ភរិយា Beckham បញ្ចូលគំនិតអ្វីខ្លះ ពេលរចនា Range Rover?

2015-04-29 18:33:53
ចំនួនមតិ 0 | ចំនួនចែករំលែក 0

ចន្លោះមិនឃើញ

បើក្រឡេកទៅមើលរថយន្ត Range Rover Evoque ស៊េរីឆ្នាំ ២០១២ ដែលត្រូវបានរចនាដោយលោកស្រី Victoria Beckham ជាអ្នករចនាម៉ូដដ៏ល្បី និងជាភរិយាអតីតកីឡាករបាល់ទាត់ពិភពលោក David Beckham គឺពិតជាមានរាងប្លែកប្រកបដោយការច្នៃប្រឌិត ហើយទទួលការចាប់អារម្មណ៍ជាខ្លាំងពីសំណាក់មនុស្សជាច្រើន តាំងពីពេលដែលរថយន្តមួយនេះ បង្ហាញខ្លួននៅពិព័រណ៌ក្រុងប៉េកាំងក្នុងឆ្នាំ២០១២។

មុនពេលចាប់ផ្តើមដេគ័ររថយន្តនេះឡើង លោកស្រី Victoria Beckham បានគិតដល់ការរចនាយកលំនាំតាមម៉ូដរថយន្តស៊េរីចាស់ៗ (Classic Car) កប៉ាល់លំហែកាយទំនើបៗ និងម៉ូដយន្តហោះបែបស៊ីវិល័យជាដើម ហើយក៏រចនាម៉ូដគ្រឿងយន្តទាំងអស់នោះចូលគ្នា។ លោកស្រីចង់រចនារថយន្ត Range Rover នេះឱ្យមានភាពស៊ីវិល័យ និងធ្វើឱ្យអ្នកដំណើរខាងក្នុងរថយន្តទាំងអស់ មានអារម្មណ៍ថាពិសេស និងមានផាសុកភាពបំផុត។

ចំពោះផ្នែកផ្សេងៗទៀតនៅលើតាប្លូរថយន្ត ដែលមានពណ៌មាសក្រហម គឺយកលំនាំតាមពណ៌របស់នាឡិកាដៃប្រណិត Daytona Rolex ដែលលោកស្រីតែងតែពាក់។ កៅអីអង្គុយក្នុងរថយន្តដែលស្រោបដោយស្បែកពិសេស ប្រើថ្នេរដេរ យកលំនាំតាមបាល់សម្រាប់លេងកីឡាបាល់បោះ ដើម្បីឱ្យ Beckham នឹកឃើញវេលាគ្រួសាររបស់លោក កាលនៅរដ្ឋកាលីហ្វ័រញ៉ា សហរដ្ឋអាមេរិក។

Victoria រចនាកម្រាលដ៏ទន់របស់រថយន្ត Range Rover Evoque ដោយឆ្លុះបញ្ចាំងពីអនុស្សាវរីយ៍កាលពីកុមារភាព ដែលនាងបានដើរលើកម្រាលប្រណិតក្នុងរថយន្ត Rolls Royce របស់ឪពុកនាង ដោយជើងទទេ។

រថយន្ត Range Rover Evoque រចនាដោយភរិយាលោក David Beckham នេះ មានកម្លាំងម៉ាស៊ីន ២៤០សេះ ដែលត្រូវបានផលិតតែចំនួន ២០០គ្រឿងប៉ុណ្ណោះ ហើយដាក់លក់នៅចិនក្នុងតម្លៃប្រហែល ១៣ម៉ឺនដុល្លារ៕