មើលវីដេអូនេះទើបដឹងថាការតថ្លៃទំនិញខុសគ្នាយ៉ាងណា

2015-05-25 22:30:19
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកលក់តាមចិញ្ចើមផ្លូវដែលរកប្រាក់ត្រឹមចិញ្ចឹមក្រពះ ត្រូវអ្នកទិញតថ្លៃយ៉ាងរោយមាត់ទម្រាំទិញ ប៉ុន្តែទំនិញតាមហាងមានតម្លៃថ្លៃបែរជាលក់បានដោយស្រួល មិនចាំបាច់ចរចាយូរ។ ដោយមើលឃើញពីភាពមិនស្មើគ្នាបែបនេះ ទើបជនជាតិឥណ្ឌានាំគ្នាបង្កើតវីដេអូ បង្ហាញពីការយល់ខុសរបស់អ្នកទិញក្នុងការតថ្លៃទំនិញតាមចិញ្ចើមផ្លូវ និងទំនិញតាមហាង។

នៅក្នុងវីដេអូជាង ២នាទី បង្ហាញពីបុរសម្នាក់ចុះពីលើឡាន សំដៅទៅរកទិញដូងតាមរទេះមកទទួលទាន។ អ្នកលក់បានប្រាប់ថា ដូងមានតម្លៃ ៣០រូពី (ប្រហែល ២០០០រៀល) ព្រមទាំងរៀបរាប់ថាដូងនោះស្រស់ល្អ មានទឹកផ្អែមឆ្ងាញ់...។

គ្រាន់តែឮតម្លៃភ្លាម អ្នកទិញបានផ្លាស់ប្ដូរទឹកមុខ ហើយចោទអ្នកលក់ថាជាចោរប្លន់ ដោយតថ្លៃឲ្យតែ ១៥រូពី (ប្រហែល ១០០០រៀល) ប៉ុណ្ណោះ។ អ្នកលក់រៀបរាប់ប្រាប់ពីទុក្ខលំបាករបស់ខ្លួន ដែលត្រូវឈរក្រោមកម្ដៅថ្ងៃ សម្រក់ញើសតាំងពីព្រលឹម ត្រឹមរកប្រាក់មួយចម្អែតក្រពះ ប៉ុន្តែអ្នកទិញបែរជាខឹង និងថាឲ្យអ្នកលក់ជាចោរដដែល។

មួយសន្ទុះក្រោយមក អ្នកទិញបានដើរមកកាត់អ្នកលក់ដូងវិញ ដោយមានទឹកក្រូចមួយដបផឹកតាមផ្លូវ។ អ្នកលក់ដូងបានហៅអ្នកទិញនោះមកជិតខ្លួន រួចសួរថាទឹកក្រូចមានតម្លៃប៉ុន្មាន។ អ្នកទិញប្រាប់វិញថា មានតម្លៃ ៣៥រូពី (ប្រហែល ២៣០០រៀល)។ អ្នកលក់សួរអ្នកទិញទៀតថា តថ្លៃប៉ុន្មានទើបទិញ ប៉ុន្តែអ្នកទិញនោះបែរជានិយាយថា វាជាទំនិញតាមហាងមានម៉ាកត្រឹមត្រូវ មិនអាចតថ្លៃទេ។

អ្នកលក់ចាប់ផ្ដើមនិយាយថា ទំនិញរបស់អ្នកមានសូម្បីមួយរូពីមិនតថ្លៃផង ចំណែកទំនិញអ្នកក្រដូចជាលោក បែរជាតថ្លៃរហូតដល់ ១៥រូពី។ ពាក្យសម្ដីនេះបានធ្វើឲ្យអ្នកទិញភ្ញាក់ខ្លួន និងទទួលស្គាល់ថាអ្វីដែលអ្នកលក់និយាយសុទ្ធតែត្រឹមត្រូវ...។

ចង់ដឹងច្បាស់ សូមទស្សនាវីដេអូខាងក្រោម៖