សាកលវិទ្យាល័យភូមិន្ទភ្នំពេញបកស្រាយមូលហេតុគ្មានបាវចនាលើសញ្ញាប័ត្រ

2015-05-23 00:22:06
ចំនួនមតិ 0 | ចំនួនចែករំលែក 0

ចន្លោះមិនឃើញ

សាកលវិទ្យាល័យភូមិន្ទភ្នំពេញបានរៀបចំពិធីប្រគល់សញ្ញាប័ត្រថ្នាក់បរិញ្ញាបត្រ និង បរិញ្ញាបត្រជាន់ខ្ពស់ ជូនដល់និស្សិតដែលបានបញ្ចប់ការសិក្សា កាលពីថ្ងៃ ១៩ ខែ ឧសភា ឆ្នាំ ២០១៥ ប៉ុន្តែ គេកត់សំគាល់ឃើញថា នៅលើសញ្ញាប័ត្រពុំមានដាក់បាវចនា ជាតិ សាសនា ព្រះមហាក្សត្រ នោះទេ។ និស្សិតក៏ដូចជាអ្នកលេងបណ្ដាញសង្គមជាច្រើនប្រតិកម្មពីបញ្ហានេះ រហូតមានការថតបង្ហោះ និង ចោទជាចម្ងល់ផ្សេងៗ។

រូបភាពដែលអ្នកលេង Facebook ម្នាក់បានបង្ហោះ

ទាក់ទិននឹងរឿងនេះ ឯកឧត្ដមបណ្ឌិត ជេត ជាលី ដែលជាសកលវិទ្យាធិការនៃសាកលវិទ្យាល័យភូមិន្ទភ្នំពេញ បានធ្វើការបកស្រាយជុំវិញបញ្ហានេះ នៅក្នុងសិក្ខាសាលាមួយ កាលពីព្រឹកថ្ងៃទី ២២ ខែ ឧសភា ឆ្នាំ ២០១៥ នៅសាកលវិទ្យាល័យភូមិន្ទភ្នំពេញថា ការដកបាវចនាជាតិមិនមែនជារឿងចៃដន្យ និង ការធ្វេសប្រហែសទេ ពោលគឺ មុនពេលដែលគណៈគ្រប់គ្រងសាលាសម្រេចចិត្តជ្រើសយកសន្លឹកសញ្ញាប័ត្របច្ចុប្បន្ន គឺមានការប្រជុំជាច្រើនសារ បន្ទាប់ពីមានការផ្ទេរសិទ្ធិពីក្រសួងអប់រំយុវជន និង កីឡា ដែលអនុញ្ញាតឱ្យសាកលវិទ្យាល័យប្រថាប់ត្រាទទួលស្គាល់ដោយខ្លួនឯង។

ឯកឧត្ដមបណ្ឌិត ជេត ជាលី បានបន្តទៀតថា គណៈគ្រប់គ្រងសាលាសម្រេចប្រកាន់គោលការណ៍បីសំខាន់ៗបីគឺ ទីមួយគឺ រចនាបថសញ្ញាប័ត្រត្រូវមានលក្ខណៈជាខ្មែរ និង មានអក្សរខ្មែរ ទីពីរគឺ មិនពាក់ព័ន្ធនឹងនយោបាយ និង ទី ៣ មានព័ត៌មានច្រើនបំផុតដែលពាក់ព័ន្ធនឹងការសិក្សា ចំណែកព័ត៌មានដែលមិនពាក់ព័ន្ធត្រូវបានដកចេញ។

ឯកឧត្ដមក៏បានបន្ថែមផងដែរថា សាលាមិនដាក់បាវចនាជាតិព្រោះសាលាគ្មានភាពក្រអឺតក្រទមណាប្រដូចខ្លួនខ្ពស់ដូចសញ្ញាប័ត្រដែលចេញដោយក្រសួងនោះទេ ដោយសារវាត្រឹមតែជាផលិតផលរបស់សាលាតែប៉ុណ្ណោះ លើសពីនេះក៏គ្មានច្បាប់ណាដែលចែងថាការមិនដាក់បាវចនាជាតិជាអំពើខុសច្បាប់នោះដែរ។

ចំពោះការលុបនូវបាវចនាជាតិលើសញ្ញាប័ត្រសម្រាប់ឆ្នាំក្រោយៗទៀត លោកសកលវិទ្យាធិការបានបញ្ជាក់ថា ក្រសួងអប់រំនឹងកោះប្រជុំសាកលវិទ្យាល័យរដ្ឋទាំងអស់ដើម្បីពិភាក្សា។

សូមស្ដាប់សំឡេង ឯកឧត្ដមបណ្ឌិត ជេត ជាលី សាកលវិទ្យាធិការ នៃសាកលវិទ្យាល័យភូមិន្ទភ្នំពេញ បកស្រាយមូលហេតុគ្មានបាវចនាលើសញ្ញាប័ត្រ នៅក្នុងសិក្ខាលាលាមួយ កាលពីព្រឹកមិញនេះ៖