បេក្ខនារី Talent Show របស់ទួរគីម្នាក់ ត្រូវខ្មាន់កាំភ្លើងលួចបាញ់កណ្ដាលក្បាល

2015-05-20 18:09:08
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ត្រីឈ្មោះ Mutlu Kaya ដែលគេស្គាល់ថាជា បេក្ខនារីប្រលងក្នុងកម្មវិធី បង្ហាញទេពកោសល្យ Sesi Cok Guzel របស់ទួរគី ត្រូវបានខ្មាន់កាំភ្លើងបាញ់ចំកណ្តាលក្បាល ខណៈនាងកំពុងហាត់សមក្នុងផ្ទះរបស់ខ្លួន កាលពីព្រឹកថ្ងៃចន្ទកន្លងទៅ។ នេះបើតាមការឱ្យដឹង ពីសារព័ត៌មានជាតិទួរគី។

ប្រភពបន្តទៀតថា មុនកើតហេតុបេក្ខនារីវ័យ១៩ឆ្នាំ ត្រូវជនមិនស្គាល់អត្តសញ្ញាណគំរាមសម្លាប់ បើសិននាងហ៊ានឡើងច្រៀង ក្នុងកម្មវិធីមួយនេះ។

ចំណែកខ្មាន់កាំភ្លើងត្រូវគេឱ្យដឹងថា បានស្ថិតក្នុងសួនច្បារ និងបានបាញ់រះតាមបង្អួចផ្ទះ ដែលបណ្ដាលឱ្យជនរងគ្រោះរបួសធ្ងន់ធ្ងរ ហើយពាក់ព័ន្ធនឹងអំពើឃាតកម្មនេះ មនុស្សម្នាក់ត្រូវចាប់ខ្លួន។

ចំណែកកាសែត Posta រាយការណ៍ដែរថា Kaya ទទួលបានការគំរាមសម្លាប់ ពីជនមិនស្គាល់អត្តសញ្ញាណ ក្រោយនាងបង្ហាញខ្លួនក្នុងកម្មវិធី Sesi Cok Guzel នាពេលកន្លងមក។ កាសែតនេះបានស្រង់សម្ដីពេល Kaya ប្រាប់ក្រុមផលិតរបស់កម្មវិធីខាងលើថា "ខ្ញុំខ្លាចខ្លាំងណាស់"។

លោក Mehmet Kaya ឪពុកជនរងគ្រោះ បានសម្ដែងក្ដីសោកស្ដាយជាខ្លាំងចំពោះកូន និងប្រាប់ទៅសារព័ត៌មានក្នុងស្រុកថា កូនស្រីរបស់លោក កំពុងតែហាត់សមច្រៀង ពេលគេបាញ់សម្លាប់នោះ។

ករណីបាញ់ប្រហារមកលើស្ត្រីវ័យក្មេងខាងលើ បានកើតឡើងក្នុងស្រុក Ergani ខេត្ត Diyarbakir ទីក្រុង Diyarbakir ភាគខាងកើតឆៀងខាងត្បូងប្រទេសទួរគី ដែលជាកន្លែងមានចលនាស្ត្រីឃឺដខ្លាំងក្លាបំផុត ។ ចៅហ្វាយក្រុង និងស្ទើរតែពាក់កណ្ដាលនៃតំណាងរាស្ត្រក្នុងតំបន់នេះគឺជាស្ត្រី។

Sesi Cok Guzel ជាប្រភេទកម្មវិធីបង្ហាញទេពកោសល្យមួយរបស់ទួរគី ដែលមានលក្ខណៈស្រដៀង នឹងកម្មវិធី Britain's Got Talent របស់អង់គ្លេសដែរ៕