Van Gaal មានអារម្មណ៍ដូចអង្គុយក្នុងបង្គន់ ពេល Man Utd ទៅលេងក្រៅដី

2015-05-28 16:06:38
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Louis van Gaal បាននិយាយថារូបលោកមានអារម្មណ៍ដូចអង្គុយនៅក្នុងបង្គន់អីចឹង នៅពេលដែលក្រុម Manchester United ទៅប្រកួតក្រៅដីម្ដងៗ ព្រោះថាបន្ទប់ផ្លាស់សំលៀកបំពាក់នៅក្លិបមួយចំនួននៅអង់គ្លេសមិនមានបរិយាកាសល្អនោះទេ។

បន្ទាប់ពីជួយក្រុមបិសាចក្រហមឈរនៅចំណាត់ថ្នាក់លេខ៤ក្នុងតារាង Premier League រដូវកាលនេះ លោក Van Gaal បានបញ្ចេញអារម្មណ៍ផ្ទាល់ខ្លួនប្រាប់ទៅទូរទស្សន៍ MUTV ថា៖ "មួយរដូវកាលមកនេះ ខ្ញុំអាចនិយាយបានថាមានទាំងចំណុចអាក្រក់ និងល្អក្នុងវិស័យបាល់ទាត់នៅអង់គ្លេស។ ចំណុចអាក្រក់គឺមានក្លិបមួយចំនួននៅទីនេះ មិនមានបន្ទប់ផ្លាស់សំលៀកបំពាក់ឱ្យបានល្អនោះទេសម្រាប់កីឡាករនិងអ្នកចាត់ការ។ ខ្ញុំមានអារម្មណ៍ថាដូចអង្គុយក្នុងបង្គន់ជាច្រើនដងមកហើយ ឱ្យតែក្រុម Man Utd ទៅលេងនៅក្រៅដី។ ហើយចំណុចល្អវិញគឺបាល់ទាត់នៅទីនេះ ដូចជាការរស់នៅរបស់ប្រជាជនទៅហើយ អ្នកគ្រប់គ្នាស្រលាញ់បាល់ទាត់ ហើយបាល់ទាត់ក៏ស្រលាញ់អ្នកគ្រប់គ្នាដែរ”។

អតីតអ្នកចាត់ការក្រុម Barcelona និង Bayern Munich ខាងលើនេះ ទើបតែមកដឹកនាំក្រុមបិសាចក្រហមបានមួយរដូវកាល ហើយក៏ជាអ្នកជួយក្រុមម្ចាស់ពានរង្វាន់ Premier League ២០សម័យមួយនេះឱ្យបានទៅលេងក្នុងពានរង្វាន់ UEFA Champions League វិញផងដែរក្រោយពីខកខាន១រដូវកាល។ ដោយមានវ័យ៦៣ឆ្នាំទៅហើយ បុរសសញ្ជាតិហុល្លង់រូបនេះធ្លាប់បាននិយាយហើយថា Man Utd គឺជាក្លិបចុងក្រោយរបស់លោកក្នុងអាជីពជាអ្នកចាត់ការក្រុមបាល់ទាត់៕

ចុចអាន៖Roy Keane៖ “Van Gaal ត្រូវការពេល៣ឆ្នាំទៀត ដើម្បីជោគជ័យ”

ប្រែសម្រួល៖ មុន្នី រម្យ ប្រភព៖ goal