តួឯកក្នុងវីដេអូគ្លីបផ្ទុះសំណើចពេញបណ្តាញសង្គម ហាន គីមហាំ មានប្រវត្តិតស៊ូយ៉ាងណា?

2014-10-09 23:56:14
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកប្រើប្រាស់បណ្តាញសង្គមមិនតិចទេ បានផ្ទុះសំណើច និងកោតសរសេើគ្រប់ៗគ្នា ពីភាពក្លាហានរបស់យុវជនម្នាក់ ហ៊ានឡើងនិយាយចំណាប់អារម្មណ៍ផ្ទាល់ខ្លួន និងទស្សនៈកែលម្អរមួយចំនួន ក្នុងនាមអ្នកសង្កេតការណ៍ ស្ម័គ្រចិត្តប្រលងសញ្ញាបត្របាក់ឌុប លើកទី១ នៅចំពោះមុខរដ្ឋមន្រ្តីក្រសួងអប់រំ យុវជន និងកីឡា និង ឯកឧត្តមទេសរដ្ឋមន្រ្តី ឱម យ៉ិនទៀង ប្រធានអង្គភាពប្រឆាំងអំពើពុករលួយ រួមទាំងសិស្សនិស្សិត និងបញ្ញាវនជាច្រើននាក់។ ថ្វីមាត់ និងរបៀបនៃការនិយាយ នាំឲ្យអ្នកប្រើប្រាស់បណ្តាញសង្គមមួយចំនួនដាក់ងារជារដ្ឋមន្រ្តីវ័យក្មេង។ ចង់ដឹងយុវជនរូបនេះឈ្មោះអ្វី ? ការសិក្សា និងមានស្រុកកំណើតនៅឯណា? Sabay បានធ្វើបទសម្ភាសជាមួយ នឹងយុវជនរូបនេះដូចតទៅ៖

Sabay ៖ តើអាចជម្រាបឈ្មោះ និងជីវប្រវត្តិផ្ទាល់ខ្លួនដល់មិត្តអ្នកអានបានទេ?

ហាន គីមហាំ ៖ បាទ! ខ្ញុំឈ្មោះ ហាន គីមហាំ អាយុ ១៨ ឆ្នាំ។ មានស្រុកកំណើត នៅភូមិកែវស្នា ឃុំព្រៃឃ្នេស ស្រុកមេសាង ខេត្តព្រៃវែង។ ខ្ញុំជាកូនច្បងក្នុងចំណោមបងប្អូន៤ នាក់។ ចំណែកឪពុកម្តាយ ជាកសិករ។ ប៉ុន្តែតាំងពីតូចមកគាត់តែងជម្រុញកូនឲ្យសិក្សាជានិច្ច។

Sabay ៖ តើ គីមហាំ ប្រលងបាក់ឌុបនៅឆ្នាំណា និងមានប្រវត្តិសិក្សាយ៉ាងណាដែរ?

ហាន គីមហាំ ៖ បាទ! ខ្ញុំប្រលងបាក់ឌុបកាលពីឆ្នាំ២០១៣ ទទួលបាននិទ្ទេស B លំដាប់ពិន្ទុ៩៨។ ខ្ញុំជាអតីតសិស្សពូកែខ្មែរថ្នាក់ទី៩ និងជាអតីតសិស្សពូកែខ្មែរថ្នាក់ទី១២ ទូទាំងខេត្តព្រៃវែង។ បច្ចុប្បន្នខ្ញុំជានិស្សិតអាហារូបករណ៍ នៅសាកលវិទ្យាល័យភូមិន្ទនិត្តិសាស្រ្ត និងវិទ្យាសាស្រ្តសេដ្ឋកិច្ចឆ្នាំទី២ ជំនាញរដ្ឋបាលសាធារណៈ។ ខ្ញុំស្នាក់នៅអង្គការគ្រិស្តបរិស័ទមួយ មានទីតាំងស្ថិតនៅបឹងទំពុន ដោយអង្គការបានផ្តល់កន្លែងស្នាក់នៅ និងរ៉ាប់រងលើការហូបចុក។

Sabay ៖ ក្នុងនាមយុវជនម្នាក់តើ គីមហាំ ធ្លាប់ចូលរួមការងារសង្គមអ្វីខ្លះ?

គីមហាំ៖ ខ្ញុំធ្លាប់ចូលរួមជាយុវជនស្ម័ក្រចិត្តសង្កេតការណ៍ប្រលងបាក់ឌុបលើកទី១ កន្លងមក ដែលខ្ញុំគិតថានេះ គឺជាជោគជ័យ ក្នុងដំណើរការកំណែទម្រង់របស់ក្រសួងអប់រំយុវជន និងកីឡា ហើយលើកទី២នេះ ខ្ញុំក៏បានចូលរួមសង្កេតការណ៍ផងដែរ។ កាលនៅវិទ្យាល័យខ្ញុំជាសមាជិកម្នាក់នៅសមាគមកាយរិទ្ធិកម្ពុជា និងជាសមាជិកគាំទ្រចូលរួមវិភាគទាន ថវិកាតិចតួចដល់កាកបាតក្រហមកម្ពុជា។ ម្យ៉ាងខ្ញុំគិតថា កាកបាទក្រហមកម្ពុជាគឺជាស្ថាប័នមនុស្សធម៌មួយជួយដល់ជនក្រីក្រ គ្រោះទឹកជំនន់ គ្រោះអគ្គីភ័យ អញ្ចឹងទោះតិចក្តីច្រើនគឺជាការរួមចំណែកមួយជួយដល់សង្គម។

Sabay ៖ តើការផ្លាស់មកសិក្សានៅភ្នំពេញជួបការលំបាក និងភាពងាយស្រួលយ៉ាងណាដែរ?

គីមហាំ៖ ការសិក្សា នៅរាជធានីភ្នំពេញ គឺត្រូវចំណាយច្រើន ក្នុងនោះមានការហូបចុក និងសម្ភារៈសិក្សាជាដើម។ ខ្ញុំត្រេកអរ ដែលអង្គការគ្រឹះបរិស័ទបានជួយខ្ញុំ មួយចំណែកធំ មានការហូបចុក ស្នាក់នៅ និងការព្យាបាលប្រសិនបើខ្ញុំមានជំងឺល្មមៗ។ ដូច្នេះខ្ញុំគិតថា វត្តមានរបស់អង្គការគ្រឹះបរិស័ទ ពិតជាដើរតួនាទីសំខាន់ណាស់ ក្នុងការជួយដល់និស្សិតក្រីក្រីខ្មែរជាច្រើន។ រៀនដល់ឆ្នាំទី២ ហើយ ខ្ញុំមិនទាន់មានកុំព្យូទ័រប្រើហ្នឹងគេទេ។ ចំណែកមធ្យោបាយធ្វើដំណើរគឺជិះកង់។

Sabay ៖ អ្នកប្រើប្រាស់បណ្តាញសង្គម Facebook ជាច្រើនបានកោតសរសើរ ចំពោះភាពក្លាហាន របស់ គីមហាំ ក្នុងនាមយុវជនម្នាក់ហានលើកឡើងពីបញ្ហាប្រឈម និងមតិរិះគន់ ក្នុងន័យកែលម្អ នៅចំពោះមុខ ឯកឧត្តមរដ្ឋមន្រ្តីអប់រំ និងឯកឧត្តមប្រធានអង្គភាពប្រឆាំងអំពើពុករលួយ។ ជាថ្មីម្តងទៀត តើ គីមហាំ គិតថាចំណុចលើកឡើងមានភាពចាំបាច់យ៉ាងណា?

គីមហាំ៖ ខ្ញុំគិតថាចំណុច ដែលបានលើកឡើងគឺមានសារៈសំខាន់បំផុត ព្រោះការកែទម្រង់មិនមែនធ្វើតែត្រឹមកម្រិតមធ្យមសិក្សានោះទេ។ យើងត្រូវតែធ្វើតាំងពីថ្នាក់ក្រោម រហូតដល់ថ្នាក់ឧត្តមសិក្សា ទើបទទួលបានជោគជ័យខ្ពស់។ ដូច្នេះដើម្បីទទួលបានជោគជ័យខ្ពស់ យើងក៏ត្រូវគិតគួរដល់ប្រាក់បៀវត្ស៍របស់គ្រូបង្រៀនឲ្យគាត់រស់នៅ ក្នុងជីវភាពមួយសមរម្យ ព្រមទាំងមានការចូលរួមជម្រុញពីផ្នែកពាក់ព័ន្ធ ក្នុងកំណែទម្រង់នេះផងដែរ។

Sabay ៖ ជាយុវជនម្នាក់រស់នៅទីជនបទដាច់ស្រយាល និងគ្រួសារលំបាកខ្លាំង តើកត្តាអ្វីខ្លះ ដែលនាំ គីមហាំ ជន្នះការលំបាកទាំងនេះ ហើយ តស៊ូមកបន្តការសិក្សានៅរាជធានីភ្នំពេញ?

គីមហាំ៖ ដូចសុភាសិតខ្មែរមួយឃ្លាមួយបានលើកឡើងថា "ល្ងង់នាំឲ្យក្រ តែក្រនាំឲ្យល្ងង់ជាការមិនពិត” អញ្ចឹងខ្ញុំក្រមែនពិត ប៉ុន្តែខ្ញុំជម្នះ ខិតខំប្រឹងប្រែរៀនសូត្រតាំងពីបឋមសិក្សារហូតមកដល់ពេលនេះ ដោយមានឪពុកម្តាយខ្ញុំជម្រុញរហូត។ ទោះបីខ្ញុំក្រ ខ្ញុំមិនដែលនឹកថា ធ្វើអ្វីមិនមានប្រយោជន៍ដល់ខ្លួន និងសង្គមនោះទេ។ ខ្ញុំតែងគិតថា ខ្លួនឯងគឺជាសរសេរទ្រូងសម្រាប់គ្រួសារ និងសង្គម ព្រោះពេលរៀនចប់មានការងារធ្វើ ខ្ញុំត្រូវជួយដល់ប្អូនៗខ្ញុំច្រើននាក់ទៀត។ ពេលមកភ្នំពេញដំបូង ខ្ញុំយំនឹកផ្ទះមែនទែន ជាពិសេសពេលមេឃភ្លៀង និងពេលមេឃក្តៅខ្លាំង។ សព្វថ្ងៃនេះក៏អញ្ចឹង ខ្ញុំនៅតែយំនឹកស្រណោះឪពុកម្តាយ ដែលសុខចិត្តស៊ូទ្រាំ និងកម្តៅថ្ងៃ និងទឹកភ្លៀង ធ្វើយ៉ាងណាឲ្យកូនបានអង្គុយ ក្នុងថ្នាក់រៀន។

Sabay ៖ ក្រោយចប់ការសិក្សាថ្នាក់បរិញ្ញាបត្រ តើ គីមហាំ មានបំណងបន្តការសិក្សា ឬធ្វើការងារនៅផ្នែកណាដែរ?

គីមហាំ៖ ក្រោយចប់ការសិក្សា ខ្ញុំមានបំណងធ្វើការងារផ្នែកសាធារណៈ គឺមន្រ្តីរាជការ នៅក្រសួង ឬស្ថាប័នសាធារណៈ ក្នុងទិសដៅយ៉ាងណាជួយដល់ប្រជាពលរដ្ឋនៅតាមទីជនបទ ព្រោះខ្ញុំជាមនុស្សម្នាក់ចូលចិត្តជួយគេ អ្វីដែលខ្ញុំអាចជួយបាន ខ្ញុំនឹងខិតខំដើម្បីបងប្អូនខ្ញុំ និងសម្រាប់សង្គមជាតិខ្ញុំ។ ជាក់ស្តែងដូចពេលដែលខ្ញុំ ចូលរួមជាបុគ្គលិកស្ម័គ្រចិត្តសង្កេតការណ៍ប្រលងបាក់ឌុប ខ្ញុំបានប្រាប់ឯកឧត្តម ទេសរដ្ឋមន្រ្តី រួចហើយថា កម្លាំងខ្ញុំ ពេលវេលាខ្ញុំ លុយខ្ញុំ គឺដើម្បីសង្គមជាតិរបស់ខ្ញុំ។ ហើយតទៅមុខបើមានឱកាស ខ្ញុំចង់ក្លាយជាតំណាងរាស្រ្ត ព្រោះថា តំណាងរាស្រ្ត គឺជាតំណាងប្រជាពលរដ្ឋទូទាំងមណ្ឌល មិនមែនតែតំណាងប្រជាពលរដ្ឋ តែក្នុងមណ្ឌលនោះទេ។ ខ្ញុំនឹងអាចបម្រើប្រជាពលរដ្ឋកាន់តែច្រើនឡើង។ ខ្ញុំមានគំនិតនេះតាំងពីតូចមកម្ល៉េះ។

Sabay ៖ អ្វីដែល គីមហាំ ចង់ផ្តាំទៅយុវជន?

គីមហាំ៖ យុវជនត្រូវខិតខំប្រឹងប្រែងរៀនសូត្រ អ្វីដែលយើងអាចធ្វើបានសម្រាប់សង្គម ក្នុងនាមយុវជនគួរតែធ្វើ៕ https://www.youtube.com/watch?v=Er2jeFLTO4I

អានអត្ថបទ៖ យុវតីខ្មែររៀនសុទ្ធតែពាណិជ្ជកម្មអន្តរជាតិនៅថៃ រំពៃចង់បានការងារនៅទីនោះទៀត! ចុចត្រង់នេះ

អត្ថបទ៖មៃ សុខលីម