ប្រធានាធិបតីឈីលីប្រាប់រដ្ឋមន្ត្រីទាំងអស់ឲ្យលាលែងពីតំណែងព្រោះរឿងអាស្រូវច្រើន
- 2015-05-07 22:12:03
- ចំនួនមតិ 0 | ចំនួនចែករំលែក 0
ប្រធានាធិបតីឈីលីប្រាប់រដ្ឋមន្ត្រីទាំងអស់ឲ្យលាលែងពីតំណែងព្រោះរឿងអាស្រូវច្រើន
ចន្លោះមិនឃើញ
នៅថ្ងៃពុធម្សិលមិញនេះ ប្រធានាធិបតីរបស់ប្រទេសឈីលី លោកស្រី Michelle Bachelet បានប្រាប់រដ្ឋមន្ត្រីទាំងអស់ឲ្យលាលែងពីតំណែង ព្រមទាំងបញ្ជាក់ថាលោកស្រីនឹងរើសគណៈរដ្ឋមន្ត្រីថ្មីនារយៈពេលប៉ុន្មានថ្ងៃខាងមុខ។ រឿងរ៉ាវដ៏គួរឲ្យភ្ញាក់ផ្អើលនេះ បានកើតឡើងបន្ទាប់ពីរឿងអាស្រូវលេចឮឡើងក្នុងជួររដ្ឋាភិបាល។
នៅក្នុងបទសម្ភាសន៍ជាមួយទូរទស្សន៍ Canal 13 លោកស្រី Bachelet បានិយាយថា ការផ្លាស់ប្ដូរត្រូវតែធ្វើឡើង ដើម្បីផ្សព្វផ្សាយពីកំណែទម្រង់នានា។ "កាលពីប៉ុន្មានម៉ោងមុន ខ្ញុំបានស្នើឲ្យរដ្ឋមន្ត្រីទាំងអស់លាលែងពីតំណែង... ហើយខ្ញុំនឹងប្រើពេល ៧២ម៉ោង ដើម្បីសម្រេចថានរណាអាចនៅបន្ត នរណាត្រូវទៅ។ នេះគឺជាពេលវេលាផ្លាស់ប្ដូរគណៈរដ្ឋមន្ត្រី"។ លោកស្រី Bachelet ប្រធានាធិបតីឈីលីនិយាយ។
នាពេលថ្មីៗនេះ ប្រជាប្រិយភាពរបស់លោកស្រី Bachelet បានធ្លាក់ចុះជាលំដាប់ ក្រោយមានរឿងអាស្រូវនយោបាយកើតឡើងបន្តបន្ទាប់។ កាលពីខែកុម្ភៈកន្លងទៅ កូនប្រុសរបស់ប្រធានាធិបតីស្រីរូបនេះ បានលាលែងពីតំណែងប្រធានអង្គការសប្បុរសធម៌របស់រដ្ឋាភិបាល បន្ទាប់ពីមានការចោទប្រកាន់ថាប្រើអំណាចដើម្បីប្រយោជន៍ផ្ទាល់ខ្លួន។
លោក Sebastian Davalos ដែលត្រូវជាកូនប្រុសរបស់លោកស្រី Bachelet ត្រូវបានគណៈបក្សប្រឆាំងចោទប្រកាន់ថា ប្រើអំណាចផ្ទាល់ខ្លួនដើម្បីខ្ចីលុយធនាគារ ១០លានដុល្លារឲ្យប្រពន្ធ។ ក្រុមហ៊ុនរបស់ប្រពន្ធលោក Sebastian បានប្រើប្រាស់លុយនេះ ទៅទិញដីឡូត៍ជច្រើនកន្លែង នៅភាគកណ្ដាលប្រទេសឈីលី រួចលក់ទៅវិញរកប្រាក់ចំណេញដាក់ហោប៉ៅ។
បើទោះបីនិយតករធនាគារជាតិឈីលី បានជម្រះជាមួយកំហុសរបស់លោក Sebastian រួចទៅហើយក្ដី ក៏បញ្ហានេះបានក្លាយទៅជារឿងអាស្រូវមួយ រហូតប៉ះពាល់ដល់ប្រជាប្រិយភាពរបស់លោកស្រី Bachelet ដែលត្រូវជាម្ដាយ និងជាប្រធានាធិបតីកំពុងកាន់តំណែង៕
ចុចអាន៖ ទិដ្ឋភាពភ្នំភ្លើងផ្ទុះដ៏គួរឲ្យខ្លាចនៅប្រទេសឈីលី
ប្រែសម្រួល៖ គង់ វិសាល ប្រភព៖ businessinsider