សិង្ហបុរីស៊ើបអង្កេតរឿងយន្តហោះគាំងម៉ាស៊ីនពេលហោះហើរ
- 2015-05-28 20:30:56
- ចំនួនមតិ 0 | ចំនួនចែករំលែក 0
សិង្ហបុរីស៊ើបអង្កេតរឿងយន្តហោះគាំងម៉ាស៊ីនពេលហោះហើរ
ចន្លោះមិនឃើញ
ក្រុមហ៊ុនអាកាសចរសិង្ហបុរី Singapore Airlines បានប្រកាសបើកការស៊ើបអង្កេតថ្ងៃពុធម្សិលមិញនេះ ក្រោយយន្តហោះ Airbus របស់ខ្លួន ជួបបញ្ហាម៉ាស៊ីនពេលកំពុងហោះហើរទៅកាន់ទីក្រុងសៀងហៃកាលពីថ្ងៃសៅរ៍កន្លងទៅ ដែលធ្វើឲ្យអ្នកដំណើរភ័យស្លន់ស្លោ។
យន្តហោះប្រភេទ Airbus A330-300 នៃជើងហោះហើរ SQ836 ជួបបញ្ហាម៉ាស៊ីន ពេលហោះឡើងដល់កម្ពស់៣៩០០០ហ្វីត (១១,៩គីឡូម៉ែត្រ) ក្រោយចាកចេញពីសិង្ហបុរីបាន៣ម៉ោងកន្លះ ក្នុងការហោះហើររយៈពេល៥ម៉ោងទៅសៀងហៃ។ ពេលជួបបញ្ហា យន្តហោះបានដាំក្បាលចុះ ១៣០០០ហ្វីត (៣៩៦២ម៉ែត្រ) មុនពេលហោះឡើងទៅកម្ពស់ធម្មតាវិញ។
តាមប្រភពរ៉ាដានៃការហោះហើរបានបង្ហាញថា ម៉ាស៊ីនទាំងពីរបស់យន្តហោះនេះលែងដំណើរការនៅពេលដែលបើកឆ្លងកាត់ក្នុងតំបន់សមុទ្រចិនភាគខាងត្បូង ដោយសារអាកាសធាតុមិនអំណោយផល។
យ៉ាងណាក្ដី អ្នកដំណើរ១៨២នាក់ និងបុគ្គលិកក្នុងយន្តហោះ១២នាក់ទៀតសរុប១៩៤នាក់ បានទៅដល់សៀងហៃដោយសុវត្ថិភាព ពេលយន្តហោះចុះចតនៅសៀងហៃនាម៉ោង១០:៥៦នាទីយប់ ម៉ោងក្នុងស្រុក។
ក្រោយពេលចុះចត យន្តហោះបានទទួលការពិនិត្យ និងពន្យារពេលហោះហើរ២ម៉ោង មុនហោះទៅកាន់សិង្ហបុរីវិញ៕
ប្រែសម្រួល៖ មាន រតនា ប្រភព៖ dailymail, theguardian