Floyd ឡើងវ៉ៃមួយប្រកួតទៀតមុនចូលនិវត្តន៍ តែមិនដឹងប៉ះនរណា

2015-05-04 21:33:28
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាករ Floyd Mayweather បានបញ្ជាក់ថានឹងចូលនិវត្តន៍បន្ទាប់ពីឡើងសង្វៀន១ប្រកួតទៀតនៅខែកញ្ញាខាងមុខនេះ ប៉ុន្តែរឿងដៃគូក្នុងប្រកួតចុងក្រោយនោះ មិនទាន់ប្រាកដថាជានរណានោះទេ។

Mayweather កាលពីម្សិលមិញនេះ បានយកឈ្នះកំពូលអ្នកប្រដាល់ហ្វីលីពីន Manny Pacquiao ដោយពិន្ទុ ហើយជ័យជម្នះនោះដែរ បានធ្វើឱ្យរូបគេរក្សាកំណត់ត្រាមិនដែលចាញ់ ក្នុងការប្រកួតអាជីពផ្លូវការ៤៨ប្រកួតកន្លង។

បន្ទាប់ពីការប្រកួតធំជាងគេក្នុងប្រវត្តិសាស្ត្រប្រដាល់នេះដែរ កីឡាករវ័យ៣៨ឆ្នាំរូបនេះបានបញ្ជាក់ពីអាជីពជាអ្នកប្រដាល់នេះដែរថា នឹងបញ្ចប់នៅខែកញ្ញាខាងមុខនេះហើយ ពោលគឺរូបគេនឹងឡើងសង្វៀនប្រកួតម្ដងទៀត ហើយចូលនិវត្តន៍តែម្ដង ទោះប្រកួតនោះចាញ់ឬឈ្នះក៏ដោយ។ "ប្រកួតចុងក្រោយរបស់ខ្ញុំគឺនៅខែកញ្ញា ហើយបន្ទាប់ពីនោះខ្ញុំឈប់ប្រកួតហើយ។ ខ្ញុំមានអាយុជិត៤០ឆ្នាំ ហើយឡើងប្រដាល់ក៏ជិត១៩ឆ្នាំដែរ ដូច្នេះគួរតែដល់ពេលចូលនិវត្តន៍ហើយ”។ សម្ដី Floyd និយាយក្រោយយកឈ្នះ Pacman។

ត្បិតតែមានព័ត៌មានខាងលើនេះលេចឡើងមែន ប៉ុន្តែចំពោះដៃគូដែលត្រូវប្រកួតនៅខែកញ្ញានោះគឺមិនទាន់ដឹងថានរណាឱ្យពិតប្រាកដនោះទេ។ ខណៈដែលអ្នកខ្លះយល់ថាអាចជា Pacquiao ឡើងវាយសងសឹក ហើយខ្លះទៀតថាអាចជាដល់វេនរបស់ Amir Khan ដែលមានបំណងចង់វាយជាមួយ Floyd ជាយូរមកហើយនោះម្ដង៕