ប្រធានក្រុម វង់តន្រ្តីបងប្អូន ច្រានចោលព័ត៌មានបែកបាក់ក្រុម
- ពុធ, 27 ឧសភា 2015 19:03
- ចំនួនមតិ 0 | ចំនួនចែករំលែក 0
ប្រធានក្រុម វង់តន្រ្តីបងប្អូន ច្រានចោលព័ត៌មានបែកបាក់ក្រុម
ចន្លោះមិនឃើញ
ប្រធានក្រុមវង់តន្ត្រីបងប្អូន លោក ហុង ស្រីសន្តិភាព បានទាត់ចោលពាក្យចចាមអារ៉ាមមួយថា វង់តន្ត្រីនេះមានការបែកបាក់ក្រុម ស្របពេលដែលស្ងប់ស្ងាត់មិនសូវចេញសម្ដែងនៅលើកញ្ចក់ទូរទស្សន៍ដូចប៉ុន្មានថ្ងៃមុន។
ជម្លោះផ្ទៃក្នុង ក្រុមថ្មីងាយបែកបាក់ ហើយសមាជិកនិមួយៗ បានរត់ចេញពីក្រុមទៅបង្កើតក្រុមថ្មីរៀងៗខ្លួន គឺជា អ្វីដែលបានលេចឮនៅក្នុងចង្កោមអ្នកសិល្បៈដូចគ្នា នៅប៉ុន្មានរយៈចុងក្រោយនេះ។ "ខ្ញុំប៉ុន្មានថ្ងៃនេះ ឮពាក្យចចាមអារ៉ាមនេះភ្លាម គឺខ្ញុំមិនសប្បាយចិត្តខ្ញុំចង់បញ្ជាក់ថា វង់តន្ត្រីរបស់ពួកខ្ញុំបង្កើតឡើងដោយសាច់ញាតិទាំង ៨ នាក់ ពួកខ្ញុំស្រឡាញ់គ្នាណាស់គ្មានទេពាក្យបែកបាក់ តែខ្ញុំទទួលស្គាល់ថា មួយរយៈនេះខ្ញុំស្ងាត់ពីសិល្បៈ"។
សន្តិភាព វ័យ ២៣ ឆ្នាំ ដែលជំនាញខាងកាន់ Guitar Solo បានពន្យល់ប្រាប់ Sabay ថា ហេតុផលដែលស្ងាត់សកម្មភាពសម្ដែងនៅតាមកញ្ចក់ទូរទស្សន៍ ដោយសារមួយរយៈនេះ សមាជិកក្រុមជាប់រវល់រឿងសិក្សា ដូចជា លោក សោម ផានុត វ័យ ២៣ ឆ្នាំ ជំនាញ Giuitar និង កញ្ញា សោម លីវ័ន្ត វ័យ ១៨ ឆ្នាំ ជំនាញ Bass ដែលត្រូវជាបងប្អូនជីដូនមួយ បានប្រលងជាប់សាលាភូមិន្ទនាយទាហានសកម្មត្រូវរៀនរយៈពេល ៤ ឆ្នាំ ប៉ុន្ដែ ក្នុងអំឡុង ៣ ខែដំបូង គឺត្រូវហ្វឹកហាត់ជាប់រហូតដោយមិនអាចមកផ្ទះបាននោះទេ (ចាប់ផ្ដើមហាត់តាំងពីខែ មីនា ២០១៥ មក)។ ឯប្អូនស្រីពីរនាក់ទៀត សោម ស្រីនា ជំនាញ ស្គរ កំពុងរវល់ត្រៀមប្រលងបញ្ចប់បរិញ្ញាបត្រផ្នែកដូរ្យតន្ត្រីនៅសាកលវិទ្យាល័យភូមិន្ទវិចិត្រសិល្បៈ និង ហុង ស្រីវចនា ជំនាញ Organ កំពុងត្រៀមប្រលងបញ្ចប់ថ្នាក់បរិញាបត្រ ផ្នែកភាសាបារាំងនៅសាកលវិទ្យាល័យ IFL។ "ចំណែកខ្ញុំវិញក៏រវល់ខ្លាំងដែរបង គឺខ្ញុំនៅសល់ពេលប្រហែល ៤ ខែទៀតខ្ញុំត្រូវប្រលងបញ្ចប់ ម៉ាស្ទ័រ ផ្នែកគ្រប់គ្រងនៅសាកលវិទ្យាល័យ ន័រតុន"។
លោក ហុង ស្រីសន្តិភាព ដែលជាប្រធានក្រុមវង់តន្រ្តីបងប្អូន ដែលចូលចិត្តប្រើប្រាស់ឧបករណ៍ហ្គីតា សូឡូ ដោយមានការបង្ហាត់បង្រៀនពី លោកគ្រូតា កែវ ផែន ទាំងការច្រៀង ការរៀនអក្សរភ្លេង ការរៀនវិស្វករសំឡេង ព្រមទាំងការនិពន្ធបទភ្លេង បាននិយាយទៀតថា ក្រោយពីបញ្ចប់ការសិក្សាគ្រប់គ្នាហើយ គឺចាប់ពីខែ កញ្ញា ខាងមុខ ក្រុមមួយនេះនឹងចាប់ផ្ដើមមានវត្តមាននៅលើកញ្ចក់ទូរទស្សន៍ឡើងវិញហើយ។
សូមស្ដាប់សំឡេង ហុង ស្រីសន្ដិភាព
[audio mp3="http://media.sabay.com/uploads/2015/05/Hong-SreySantepheap-1.mp3"][/audio]
ហុង ស្រីសន្ដិភាព
វង់តន្ត្រីបងប្អូនដែលប្រមូលផ្ដុំដោយសាច់ញាតិកាលពីអំឡុងឆ្នាំ ១៩៩៧ ហើយផលិតបានបទចម្រៀងជាស្នាដៃខ្លួនឯងបាន ១ វ៉ុល ស្មើនឹង ១២ បទ ឥឡូវក្រុមនេះបានត្រៀមវ៉ុលទី ២ ហើយ តែទាល់រហូតដល់ចុងឆ្នាំ ២០១៦ ទើបចេញជាផ្លូវការ។ "ក្រុមខ្ញុំចេញបទចម្រៀងវ៉ុលចម្រៀងមួយ គឺយូរណាស់ព្រោះពួកខ្ញុំត្រូវបង្កើតទំនុកភ្លេងថ្មី និង ទំនុកច្រៀងដោយខ្លួនឯង ឥឡូវពួកខ្ញុំបានសរសេរទំនុកភ្លេង បាន ៦ បទហើយ តែនៅមិនទាន់និពន្ធទំនុកច្រៀងនៅឡើយ"។ ហុង ស្រីសន្តិភាព និយាយ។
នៅថ្ងៃទី ១៤ ខែ កញ្ញា ឆ្នាំ ១៩៩៧ លោក ហុង ស្រីសម្បត្តិ ដែលត្រូវជាឪពុករបស់ ហុង ស្រីសន្តិភាព បានបង្កើតវង់តន្ត្រីបងប្អូន ដោយបានចំណាយប្រាក់អស់ប្រមាណជិត ២ ម៉ឺនដុល្លារ ក្នុងការទិញឧបករណ៍ និង ជួលគ្រូ មកបង្រៀនកូនបង្កើត ៤ នាក់ និង ក្មួយៗ ៤ នាក់ សរុបចំនួន ៨ នាក់។ វង់តន្ត្រីនេះ បង្រៀនដោយ លោក កែវ ផែន ដែលជាសិល្បករ Saxophone ជើងចាស់។
វង់តន្ត្រីបងប្អូនមានសមាជិកសរុបចំនួន ៨ នាក់ ដូចខាងក្រោម៖
១. ហុង ស្រីសន្តិភាព Guitar Solo និង ជាប្រធានក្រុម ២. សោម ផានុត Guitar ៣. ហុង ស្រីវចនា Organ ៤. សោម ស្រីនា Drum ៥. ហុង ស្រីចមចន្ទាកា Clariret/ Saxophone ៦. សោម លីវ័ន្ត Bass ៧. សោម យុត្ថវាទ Clarinet/Saxophone ៨. ហុង ស្រីសមចា Mandolin/ Violin ចាប់តាំងពីបង្កើតវង់តន្រ្តីបងប្អូនពីឆ្នាំ ១៩៩៧-២០០៣ ផលិតបានជា CD&VCD ១ វ៉ុល ដែលមាន១២បទ៖ ១. ហិង្សាលើគ្រួសារ ២. ក្មេងរើសអេតចាយ ៣. ថ្ងៃ នេះចម្លែក ៤. ទំនួញក្មេងអនាថា ៥. ជីវិតក្មេងសុំទាន ៦. ប៉ាម៉ាក់មានគុណ ៧. ក្មេងលក់កាសែត ៨. ម៉ាក់ខ្ញុំ ៩ ១+១=៣ ១០ ថ្នាំញៀនជាអ្វី ១១ កូនខ្មែរ ១២ វង់តន្ត្រីបងប្អូន។
លោក ហុង ស្រីសន្តិភាព ដែលជាប្រធានក្រុមបានបញ្ជាក់ប្រាប់ Sabay ថា "ក្រុមខ្ញុំគ្មានទេពាក្យបែកបាក់ យើងមានតែសាមគ្គី ហើយយើងកំពុងពង្រឹងសមត្ថភាព និង កំពុងហាត់សមរាល់ថ្ងៃ នឹងត្រៀមចេញ ១ វ៉ុល ក្រោយទៀត ពួកខ្ញុំនឹងកាន់តែរឹងមាំ ក្រោយពីបញ្ចប់ការរវល់រឿងសិក្សា"៕
[audio mp3="http://media.sabay.com/uploads/2015/05/Hong-SreySantepheap-2.mp3"][/audio]
សោម ផានុត ជំនាញ Guitar
សោម លីវ័ន្ត ជំនាញ Bass
អត្ថបទ៖ ប៊ិន ប៊ុណ្ណា