៤ យ៉ាង អ្នកតែងតែយល់ច្រឡំថា គេក៏ស្រលាញ់យើងដែរ

2015-04-29 15:49:34
ចំនួនមតិ 0 | ចំនួនចែករំលែក 0

ចន្លោះមិនឃើញ

រឿងរ៉ាវស្នេហាមានពេលខ្លះធ្វើឲ្យអ្នកយល់ច្រឡំ ដោយសារតែសកម្មភាពផ្សេងៗ និង ការគិតស្មាន ទាំងដែលភាគីម្ខាងទៀតអត់ដឹងអ្វីសោះ នេះក៏ព្រោះតែគ្រប់យ៉ាងអ្នកស្រមើលស្រមៃម្នាក់ឯង។

ខាងក្រោមនេះ Sabay នឹងបង្ហាញបួនចំណុច ដែលអ្នកអាចយល់ច្រឡំលួចគិតតែឯងពីស្នេហាថា គេស្រលាញ់អ្នក ៖

រូបតំណាង

ឲ្យតែលួចស្រលាញ់គេ គិតថា គេលួចស្រលាញ់ខ្លួនឯងដែរ

"បើកំពុងលួចស្រលាញ់នរណាម្នាក់ហើយគិតថា គេក៏ស្រលាញ់អ្នកដែរ បែបនេះអ្នកគិតខុសហើយ"។ បូរ៉ា អាយុ ២០ ឆ្នាំ និស្សិតសាកលវិទ្យាល័យភ្នំពេញអន្តរជាតិ និយាយ។ មនុស្សភាគច្រើនតែងតែមានកូនអារម្មណ៍គិតបែបនេះឲ្យតែលួចស្រលាញ់គេ គិតថាគេលួចស្រលាញ់វិញដែរ តែតាមពិត គឺគិតខុសតែម្នាក់ឯង។

និស្សិតសិក្សាជំនាញ ច្បាប់ ឆ្នាំទី ២ បន្តថា "មិនខុសអីពីមិត្តភ័ក្ដិខ្ញុំម្នាក់ដែរ លួចស្រលាញ់អ្នករៀនជាមួយគ្នា ហើយគិតថា គេក៏លួចពេញចិត្តវិញ តែតាមពិតខាងគេអត់ដឹងអីសូម្បីបន្តិច។ ពួកម៉ាកខ្ញុំប្រាប់ថា មកពីឃើញគេធ្វើល្អដាក់ ហើយទៅណាមកណាឲ្យតែជួបដឹងតែញញឹមរក ដល់តែអ៊ីចឹង មិត្តខ្ញុំក៏តាំងគិតថាច្បាស់ណាស់ ១០០% គេកំពុងលួចស្រលាញ់ដែរ។ ដល់ពេលសារភាពប្រាប់គេ ម្នាក់ស្រីនោះថា គេមិនបានស្រលាញ់វិញឡើយ ហើយអ្វីដែលនារីនោះធ្វើ គឺគេធ្វើបែបនេះដាក់គ្រប់គ្នាទេ"។

លួចស្រលាញ់គេម្នាក់ឯង ដល់ឃើញគេpostអ្វី គឺសំដៅមកលើខ្លួនទាំងអស់

កិត្យា និស្សិតជំនាញ IT សាកលវិទ្យាល័យមួយ ប្រាប់ថា អ្នកលួចស្រលាញ់គេ តែងគិតថា គ្រប់យ៉ាងអ្វីដែលគេបង្ហាញ ឬនិយាយសុទ្ធតែសំដៅមកលើខ្លួនទាំងអស់។ ដូចជា សម័យឥលូវគេនិយមលេង Facebook ហើយឲ្យតែឃើញគេ post អី ដឹងតែរើស Status នោះយកទុកខ្លួនឯង ហើយបើគេ post ពី status ស្នេហាទៀត គឺរំភើបគិតតែម្នាក់ឯងថា status នោះសំដៅមកលើខ្លួនជាក់ជាមិនខាន។

រូបតំណាង

យុវជនអាយុ ២១ ឆ្នាំរូបនេះបន្តថា អ្នកដែលលួចស្រលាញ់គេ ភាគច្រើនតែងលួចចូលទៅមើល Profile គេជាញឹកញយ ហើយបើឃើញ Status បែបស៊ីអារម្មណ៍ដែលនិយាយពីអត្ថន័យស្នេហាទៀត កាន់តែគិតថា គេសំដៅមកលើខ្លួន។ លុះក្រោយមក ក៏ខកចិត្តពេលឃើញគេដាក់ In a relationship ជាមួយអ្នកផ្សេង បានភ្ញាក់ខ្លួនថា គ្រប់យ៉ាងយល់ច្រឡំខ្លួនឯង តាមពិតគេសំដៅអ្នកផ្សេងសោះ។

គ្រាន់និយាយលេងជាមួយច្រើន គិតថា គេកំពុងលួចស្រលាញ់ហើយ

យុវសិស្ស ស៊ុន ណារី សិស្សថ្នាក់ទី ១១ វិទ្យាល័យច្បារអំពៅ និយាយថា រឿងមួយទៀតដែលមនុស្សស្ទើរគ្រប់គ្នាតែងច្រឡំ គេកំពុងបាក់ចិត្តស្រលាញ់គឺនៅពេលឃើញគេតែងឧស្សាហ៍មកនិយាយលេងមុន ឬសួរសុខទុក្ខពីនេះពីនោះ ឲ្យតែជួបមុខពេលណាដឹងតែមានរឿងនិយាយសួរនាំរហូត។

នាងបន្តថា ៖ "អ្នកខ្លះ លួចគិតស្រមៃម្នាក់ឯងថា គេប្រហែលលួចចាប់ចិត្តលើយើងហើយ បានជាជួបពេលណាសំបូររឿងសួរនាំមិនឈប់ដូច្នេះនោះ។ ប៉ុន្តែតាមពិតគេមិនបានគិតអ្វីក្រៅពីមិត្តភ័ក្ដិ ដោយសារវាអាចជាស្ទីលរបៀបទំនាក់ទំនងរបស់គេជាមួយមនុស្សជុំវិញឬអ្នកទើបស្គាល់គ្នាថ្មីៗ ក៏ថាបាន"។

អផ្សុកពេកមិនដឹងធ្វើអ្វី លេង FB ជាមួយច្រើន បែរជាលង់គិតថា គេស្រលាញ់

សារ៉ានី និស្សិតបញ្ចប់ថ្នាក់បរិញ្ញាបត្រផ្នែកគ្រប់គ្រង នៅសាកលវិទ្យាល័យជាតិគ្រប់គ្រង ប្រាប់ថា៖ "ពេលយើងលួចស្រលាញ់នរណាម្នាក់ មិនប្រាកដថា គេកំពុងគិតបែបនេះដូចយើងឡើយ។ ពេលខ្លះ សកម្មភាពបង្ហាញពីភាពស្និទ្ធស្នាល មិនអាចបញ្ជាក់គ្រប់គ្រាន់ថាគេលួចស្រលាញ់យើងវិញឡើយ។ ជួនកាល វាអាចមកពីកត្តាអ្វីផ្សេង ដែលជាមូលហេតុគេមកធ្វើបែបនេះ ដែលយើងគិតមិនដល់"។

អតីតនិស្សិតរូបនេះ ថា អ្នកខ្លះយល់ច្រឡំការស្រលាញ់តាមរយៈចុចlike និង Comment ច្រើន។ ឲ្យតែpost អី ដឹងតែឃើញមានឈ្មោះគេមកចុចlike ឬចូលមក Comment ឆ្លើយឆ្លងជាមួយមិនដែលដាច់ ធ្វើឲ្យចិត្តសប្បាយ រួចលួចគិតម្នាក់ឯងថា គេប្រហែលចាប់អារម្មណ៍មកលើហើយ បានជាតាមដានសឹងតែគ្រប់ status ហើយ like និង Comment មិនដែលខានអ៊ីចឹង តែតាមពិតម្នាក់នោះអាចជាមនុស្សអផ្សុកញៀននឹងលេង Facebook សោះក៏ថាបាន ។

សម្រាប់មិត្តយុវវ័យវិញ យល់ថានៅសល់ចំណុចណាទៀតដែលអាចជាការយល់ច្រឡំគិតម្នាក់ឯងថា គេកំពុងលួចស្រលាញ់?

សូមអាន ៧យ៉ាងធ្វើឲ្យស្នេហាដែលនៅឆ្ងាយគ្នា គង់វង្សយូរអង្វែង អត្ថបទ៖ លឹម សុនា