Bill Gates៖ "ខ្ញុំខ្លាចថាជំងឺរាតត្បាតពេលអនាគត នឹងសាហាវជាងអេបូឡាទៀត"

2015-05-28 16:36:02
ចំនួនមតិ 0 | ចំនួនចែករំលែក 0

ចន្លោះមិនឃើញ

មហាសេដ្ឋីវ័យ៥៩ឆ្នាំនិងជាម្ចាស់ក្រុមហ៊ុន Microsoft លោក Bill Gates បានបង្ហាញក្ដីព្រួយបារម្ភជាខ្លាំងចំពោះសុវត្ថិភាព និងសុខុមាលភាពរបស់មនុស្សជាតិទូទាំងពិភពលោក ដោយការយាយីពីជំងឺកាចសាហាវដែលអាចនឹងកើតឡើងនាពេលអនាគត។

“ខ្ញុំវាយតម្លៃឃើញថា លទ្ធភាពដែលអាចធ្វើឱ្យសង្គ្រាមនុយក្លេអ៊ែរកើតឡើង ក្នុងសម័យកាលរបស់ខ្ញុំ ដូចជាតិចតួចបំផុត តែបើការរាតត្បាតនៃជំងឺដែលខ្លះសឹងតែសាហាវជាងអេបូឡាទៀតនោះ គឺមានរហូតដល់ទៅជាង ៥០ភាគរយឯណោះ"។ លោក Bill Gates ប្រាប់ទៅប្លុកមួយឈ្មោះ Vox កាលពីពេលថ្មីៗនេះ។

មូលហេតុអំពីក្តីព្រួយបារម្ភដូច្នេះ លោក Bill Gates ចង់សំដៅទៅលើលទ្ធភាពនៃការមានជំងឺរាតត្បាតសាហាវៗ ដែលអាចនឹងកើតឡើងនៅប៉ុន្មានទសវត្សខាងមុខនេះ។ ជាក់ស្ដែងដូចជំងឺអេបូឡាដែលបានសម្លាប់មនុស្សយ៉ាងរង្គាលកាលពីឆ្នាំមុន ជាពិសេសគឺប្រជាជនរស់នៅតំបន់អាហ្វ្រិក។

ដោយឡែកកាលពីឆ្នាំ ១៩១៨ និង ១៩១៩ ជំងឺមួយឈ្មោះ Spanish Flu បានសម្លាប់មនុស្សអស់ជាច្រើនលាននាក់ ចន្លោះពី ២០ ទៅ ៤០លាននាក់ទូទាំងពិភពលោក។ លោក Bill Gates និយាយថា អ្វីដែលគួរឱ្យភ័យខ្លាចចំពោះជំងឺ Spanish Flu នេះ គឺការដែលគ្មាននរណាដឹងថា វាមានប្រភពមកពីណា ហើយការនាំគ្នាហៅ Spanish Flu នេះ ដោយសារមានសារព័ត៌មានមួយរបស់អេស្ប៉ាញ បានចុះផ្សាយមុនគេអំពីជំងឺមួយនេះ។

លោក Bill Gates បានទៅប្លុកខាងលើទៀតថា ដោយសារតែមូលហេតុបែបនេះហើយ ទើបលោកភ័យខ្លាចថាជំងឺរាតត្បាតសាហាវៗដូចជា Spanish Flu និងអេបូឡានៅពេលអនាគត អាចនឹងសម្លាប់មនុស្សដល់ទៅ ៣៣លាននាក់តែក្នុងរយៈពេល ២៥០ថ្ងៃប៉ុណ្ណោះ។

“មនុស្សជាតិខ្លួនឯងជាអ្នកបង្កើតឱ្យមានបរិស្ថានដ៏គួរឱ្យខ្លាចបែបនេះ"។ លោក Bill Gates សង្កត់ធ្ងន់ជាចុងក្រោយ៕ 