២នាក់ស្លាប់ ក្នុងករណីបាញ់បោះនៅជំរំទ័ព Psy កំពុងហ្វឹកហាត់

2015-05-14 16:30:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ករណីបាញ់បោះមួយបានកើតឡើង នៅជំរំទ័ពកូរ៉េខាងត្បូង ជាកន្លែងដែលតារាចម្រៀង Psy, Jang Soo Won និងតារាសម្ដែង Jung Suk Won កំពុងហ្វឹកហាត់ បណ្ដាលឱ្យមនុស្សពីរនាក់ស្លាប់។

យោងតាមសារព័ត៌មាន Joongang Daily បានឲ្យដឹងថាហេតុការណ៍នេះ បានកើតឡើងនៅថ្ងៃទី១៣ ឧសភា ម្សិលមិញ នៅជំរំហ្វឹកហាត់ទ័ព Naegok-dong ក្នុងស្រុក Seocho ទីក្រុងសេអ៊ូល។

ចំណែកសារព័ត៌មាន Yonhap News បានស្រង់សម្ដីរបស់យោធាម្នាក់ថា៖ "ទាហានបម្រុងបង្កហេតុ បានបាញ់សំដៅលើមិត្តរបស់ខ្លួន (ទាហាន) នៅជំរំ Naegok-dong ភាគខាងត្បូង ប្រទេសកូរ៉េខាងត្បូង នៅម៉ោងប្រហែល ១០:៤៤នាទីព្រឹក"។

ជនសង្ស័យមានវ័យ២៣ឆ្នាំ ឈ្មោះ Choi ដែលដំបូងឡើយរូបគេបាញ់ចំគោលដៅហ្វឹកហាត់ចំនួន១០គ្រាប់។ បន្ទាប់មកដោយគ្មានការព្រមាន ទាហានរូបនោះ បានបង្វែរកាំភ្លើង K-2 បាញ់សំដៅលើគ្នារបស់ខ្លួន កំពុងឈរជាជួរនៅពីក្រោយ។

បុរសរូបនេះ បានសម្លាប់ទាហានពីរនាក់ និងយ៉ាងហោចណាស់មនុស្សបីទៀតរងរបួស។ ប្រភពបញ្ជាក់ថា ទាហានម្នាក់ស្លាប់ភ្លាមៗនៅនឹងកន្លែង ខណៈមួយរូបទៀត ស្លាប់តាមផ្លូវបញ្ជូនទៅមន្ទីរពេទ្យ ចំណែកអ្នករបួស ត្រូវបានបញ្ជូនទៅមន្ទីរពេទ្យទាហាននៅទីក្រុងសេអ៊ូល។ យ៉ាងណាមិញ ក្រោយកើតហេតុ ជនសង្ស័យក៏ធ្វើអត្តឃាតខ្លួនឯង។

ទោះបីជាយ៉ាងណា តារាបីរូបខាងលើមានអារម្មណ៍ភ្ញាក់ផ្អើល តែពួកគេមានសុវត្ថិភាពទេ ដោយក្នុងថ្ងៃនោះមានអ្នកខ្លះចេញមុន។ គួរបញ្ជាក់ថា បុរសកូរ៉េខាងត្បូងទាំងអស់ ដែលមានអាយុចន្លោះ១៨ និង៣៥ឆ្នាំ ត្រូវបំពេញកាតព្វកិច្ចបម្រើយោធា រយៈពេលពីរឆ្នាំ៕

មកដល់ឆ្នាំនេះ “Gangnam Style” មានអ្នកមើល២,២ពាន់លានដង

ប្រែសម្រួល៖ អ៊ុំ សុភក្តិ ប្រភព៖ kdramastars