ឪពុក Floyd ចង់ឱ្យកូនចូលនិវត្តន៍បន្ទាប់ពីប្រកួតជាមួយ Pacquiao

2015-04-28 16:55:08
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Floyd Mayweather Sr. ត្រូវជាឪពុករបស់កីឡាករ Floyd Mayweather Jr. បាននិយាយថា លោកចង់ឱ្យកូនចូលនិវត្តន៍ពីកីឡាប្រដាល់បន្ទាប់ពីប្រកួតជាមួយ Manny Pacquiao រួច ទោះជាលទ្ធផលចេញមកចាញ់ឬឈ្នះក៏ដោយ។

លោក Floyd Mayweather Snr ត្រូវជាឪពុករបស់កីឡាករ Floyd Mayweather Jr

ឪពុក Floyd មានជំនឿចិត្តណាស់ថា កូនរបស់លោកនឹងអាចផ្ដួលអ្នកខ្លាំងនៅអាស៊ី Pacman នេះបាននៅថ្ងៃទី២ ខែឧសភាខាងមុខនេះ។ ប៉ុន្តែទន្ទឹមនឹងការមានសង្ឃឹមខ្ពស់នេះដែរ លោកក៏ចង់ឱ្យកូនឆាប់ចូលនិវត្តន៍ ព្រោះការប្រដាល់មិនមែនជាអាជីពមួយជីវិតនោះទេ។ "ខ្ញុំសង្ឃឹមថា Floyd នឹងឆាប់ចូលនិវត្តន៍បន្តិច។ នេះជាល្បែងភ្នាល់ ហើយខ្ញុំមិនចង់ឱ្យគេប្រឡូកក្នុងវិស័យនេះយូរពេកនោះទេ។ ពេលណាអ្នកបានអ្វីដែលចង់បានគ្រប់គ្រាន់ហើយ អ្នកមិនគួរនៅយូរទេ។ ខ្ញុំមានទំនុកចិត្តថា កូនខ្ញុំនឹងដើរចេញពីសង្វៀនបន្ទាប់ពីប្រកួតធំជាងគេក្នុងប្រវត្តិសាស្ត្រនេះចប់”។ បុរសវ័យ៦២ឆ្នាំបានប្រាប់ទៅសារព័ត៌មាន The Sun។

បន្ទាប់ពីនិយាយពីកូនរបស់លោកចប់ អតីតអ្នកប្រដាល់អំឡុងឆ្នាំ១៩៧០ដល់១៩៨០ ខាងលើនេះ បាននិយាយពី Pacquiao ដែរថា អ្នកប្រដាល់សញ្ជាតិហ្វីលីពីនរូបនេះពិតជាមានសមត្ថភាពល្អមែន ប៉ុន្តែមិនទាន់ដល់កម្រិតរបស់ Floyd ឡើយ។

លោក Floyd Mayweather Snr គឺជាអ្នកប្រដាល់ជើងចាស់ម្នាក់ ដែលមានប្រវត្តិល្អខ្លាំងផងដែរ គឺប្រកួត៣៥ដង ឈ្នះ២៨ដង(ផ្ដួលគូប្រកួតឱ្យសន្លប់ ១៨ដង) ស្មើ ១ដង និងចាញ់៦ដង ៕

ចុចអាន៖ សំបុត្រចូលមើលការប្រកួត Floyd Vs Pacquiao ចេញលក់ផ្លូវការហើយ

ប្រែសម្រួល៖ មុន្នី រម្យ ប្រភព៖ espn