តារាល្បីៗពិភពលោកដែលមានស្នាដៃធំក្នុងកិច្ចការពារបរិស្ថាន

2015-06-05 18:30:23
ចំនួនមតិ 0 | ចំនួនចែករំលែក 0

ចន្លោះមិនឃើញ

បញ្ហាបរិស្ថានបានក្លាយជាបញ្ហាប្រឈមធំមួយសម្រាប់ពិភពលោកបច្ចុប្បន្ន ខណៈធនធានធម្មជាតិកាន់តែបាត់បង់ ហើយបម្រែបម្រួលអាកាសធាតុ និងគ្រោះធម្មជាតិកាន់តែកើនឡើងរៀងរាល់ថ្ងៃ។ ដើម្បីលើកកម្ពស់ការយល់ដឹង និងចូលរួមចំណែកដោះស្រាយក្នុងបញ្ហាទាំងនេះ តារាល្បីៗជាច្រើននាក់លើពិភពលោក បានប្រើប្រាស់កេរ្តិ៍ឈ្មោះ និងធនធានផ្ទាល់ខ្លួនរបស់ពួកគេក្នុងការងារសង្គមផ្សេងៗជាច្រើន។

ដោយថ្ងៃទី៥ ខែមិថុនា នេះគឺជាទិវាបរិស្ថានពិភពលោក Sabay សូមបង្ហាញពីសកម្មភាពខ្លះៗរបស់តារាល្បីៗអន្តរជាតិដែលមានស្នាដៃលេចធ្លោក្នុងកិច្ចការពារបរិស្ថាន៖

Gisele Bundchen

Gisele Bundchen គឺជាតារាម៉ូដែល ដែលមានចំណូលខ្ពស់ជាងគេក្នុងពិភពលោក ប៉ុន្តែក្នុងការងារបរិស្ថាន តារាវ័យ ៣៤ឆ្នាំរូបនេះក៏មានស្នាដៃលេចធ្លោដែរ។ នាងបានទទួលងារជា “តារាបៃតងឆ្នើមអន្តរជាតិ” កាលពីខែធ្នូឆ្នាំ២០១១ តាមរយៈភាពលេចធ្លោក្នុងការនិយាយ និងផ្ញើសារអប់រំពាក់ព័ន្ធនឹងបរិស្ថាន។ នាងបានបង្កើតក្រុមហ៊ុនលក់ស្បែកជើងមួយ ឈ្មោះ Ipanema Gisele Bundchen ដែលប្រាក់ចំណូលពីក្រុមហ៊ុននេះត្រូវបានបរិច្ចាគសម្រាប់កិច្ចការអភិរក្សតំបន់ព្រៃ Amazon និង Atlantic។

តារាម៉ូដែលរូបនេះក៏បានបង្កើតគម្រោងទឹកស្អាតមួយដែរ ដែលបេសកកម្មនៃគម្រោងនេះ គឺដើម្បីសម្រួលដល់ជីវភាពប្រជាជន និងលើកកម្ពស់ការដាំដុះរុក្ខជាតិ នៅស្រុកកំណើតរបស់នាងគឺទីក្រុង Horizontina ប្រទេសប្រេស៊ីល។ នាងបានទទួលពានរង្វាន់ និងងារជាច្រើនទៀតពាក់ព័ន្ធនឹងស្នាដៃសម្រាប់បរិស្ថាន រួមទាំងតំណែងជាឯកអគ្គរដ្ឋទូតសុឆន្ទៈសម្រាប់អង្គការសហប្រជាជាតិ។

Leonardo DiCaprio

តារាសម្ដែងជួរមុខរបស់អាមេរិករូបនេះ ត្រូវបានគេស្គាល់ច្រើនក្នុងការងារបរិស្ថានតាមរយៈការនិពន្ធ និងផលិតខ្សែភាពយន្តនិយាយពីកម្ដៅពិភពលោក “The 11th Hour”។ ក្រោយមកលោកបានបង្កើតមូលនិធិផ្ទាល់ខ្លួនមួយដើម្បីចូលរួមដោះស្រាយបញ្ហាបរិស្ថានផ្សេងៗដូចជា ការអភិរក្សព្រៃឈើ អនាម័យសមុទ្រ ការប្រើប្រាស់ទឹកស្អាត និងការកែច្នៃថាមពលឡើងវិញ។

DiCaprio គឺជាសមាជិកក្រុមប្រឹក្សារបស់ស្ថាប័នបរិស្ថានជាច្រើនទៀតដូចជា Natural Resources Defense Council, Global Green USA, World Wildlife Fund និង International Fund for Animal Welfare។ ក្រៅពីនេះលោកគឺជាសកម្មជនបរិស្ថានម្នាក់ និងជាអ្នកតំណាងអង្គការសហប្រជាជាតិ ក្នុងផ្នែកគ្រប់គ្រងបញ្ហាបម្រែបម្រួលអាកាសធាតុ។

Maroon 5

ក្រុមចម្រៀងអាមេរិក ដែលជាម្ចាស់ពានរង្វាន់ Grammy និងពានរង្វាន់ Environmental Media Awards កាលពីឆ្នាំ២០០៦ ក៏បានរួមចំណែកធំដែរក្នុងការងារបរិស្ថាន។ តាមរយៈការប្រគំតន្ត្រីទេសចរណ៍បៃតងដែលចាប់ផ្ដើមតាំងពីឆ្នាំ២០០៨ Maroon 5 បានចូលរួមផ្សព្វផ្សាយពីការកែច្នៃសំណល់ឡើងវិញ និងបានបរិច្ចាគប្រាក់លក់សំបុត្រមួយផ្នែកធំសម្រាប់អង្គការ Global Cool។ សមាជិកក្រុម Maroon 5 ក៏ជាអ្នកគាំទ្រសំខាន់របស់សមាគមប្រព័ន្ធផ្សព្វផ្សាយផ្នែកបរិស្ថាន Kiva និង Teen Impact ដែរ។

Edward Norton

តារាសម្ដែងតួវីរបុរសបៃតង “The Hulk” បានចាប់ផ្ដើមការងារបរិស្ថាន ដំបូងតាមរយៈមុខតំណែងជាអគ្គរដ្ឋទូតសុឆន្ទៈរបស់អង្គការសហប្រជាជាតិផ្នែកការពារព្រៃឈើ និងសត្វកម្រ។ Norton ក៏ត្រូវបានទទួលស្គាល់ច្រើនដែរតាមរយៈការងារក្នុងកម្មវិធី BP Solar Neighbors ដែលបានប្រមូលមូលនិធិទិញបន្ទះ Solar សម្រាប់ក្រុមគ្រួសារប្រជាជនដែលមានជីវភាពខ្វះខាត។

តារាវ័យ ៤៥ឆ្នាំរូបនេះ ក៏ជាអ្នកគាំទ្រកម្មវិធីបរិស្ថាន The Wilderness Society and Earthjustice ម្នាក់ដែរ និងធ្លាប់ជាពិធីករម្នាក់ក្នុងកម្មវិធី Strange Days on Planet Earth ក្នុងប៉ុស្តិ៍ National Geographic។ លោកក៏ជាសមាជិកសកម្មម្នាក់ដែររបស់ Friends of the High Live ដែលជាអង្គការមានយុទ្ធនាការរក្សានិងកសាងតំបន់បៃតងក្នុងទីក្រុងញីវយ៉ក។

Brad Pitt

ក្រៅពីមានកេរ្តិ៍ឈ្មោះល្បីល្បាញក្នុងការងារមនុស្សធម៌ តារាសម្ដែងរឿង "Furry” ក៏ជាសកម្មជនបរិស្ថានម្នាក់ដែរ។ តារាវ័យ ៥១ឆ្នាំរូបនេះបានបង្កើតមូលនិធិ Make It Right ដើម្បីកសាងផ្ទះ ១៥០ខ្នង នៅទីក្រុង New Orleans ប្រទេសម៉ិកស៊ីកូ និងហេដ្ឋារចនាសម្ព័ន្ធជាច្រើនដែលផ្ដល់ផលប្រយោជន៍ដល់បរិស្ថាន។ តាមរយៈការងារនេះ ក្រុមប្រឹក្សា U.S. Green Building បានសរសើរតារារូបនេះចំពោះការបង្កើតសហគមន៍បៃតងធំបំផុតក្នុងពិភពលោក។

Pitt បានបរិច្ចាគប្រាក់ច្រើនជាង ៥លានដុល្លារម្នាក់ឯង សម្រាប់មូលនិធិនេះ ហើយមូលនិធិមួយទៀតគឺមូលនិធិ Jolie-Pitt ក៏បានជួយដល់យុទ្ធនាការអភិរក្សជីវិតសត្វព្រៃ និងធនធានធម្មជាតិផ្សេងៗជាច្រើនដែរ ៕

ចុចអាន៖តារាល្បីៗវ័យក្មេង ៨រូប ដែលមានផ្ទះផ្ទាល់ខ្លួនថ្លៃរាប់លានដុល្លារ

ចុចអាន៖តារាហូលីវូដភាគច្រើនសង្ហាៗ តែដឹងថាកម្ពស់ពិតប៉ុន្មានអត់?

ប្រែសម្រួល៖ វ៉ាន់ថន ប្រភព៖ cnn ,cnbc