គ្រួសារអ្នកស្លាប់ដោយរលកកម្ដៅនៅឥណ្ឌាទារសំណងជាង ១៦០០ដុល្លារ

2015-06-04 17:00:45
ចំនួនមតិ 0 | ចំនួនចែករំលែក 0

ចន្លោះមិនឃើញ

រលកកម្ដៅដែលកើនឡើងរហូតដល់ជិត ៥០អង្សានៅឥណ្ឌា បានឆក់យកជីវិតមនុស្សជាង ២៥០០នាក់ហើយ។ ពេលនេះគ្រួសារជនរងគ្រោះនៅរដ្ឋ Andhra Pradesh ដែលជាតំបន់រងការវាយប្រហារខ្លាំងបំផុត បានស្វែងរកសំណងពីរដ្ឋាភិបាលចំនួន ១០ម៉ឺនរូពី(១៦១០ដុល្លារ) សម្រាប់ជនរងគ្រោះម្នាក់ៗ។

២ភាគ៣ នៃចំនួនជនរងគ្រោះទាំងជាង ២៥០០នាក់ គឺជាប្រជាជននៅរដ្ឋ Andhra Pradesh ដែលពេលខ្លះសីតុណ្ហភាពកើនឡើងដល់ចន្លោះពី ៤៥ ទៅ ៤៧អង្សា។ ដើម្បីដោះស្រាយទុក្ខលំបាកខ្លះ ក្រុមគ្រួសារនៃជនរងគ្រោះទាំងនោះ បានទាមទារឲ្យរដ្ឋាភិបាលចេញសំណង ១០ម៉ឺនរូពី(១៦១០ដុល្លារ) សម្រាប់ជនរងគ្រោះម្នាក់ៗ។ នេះបើតាមការចុះផ្សាយលើសារព័ត៌មាន Telegraph របស់ចក្រភពអង់គ្លេស។

ស្ត្រីម្នាក់ឈ្មោះ Chanaga Ratnam បានប្រើទឹកកកដើម្បីរក្សាសពប្ដីរបស់ខ្លួន ទុកឲ្យមន្ត្រីមកត្រួតពិនិត្យមើលថាពិតជាស្លាប់ដោយរលកកម្ដៅមែនឬយ៉ាងណា។ ប្រសិនបើដូច្នោះមែន អ្នកស្រីនឹងទាមទារសំណងពីរដ្ឋាភិបាល។ ទោះយ៉ាងណា ស្ត្រីវ័យ ៥៥ឆ្នាំនេះ មិនអាចមានលទ្ធភាពទិញទឹកកកបន្តទៀតទេ ហើយអ្នកស្រីនឹងបូជាសពប្ដីតាមប្រពៃណីក្នុងស្រុកនាពេលដ៏ខ្លីខាងមុខ។

ទោះយ៉ាងណា លោក N. Chandrababu Naidu ដែលជាប្រធានគណៈរដ្ឋមន្ត្រីនៃរដ្ឋ Andhra Pradesh បានបញ្ជាក់ថា ការធ្វើកោសល្យវិច័យដើម្បីឈានទៅដល់សំណង មិនមែនជាការងាយស្រួលឡើយ។ ពេលនេះ មន្ត្រីក្នុងមូលដ្ឋានបីនាក់ នឹងត្រូវបញ្ជូនទៅពិនិត្យសាកសពដើម្បីបញ្ជាក់ថា មូលហេតុនៃការស្លាប់ អាចបណ្ដាលមកពីរលកកម្ដៅឬមិនមែន។ ប្រសិនបើសពនោះ ត្រូវបានបូជារួច សាក្សី ៥នាក់ ជាទូទៅអ្នកជិតខាង ឬមិត្តភក្ដិ នឹងត្រូវកោះហៅឲ្យទៅបញ្ជាក់ពីមូលហេតុនៃការស្លាប់៕