ព្រាប សុវត្ថិ៖ ឆ្នាំនេះសប្បាយចិត្តខ្លាំង ព្រោះហង្សមាសដើរលើផ្លូវត្រូវ

2015-05-12 22:15:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ព្រាប សុវត្ថិ បាននិយាយថា នៅក្នុងឆ្នាំនេះលោកហាក់ដូចជាសប្បាយចិត្តជាងឆ្នាំនានា ព្រោះតែផលិតកម្មហង្សមាសបានដើរលើផ្លូវដ៏ត្រឹមត្រូវមួយសម្រាប់តារាចម្រៀងទាំងអស់ ដែលជាជោគជ័យរួមគ្នា។

តារាចម្រៀងឈរលើលំដាប់កំពូលរូបនេះនិយាយថា៖" បើនិយាយទៅ មានការងារច្រើនសម្រាប់បុគ្គលិកទាំងអស់ គឺពូកយើងរវល់ជាប់គ្នារដឹក"។ លោកបន្តថា ទោះបីជាការងារមួយចំនួន ត្រូវធ្វើដំណើរទៅតាមបណ្ដាខេត្តឆ្ងាយពីភ្នំពេញយ៉ាងណាក្ដី ប៉ុន្តែតារាចម្រៀង បុគ្គលិកទាំងអស់ពេញចិត្តទៅនឹងអ្វី ដែលពូកគេទទួលបានដូចគ្នាដែរ។

លោក ព្រាប សុវត្ថិ បានឱ្យដឹងទៀតថា ការសម្រេចចិត្តទិញកម្មវិធីបរទេសនានារបស់ក្រុមហ៊ុនខាងលើដូចជា The Voice Cambodia, Cambodia's Got Talent ឬ Cambodian Idol ជាដើម ជាចំណែកមួយសំខាន់។ ដូច្នេះក្នុងនាមជាបុគ្គលិកម្នាក់ និងជាគណៈកម្មការកម្មវិធី លោកមានមោទនភាពដូចគ្នាដែរ ស្របពេលដែលបទចម្រៀង ក៏ត្រូវបានផលិតឡើងជាច្រើនអាល់ប៊ុម ដើម្បីចរាចរណ៍លើទីផ្សារថែមទៀត។

ព្រាប សុវត្ថិ បន្ថែមថា៖" អឺ!...ខ្ញុំរីករាយដែលអាចរំលែកបទពិសោធន៍ច្រៀងទៅអ្នកជំនាន់ក្រោយនៅតាមខេត្ត។ ខ្ញុំចង់ធ្វើរឿងនេះយូរហើយ"។ តារាអាចរក្សាភាពល្បីល្បាញបានយូរជាងគេក្នុងវិស័យចម្រៀងរូបនេះនិយាយថា កន្លងមកបានចែករំលែកបទពិសោធន៍ដោយប្រយោលប៉ុណ្ណោះ។ ប៉ុន្តែតាមរយៈកម្មវិធីប្រលងចម្រៀង ដែលទទួលសិទ្ធិពីបរទេសជាបន្តបន្ទាប់ ធ្វើឱ្យលោកអាចចែករំលែកដោយផ្ទាល់បាន៕