Floyd ត្រូវអតីតសង្សារប្ដឹងទារលុយ២០លានដុល្លារ

2015-05-06 22:44:23
ចំនួនមតិ 0 | ចំនួនចែករំលែក 0

ចន្លោះមិនឃើញ

Josie Harris អតីតសង្សាររបស់ Floyd Mayweather បានសើរើរឿងក្ដីដែលរូបនាងត្រូវកំពូលអ្នកប្រដាល់អាមេរិកវាយដុំកាលពីឆ្នាំ២០១០ ហើយការរករឿងជាថ្មីនេះដែរ រូបនាងទាមទារសំណងជាប្រាក់សុទ្ធ២០លានដុល្លារអាមេរិក។

បើគិតត្រលប់ក្រោយបន្តិចវិញ Floyd មានសង្សារម្នាក់ឈ្មោះ Josie Harris ហើយពួកគេរស់នៅជាមួយគ្នាជាច្រើនឆ្នាំរហូតបានកូន៣នាក់។ លុះមកដល់ឆ្នាំ២០១០ ទំនាក់ទំនងស្នេហារវាងអ្នកទាំងពីរក៏ដល់ទីបញ្ចប់ បន្ទាប់ពី Floyd កើតរោគប្រចណ្ឌប្រពន្ធខ្លាំងពេក រហូតដល់មានថ្ងៃមួយរូបគេស្រវឹងមកដល់ផ្ទះវិញ ចាប់ Josie បោចសក់ ដាល់មុខនៅចំពោះមុខកូនៗ។ គ្រានោះហើយ ដែលនារីវ័យ៣៥ឆ្នាំរូបនេះទ្រាំពុំបានក៏ហៅប៉ូលិសមកចាប់ Floyd ចូលគុកតែម្ដង ពីបទប្រើអំពើហិស្សាលើគ្រួសារ។

ក្រោយពីនោះមក ដោយសារតែអ្នកប្រដាល់មិនដែលចាញ់ខាងលើនេះមានប្រាក់គ្រប់គ្រាន់សម្រាប់លោះខ្លួន ក៏រូបគេអាចចេញពីគុកបាន ប៉ុន្តែរឿងក្ដីជម្លោះក្នុងគ្រួសារនេះនៅតែមិនទាន់កាត់សេចក្ដីឱ្យស្រេចបាច់នៅឡើយទេ រហូតមកដល់បច្ចុប្បន្ននេះព្រោះខាងអ្នកស្រី Josie មិនសូវមានប្រាក់តតាំងក្ដី។ ខណៈដែលពេលនេះ ក៏មានដំណឹងជាថ្មីមកទៀតថា ស្រ្ដីមេម៉ាយត្រូវចិញ្ចឹមកូន៣នាក់រូបនេះកំពុងតែដាក់ពាក្យបណ្ដឹងជាថ្មីដើម្បីទទួលបានប្រាក់២០លានដុល្លារអាមេរិក ក្នុងនាមជាអ្នកមើលថែកូនទាំង៣នាក់។ នេះបើតាមអ្នកកាសែតអាមេរិក Katie Couric បាននិយាយ។

សូមរំលឹកថា បច្ចុប្បន្ននេះដែរអតីតប្រពន្ធកំពូលអ្នកប្រដាល់លុយចាយមិនអស់ខាងលើដែលបានដាក់ពាក្យបណ្ដឹងនេះគឺរស់នៅតំបន់ដាច់ស្រយាលមួយនៅភាគខាងជើងទីក្រុង Las Vegas ដែលមានចម្ងាយដល់ទៅ៨០គីឡូម៉ែត្រឯណោះ ហើយកូនទាំង៣នាក់ Koraun, Zion and Jirah ក៏រស់នៅជាមួយអ្នកស្រីដែរ៕

ចុចអាន៖Pacquiao កំពុងធ្លាក់ចូលទឹកក្ដៅហើយ ព្រោះអាចជាប់គុក៤ឆ្នាំផង អ្នកគាំទ្រប្ដឹងផង

ប្រែសម្រួល៖ មុន្នី រម្យ ប្រភព៖ eonline