Guo Meimei អាចប្រឈមជាប់គុក១០ឆ្នាំពីបទបើកបនល្បែង
- 2015-05-22 23:22:43
- ចំនួនមតិ 0 | ចំនួនចែករំលែក 0
Guo Meimei អាចប្រឈមជាប់គុក១០ឆ្នាំពីបទបើកបនល្បែង
ចន្លោះមិនឃើញ
Guo Meimei ដែលគេស្គាល់ថា ជាតារាអ៊ីនធឺណិតដ៏ល្បីម្នាក់នោះ អាចនឹងត្រូវប្រឈមជាប់ពន្ធនាគាររយៈពេល១០ឆ្នាំ ក្រោយជាប់ចោទពីបទថា បើកបនល្បែងខុសច្បាប់។
សេចក្ដីថ្លែងរបស់រដ្ឋអាជ្ញាសង្កាត់ Dongcheng ក្នុងទីក្រុងប៉េកាំង កាលពីថ្ងៃព្រហស្បតិ៍បានឱ្យដឹងថា ពួកគេមានភស្តុតាងគ្រប់គ្រាន់ ដើម្បីបង្ហាញពីទោសកំហុសរបស់នាង។ សេចក្ដីថ្លែងការណ៍រៀបរាប់ថា៖ "យើងមានភស្តុតាងគ្រប់គ្រាន់បញ្ជាក់ថា Meimei និងមិត្តរបស់នាង Zhao Xiaolai បានរៀបចំ និងសម្រួលដល់អ្នកលេងល្បែងផ្សេងទៀត ជាច្រើនលើកច្រើនសា នៅក្នុងឱកាសផ្សេងៗ"។
កាលពីខែកក្កដា ឆ្នាំ២០១៤ ប៉ូលិសក្រុងប៉េកាំងបានរកឃើញ ការបើកភ្នាល់បាល់ទាត់អន្តរជាតិ World Cup មួយ ដែលមាន Meimei ជាមេខ្លោង ហើយប៉ូលិសបានចាប់ខ្លួនអ្នកលេងល្បែង៨នាក់។ ដល់ខែសីហាតារាស្រីរូបនេះ ត្រូវប៉ូលិសចាប់ខ្លួន ក្រោយសង្ស័យថាបើកកាស៊ីណូ ហើយរដ្ឋអាជ្ញាបានប្រាប់ប៉ូលិសឱ្យប្រមូលភស្តុតាងឱ្យបានគ្រប់គ្រាន់ ដើម្បីប្រឆាំងនឹងអ្នកវក់ល្បែងអនឡាញទាំងនោះ។
ក្នុងពេលនោះដែរ ប៉ូលិសបាននិយាយថា នាង Meimei ក៏បានបើកគណនីជាមួយនឹងវិបសាយល្បែងជាច្រើននៅបរទេស ដែលអាចភ្នាល់គ្នាតាមទូរសព្ទ និងកម្មវិធី WeChat។ មិនតែប៉ុណ្ណោះនាងថែមទាំងជាប់ពាក់ព័ន្ធ នឹងការជួញដូរផ្លូវភេទ និងបើកវិបសាយបោកប្រាស់ នៅបរទេសទៀតផង។
យោងតាមលោក Xu Yongjun ចៅក្រមជាន់ខ្ពស់មកពីសាលាក្ដីឧក្រិដ្ឋកម្ម ស្ថិតក្រោមតុលាការកំពូលប្រជាជនចិន បានឱ្យដឹងថា ព្រះរាជអាជ្ញាបានចោទប្រកាន់នាងពីបទបើកបនល្បែង ជាជាងចោទលើការជួញដូរផ្លូវភេទ។ នេះបើមើលតាមភស្តុតាង និងបទល្មើសជាក់ស្ដែង។
ច្បាប់ព្រហ្មទណ្ឌចិនបានចែកថា ជនណាហ៊ានបើកបនល្បែង នឹងត្រូវជាប់ពន្ធនាគារតិចជាងបីឆ្នាំ តែក្នុងករណីទោសធ្ងន់ អាចជាប់ពីបីឆ្នាំដល់ដប់ឆ្នាំ។
តារាអ៊ីនធឺណិតចិនដ៏ល្បីរូបនេះ បានល្បីល្បាញពេញប្រទេសក្នុងឆ្នាំ ២០១១ ពេលនាងអះអាងខ្លួនលើបណ្ដាញសង្គមថា នាងបានបើកអង្គការមួយ ក្រោមការទំនុកបម្រុងរបស់កាកបាទក្រហម។ ពេលនោះហើយធ្វើឱ្យនាងល្បីល្បាញ មានជីវភាពធូរធារ និងមានជីវិតថ្កុំថ្កើង។ ប៉ុន្តែក្រោយប៉ូលិសចាប់ខ្លួន តារាខាងលើបាននិយាយថា នាងគ្មានអ្វីពាក់ព័ន្ធនឹងកាកបាទក្រហមទេ ហើយនាងក៏បានសូមទោស ចំពោះកាកបាទក្រហម និងសាធារណជន៕
ចុចអាន៖ ម៉ូដែលចិនណាហ៊ានបង្ហាញចង្អូរទ្រូងលើស២ស.ម នឹងរងពិន័យជាង៨០០ដុល្លារ
ប្រែសម្រួល៖ អ៊ុំ សុភក្តិ ប្រភព៖ lollipop