Bill Gates នឹងចំណាយជាង៧០លានដុល្លារ ជួយកាត់បន្ថយអត្រាមរណភាពកុមារ

2015-05-08 21:03:39
ចំនួនមតិ 0 | ចំនួនចែករំលែក 0

ចន្លោះមិនឃើញ

Bill Gates នឹងដាក់ឱ្យដំណើរការប្រព័ន្ធពិនិត្យថែទាំសុខភាព និងឃ្លាំមើលជំងឺរាតត្បាត ក្នុងគោលបំណងដើម្បីជួយកាត់បន្ថយអត្រាមរណៈភាពរបស់កុមារនៅតាមបណ្ដាប្រទេសកំពុងអភិវឌ្ឍ។

មូលនិធិ Bill & Melinda Gates នឹងចំណាយប្រាក់ប្រមាណ ៧៥លានដុល្លារទៅលើគម្រោងខាងលើ ហើយគម្រោងនេះនឹងត្រូវដាក់ឱ្យដំណើរការនៅអាហ្វ្រិក និងអាស៊ីខាងត្បូង (ឥណ្ឌា នេប៉ាល់ ប៉ាគីស្ថាន បង់ក្លាដេស...) ដើម្បីប្រមូលទិន្នន័យជាក់លាក់អំពីមូលហេតុនាំឱ្យកុមារបាត់បង់ជីវិត។

គម្រោងនេះនឹងជាជំនួយមួយដ៏មានសារប្រយោជន៍សម្រាប់មន្ត្រីសុខាភិបាលទូទាំងពិភពលោក ក្នុងការប្រយុទ្ធប្រឆាំងអត្រាមរណៈភាពរបស់កុមារ ហើយក៏សម្រាប់ឃ្លាំមើលនិងឆ្លើយតបបានទាន់ពេលវេលា ក្នុងករណីមានជំងឺរាតត្បាតផ្សេងៗកើតឡើង តួយ៉ាងដូចជំងឺអេបូឡាជាដើម។

"ពិភពលោកពិតជាត្រូវការជាចាំបាច់នូវទិន្នន័យអំពីបញ្ហាសុខភាពសាធារណៈ។ នៅពេលយើងចង់ដឹងអ្វីមួយនៅអាហ្វ្រិក យើងត្រូវហោះហើរទៅកាន់ទីនោះជាមួយនឹងឧបករណ៍និងកម្លាំងជំនួយ (គ្រូពេទ្យ) ដែលត្រូវចំណាយប្រាក់ច្រើន"។ លោក Bill Gates ចង់សំដៅទៅកាន់កង្វះខាតមន្ទីរពិសោធន៍នៅអាហ្វ្រិកខាងលិច និងការឆ្លើយតបយ៉ាងយឺតយាវពីសំណាក់ស្ថាប័នអន្តរជាតិចំពោះជំងឺអេបូឡាដែលបានសម្លាប់មនុស្សយ៉ាងរង្គាលនៅអាហ្វ្រិក កាលពីពេលកន្លងទៅ។

លោក Bill Gates និងលោកស្រី Melinda Gates ជាភរិយា

ប្រព័ន្ធឃ្លាំមើលបញ្ហាសុខភាពរបស់កុមារទាំង៦ធំៗ នឹងត្រូវដាក់ឱ្យប្រើប្រាស់នៅក្នុងតំបន់មានអត្រាមរណៈរបស់កុមារខ្ពស់បំផុត នៅតាមបណ្ដាប្រទេសអភិវឌ្ឍដូចជា អហ្រ្វិក និងអាស៊ីខាងត្បូង។

ស្ថាបនិកក្រុមហ៊ុន Microsoft រូបនេះ បានឱ្យដឹងទៀតថា បើទោះបីប៉ុន្មានឆ្នាំថ្មីៗនេះអត្រាមរណៈភាពរបស់កុមារបានថយចុះ តែពិភពលោកនៅតែត្រូវការកម្លាំងបន្ថែម ដើម្បីឱ្យតួលេខនេះកាន់តែទាបតាមលទ្ធភាពអាចធ្វើទៅបាន។

ដើម្បីឱ្យតួលេខនេះកាន់តែថយចុះ មជ្ឈមណ្ឌលឃ្លាំមើលជំងឺរាតត្បាតរបស់លោក ក៏ចាំបាច់ត្រូវមានអ្នកជំនាញផ្នែកវេជ្ជសាស្ត្រត្រៀមជាស្រេច ក្នុងករណីមានជំងឺសាហាវផ្ទុះឡើង ព្រោះពេលអនាគតអាចនឹងមានជំងឺរាតត្បាតណាមួយកើតឡើង ដែលមិនធ្លាប់ឃើញពីមុនមកក៏ថាបាន៕

អាន៖ Bill Gates៖ រឿងដែលខ្ញុំសោកស្តាយបំផុតក្នុងមួយជីវិត គឺមិនចេះនិយាយភាសាបរទេស

អាន៖ Bill Gates បោកពិធីករល្បីអាមេរិកឲ្យផឹកទឹកចម្រាញ់ពីលាមកមនុស្ស

អាន៖ Bill Gates បរិច្ចាគទ្រព្យសម្បត្តិច្រើនជាងគេ ក្នុងចំណោមមហាសេដ្ឋីលំដាប់ពិភពលោក ៥រូប

ប្រែសម្រួល៖ ប៉ែត ផាន់និត

ប្រភព៖ ft.com