ប៉ារីសចាប់ផ្ដើមប្រមូលសោគូស្នេហ៍រាប់តោនចេញពីស្ពាន

2015-06-02 17:24:35
ចំនួនមតិ 0 | ចំនួនចែករំលែក 0

ចន្លោះមិនឃើញ

គូស្នេហ៍ដែលធ្លាប់ចាក់សោជាសក្ខីភាពបញ្ជាក់ទឹកចិត្តស្មោះ លើស្ពាន Pont des Arts នាទីក្រុងប៉ារីស ប្រទេសបារាំង នឹងលែងបានឃើញអនុស្សាវរីយ៍របស់ខ្លួនទៀតហើយ បន្ទាប់ពីអាជ្ញាធរក្រុងចាប់ផ្ដើមប្រតិបត្តិការ កាត់យកសោទាំងនោះចេញកាលពីថ្ងៃអាទិត្យម្សិលមិញ។

ការចាក់សោនៅបង្កាន់ដៃស្ពាន Pont des Arts រួចបោះកូនសោចូលក្នុងទន្លេ Seine ដើម្បីរក្សាស្នេហ៍ស្មោះ គឺជាទម្លាប់របស់គូស្នេហ៍ដែលធ្លាប់ធ្វើអស់មួយសតវត្សទៅហើយ។ អ្នកទេសចរមានគូទាំងនោះ ច្រើនទិញសោចាក់ជាប់ជាមួយបង្កាន់ដៃស្ពាន រួចបោះកូនចូលទៅក្នុងទន្លេ ជាសញ្ញានៃចំណងស្នេហ៍គ្មានទីបញ្ចប់។

ទោះយ៉ាងណា អាជ្ញាធរក្រុងបានសម្រេចចិត្តកាត់យកសោទាំងនោះចេញ ដោយសារភ័យខ្លាចស្ពានដែលមានអាយុកាលតាំងពីសតវត្សទី១៩ មិនអាចទ្រាំទ្រទម្ងន់បាន។ តាមការប៉ាន់ស្មាន សោនៅលើបង្កាន់ដៃស្ពានមានប្រហែល ៧០ម៉ឺនសោ ដែលគិតជាទម្ងន់រាប់តោន។

អភិបាលរងក្រុងប៉ារីស លោក Bruno Julliard ធ្លាប់បានបញ្ជាក់ក្រោយទិវានៃក្ដីស្រលាញ់កាលពីខែកុម្ភៈថា សាលាក្រុងកំពុងប្រយុទ្ធប្រឆាំងប្រពៃណីចាក់សោគូស្នេហ៍លើស្ពាន ដែលកំពុងរីករាលដាលពេញទីក្រុងប៉ារីស ដោយមិនឲ្យប៉ះពាល់អារម្មណ៍អ្នកទេសចរ។

លោកបាននិយាយថា “យើងមិនចង់ឲ្យមានការចាក់សោលើស្ពានទេ… វាដូចជាមិនស្អាត និងគ្រោះថ្នាក់ណាស់។ អភិបាលរងក្រុងវ័យ ៣៤ឆ្នាំរូបនេះបានបន្តទៀតថា “យើងចង់ឲ្យមនុស្សមកលេងប៉ារីស តែមិនចង់ឲ្យចាក់សោលើស្ពាន… មានវិធីផ្សេងទៀតដូចជានិយាយថា “I love you” តាមសារ ឬអ៊ីមែលជាដើម”៕