អរបស់ខ្ញុំ ហើយយើងតែងរីករាយជាមួយគ្នា ពេលលេងឲ្យក្រុមជម្រើសជាតិអង់គ្លេស"។

យ៉ាងណាក្តី កីឡាករទាំង២នេះ នឹងទៅលេងនៅលីក MLS របស់អាមេរិក ក្នុងក្រុមផ្សេងគ្នា និងប្រជែងគ្នាទៀត ខណៈដែល Gerrard នឹងបញ្ចប់អាជីព១៧ឆ្នាំរបស់ខ្លួនជាមួយ Liverpool ផ្ទេរទៅកាន់ក្លិប LA Galaxy រីឯ Lampard នឹងបញ្ចប់កិច្ចសន្យាខ្ចីជើងជាមួយ Manchester City ហើយត្រឡប់ទៅកាន់ក្លិបដែលទើបតែបង្កើតថ្មី New York City FC ក្រោយចប់រដូវកាលនេះដូចគ្នា៕

-ចុចអាន៖ Gerrard នឹងរស់នៅក្នុងវិមានតម្លៃជិត២៥លានដុល្លារ នៅអាមេរិក

ប្រែសម្រួល៖ វិន ជីវ័ន្ត ប្រភព៖ Daily Mail