ម្ដាយរបស់ Ronaldo ត្រូវបានឃាត់ខ្លួន

2015-06-09 15:35:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ម្ដាយរបស់តារាឆ្នើម Cristiano Ronaldo ក្លិប Real Madrid ត្រូវបានឃាត់ខ្លួនរយៈពេលខ្លី នាប្រលានយន្តហោះ Barajas ទីក្រុង Madrid ដោយសារតែដាក់លុយក្នុងវ៉ាលី លើសចំនួន៥ដង ដែលច្បាប់បានហាមឃាត់។ នេះបើតាមសេចក្ដីរាយការណ៍ពីអេស្ប៉ាញ។

បើយោងតាម El Mundo បានឲ្យដឹងថា អ្នកស្រី Dolores Aveiro ដែលជាម្ដាយរបស់ Ronaldo បានដាក់លុយក្នុងវ៉ាលីប្រមាណ ៥៥ ០០០អឺរ៉ូ (ជាង៦២ពាន់ដុល្លារ) មុនឡើងយន្តហោះកាលពីខែឧសភា ធ្វើដំណើរពីអេស្ប៉ាញ ទៅកាន់ប្រទេសព័រទុយហ្គាល់។

ក្រោយមកមន្ត្រីត្រួតពិនិត្យនៅប្រលានយន្តហោះ Barajas ក៏បានឃាត់ខ្លួនអ្នកស្រី Aveiro វ័យ៦១ឆ្នាំរយៈពេលខ្លី ព្រោះតែអ្នកស្រីដាក់លុយលើសចំនួន ដែលច្បាប់កំណត់ឲ្យដាក់ត្រឹមតែ ១០ ០០០អឺរ៉ូ សម្រាប់ការធ្វើដំណើរទៅក្រៅប្រទេស។

យ៉ាងណាក្ដី សកម្មភាពទាំងអស់នេះ មិនមែនជាបទឧក្រិដ្ឋអ្វីឡើយ គ្រាន់តែបទល្មើសរដ្ឋបាលប៉ុណ្ណោះ ដូច្នេះអ្នកស្រីត្រូវបានគេដកលុយចំនួន ៤៥ ០០០អឺរ៉ូទុក ហើយប៉ុន្មាននាទីក្រោយមក អ្នកត្រួតពិនិត្យក៏អនុញ្ញាតឲ្យអ្នកស្រីបន្តដំណើរបាន ប៉ុន្តែអ្នកស្រីនឹងត្រូវបង់ការផាកពិន័យដល់អាជ្ញាធរពន្ធមួយចំនួនទៀត ដើម្បីយកលុយ ដែលគេដកហូតរបស់អ្នកស្រីមកវិញនៅពេលក្រោយ៕

-ចុចអាន៖ Bale ស្លាបឆ្វេង Ronaldo កណ្ដាល ជាយុទ្ធសាស្ត្រថ្មីរបស់ Real Madrid

ប្រែសម្រួល៖ វិន ជីវ័ន្ត ប្រភព៖ goal | sport-english