មើលវីដេអូនេះ ទើបដឹងថាលោកអូបាម៉ាសាមញ្ញប៉ុណ្ណា

2015-05-20 16:41:59
ចំនួនមតិ 0 | ចំនួនចែករំលែក 0

ចន្លោះមិនឃើញ

បើទោះបីមានតំណែងជាប្រធានាធិបតីសហរដ្ឋអាមេរិក និងជាមនុស្សដ៏មានឥទ្ធិពលមួយរូបលើឆាកអន្តរជាតិ ក៏លោក បារ៉ាក់ អូបាម៉ា ហាក់មិនបញ្ចេញអំណាច ព្រមទាំងធ្វើខ្លួនសាមញ្ញបំផុត។ ជាក់ស្ដែង កាលពីថ្ងៃចន្ទកន្លងទៅ ប្រធានាធិបតីទី៤៤ រូបនេះ បានជួយបាំងឆត្រឲ្យបុគ្គលិកពីរនាក់របស់ខ្លួន ធ្វើឲ្យមនុស្សជាច្រើនកោតសរសើរយ៉ាងខ្លាំង។

កាលពីថ្ងៃចន្ទ ពេលកំពុងមានភ្លៀងធ្លាក់យ៉ាងជោកជាំ លោក បារ៉ាក់ អូបាម៉ា បានត្រលប់ដល់សេតវិមាន នៅទីក្រុង Washington, D.C វិញ ក្រោយវិលត្រលប់ពីទីក្រុង Camden រដ្ឋ New Jersey។ អំឡុងពេលនោះ មានតែលោកម្នាក់ប៉ុណ្ណោះដែលមានឆត្របិទបាំងគ្រាប់ភ្លៀង ខណៈស្ត្រីពីរនាក់នៅក្រោមឱវាទក៏ត្រូវធ្វើដំណើរចូលសេតវិមានដូចគ្នា។

បើតាមពិធីការ ពេលឧទ្ធម្ភាគចក្រចុះចត ប្រធានាធិបតីត្រូវធ្វើដំណើរចូលសេតវិមានមុន ទើបសហការីចូលតាមក្រោយ។ ទោះយ៉ាងណា លោក អូបាម៉ា បានបំពានពិធីការ ដោយនៅចាំបាំងឆត្រឲ្យនារីពីរនាក់ ធ្វើឲ្យប្រជាជនសរសើរគ្រប់គ្នា។

បើតាមសារព័ត៌មាន UPI នារី ដែលលោក អូបាម៉ា បាំងឆត្រឲ្យនោះ ម្នាក់មានឈ្មោះ Valerie Jarrett ដែលបំពេញការងារជាអ្នកប្រឹក្សាជាន់ខ្ពស់របស់ប្រធានាធិបតី និងម្នាក់ទៀតឈ្មោះ Anita Breckenridge ជាអនុប្រធានផ្នែកបុគ្គលិកប្រតិបត្តិការ។ វីដែអូបង្ហាញពីសកម្មភាពដ៏សាមញ្ញនេះ ត្រូវបានចែកចាយតគ្នាជាច្រើនដង បន្ទាប់ពីបង្ហោះលើបណ្ដាញសង្គមរបស់សារព័ត៌មាន ABC៕