អតីតជយលាភីលេខ១ប្រឡងចម្រៀងទូទាំងប្រទេស រត់មកលេងកំប្លែង
- 2015-06-09 20:43:29
- ចំនួនមតិ 0 | ចំនួនចែករំលែក 0
អតីតជយលាភីលេខ១ប្រឡងចម្រៀងទូទាំងប្រទេស រត់មកលេងកំប្លែង
ចន្លោះមិនឃើញ
អៀង ចេនឡា អតីតបេក្ខភាពជយលាភីលេខ១ផ្នែកចម្រៀងឆ្លងឆ្លើយទូទាំងប្រទេសក្នុងកម្មវិធីប្រឡងចម្រៀងណេសកាហ្វេ បានរត់មកលេងកំប្លែងវិញ ក្រោយអាជីពចម្រៀងហាក់មុជមិនជ្រៅទៅមិនឆ្ងាយ។
ចេនឡា ប្រាប់ថា លោកប្រឡូកអាជីពចម្រៀងជាង១០ឆ្នាំ ពោលគឺតាំងពីឆ្នាំ ១៩៩៦ប៉ុន្តែនៅតែដដែល ទ្រព្យសម្បត្តិដុំកំភួនអីមួយក៏គ្មាន។ ដូច្នេះហើយ ដោយសារកត្តានេះផង ផ្សំនឹងឱកាសផង លោកក៏បានឈានមកចាប់អាជីពកំប្លែងតែម្ដង។ យ៉ាងណា អាជីពចម្រៀងដែលលោកខំតស៊ូរហូតទទួលជយលាភីលេខ១នោះ ក៏មិនចោលដែរ ដោយនៅតែឆ្លៀតចេញច្រៀងតាមកម្មវិធីនានាម្ដងម្កាលដែរ។
លោក រំលឹកថា លោកមានទំនាក់ទំនងរាប់អានជាមួយ ប្រិមប្រិយ និងនាយក្រិន ហើយគ្រាមួយនោះ តារាកំប្លែងទាំងពីរដួងនេះ បានសួរនាំលោករឿងលេងកំប្លែងនេះ លោកក៏ចាប់អារម្មណ៍ ហើយក៏បានសាកល្បង ដោយចូលរួមសម្ដែងក្នុងក្រុមកំប្លែងរបស់នាយ ក្រិន ដែលមានសមាជិកទាំងអស់ ៨នាក់ អស់ពេលប្រមាណជា៣ខែមកហើយ។
ក្រុមនេះ គឺសម្ដែងប្រចាំនៅស្ថានីយទូរទស្សន៍អាស៊ីអាគ្នេយ៍រៀងរាល់ល្ងាចថ្ងៃសៅរ៍ និងថ្ងៃអាទិត្យ។ "ពេលដំបូងពិបាកដែរបង ព្រោះអត់ធ្លាប់តែបានប្រិមប្រិយ នាយក្រិន បងហុងដា និយាយទៅរៀមច្បងក្នុងក្រុមជួយណែនាំ ឥឡូវចេះតែលេងបានហើយ!” ចេនឡា បន្ថែម។
បើទោះជាអាជីពបន្ថែម តារាចម្រៀងវ័យ ៣១ឆ្នាំរូបនេះ ប្រាប់ថា លោកកំពុងសប្បាយរីករាយ និងជំនក់ចិត្តជាមួយអាជីពនេះណាស់។ "ខ្ញុំស្រឡាញ់អាជីពរបស់ខ្ញុំជាអ្នកកំប្លែងនេះខ្លាំងណាស់ ព្រោះថា ខ្ញុំខ្លួនឯងក៏ចូលចិត្តលេងសើច ដល់បានលេងកំប្លែងគឺបានផ្ដល់ឲ្យបងប្អូនគាត់សប្បាយរីករាយ ទៀត ហើយពួកគាត់ស្រឡាញ់ចូលចិត្តយើងណាស់ ធៀបនឹងចម្រៀង គឺខ្ញុំស្រឡាញ់អាជីពកំប្លែងនេះជាង និយាយទៅ បន់ឲ្យតែដល់ម៉ោង នឹងអាលបានសម្ដែង"។
អៀង ចេនឡា បានចូលសិល្បៈតាំងពីឆ្នាំ ១៩៩៦ តាមរយៈប្រឡងចំរៀងនៅទូរទស្សន៍ជាតិ ក្នុងកម្មវិធីទិវាកុមារអន្តរជាតិ ជាប់ចំណាត់ថ្នាក់លេខ៣។ លុះនៅឆ្នាំ ២០០៥ បានប្រឡងចំរៀង ណេសកាហ្វេទូទាំងប្រទេស ជាប់ចំណាត់ថ្នាក់លេខមួយ ផ្នែកចំរៀងឆ្លងឆ្លើយទៀត។ បន្ទាប់ពីនោះមក លោកចាប់ផ្ដើមអាជីពចម្រៀងតាមភោជនីយដ្ឋាន និងតាមកម្មវិធីទូរទស្សន៍នានា។
បច្ចុប្បន្នក្រៅពីអាជីពកំប្លែង និងចម្រៀង អៀង ចេនឡា ក៏រវល់ថតរឿងសម្រាប់ដាក់បញ្ចាំងនៅទូរទស្សន៍ ETV និង My TV ផងដែរ៕
អៀង ចេនឡា(រូបទី២រាប់ពីឆ្វេង)
រូបភាព៖ ផ្ដល់ដោយ ចេនឡា
អត្ថបទ៖ ទារិកា