ឆ្កែកំពូលឆ្លាតជួយម្ចាស់ឈ្នះពាន Britain's Got Talent 2015 យប់មិញ

2015-06-01 21:44:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ទីបំផុតម្ចាស់ជយលាភីកម្មវិធី Britain's Got Talent 2015 ដែលជារដូវកាលទី៩ បានរកឃើញហើយ ក្រោយប្រលងប្រជែងសមត្ថភាពគ្នាយ៉ាងស្វិតស្វាញពីបេក្ខជននានាកាលពីយប់មិញ។ ឆ្កែកំពូលឆ្លាតឈ្មោះ Matisse បានក្លាយជាតួអង្គដ៏សំខាន់ ធ្វើឲ្យម្ចាស់ឈ្នះពាន អមជាមួយទឹកប្រាក់ ២៥ម៉ឺនផោន(ជាង ៣៨ម៉ឺនដុល្លារ)។

អ្នកស្រី Jules O'Dwyer និងឆ្កែឈ្មោះ Matisse បានសម្ដែងរួមគ្នា ក្នុងឈុតឆាកប៉ូលិសចាប់ជនល្មើសលួចសាច់ក្រក។ អ្នកស្រី Jules O'Dwyer បានតែងខ្លួនជាប៉ូលិសស្រី ចំណែកឆ្កែកំពូលឆ្លាតនោះ ធ្វើជាជនល្មើសលួចសាច់ក្រក។

ក្រោយប៉ូលិសស្រីឃាត់ខ្លួនបាន ឆ្កែនោះធ្វើជាប្រគល់ខ្លួនឲ្យប៉ូលិសចាប់តាមសម្រួល ប៉ុន្តែពេលចូលដល់ក្នុងកន្លែងឃុំឃាំងទើបរកវិធីគេចខ្លួនវិញ។ ឆ្កែ Matisse បានផ្លោះបង្អួច លួចដើរលើខ្សែ ប៉ុន្តែត្រូវប៉ូលិសស្រីចាប់បានម្ដងទៀតទាំងពិបាក។ ចុងក្រោយទើបដឹងការពិតថា សាច់ក្រកនោះឆ្កែកំពូលឆ្លាត លួចយកទៅឲ្យឆ្កែជើងបីមួយក្បាលទៀត។

ការសម្ដែងនោះ បានទទួលការចាប់អារម្មណ៍យ៉ាងខ្លាំង និងធ្វើឲ្យអ្នកទស្សនា រួមទាំងគណៈកម្មការសើចបិទមាត់មិនជិត ដោយសារសមត្ថភាពឆ្កែដ៏ឆ្លាតកម្ររកបាន។ អ្នកស្រី Jules បាននិយាយដោយអារម្មណ៍រំភើបរីករាយយ៉ាងខ្លាំងថា "ខ្ញុំមានមោទនភាពណាស់ចំពោះឆ្កែខ្ញុំ... ខ្ញុំមានមោទនភាពចំពោះពួកគេ... នេះមិនមែនជាការពិតទេ"៕

សូមទស្សនាសកម្មភាពសម្ដែងរបស់ម្ចាស់ពានរង្វាន់ Britain's Got Talent 2015៖