បុរសម្នាក់តែងខ្លួនជាស្រីដើម្បីប្រលងជួសសង្សារសំណព្វចិត្ត

2015-06-10 16:22:38
ចំនួនមតិ 0 | ចំនួនចែករំលែក 0

ចន្លោះមិនឃើញ

ដោយសារខ្លាចសង្សារសំណព្វរបស់់ខ្លួនពិបាកចិត្ត បុរសម្នាក់បានព្យាយាមតែងខ្លួនជាមនុស្សស្រី ដើម្បីប្រលងជំនួសនាង។ ទោះយ៉ាងណា ការប៉ុនប៉ងប្រលងជួសនោះ មិនបានសម្រេចទេ ហើយត្រូវអនុរក្សឃាត់ខ្លួន បន្ទាប់ពីនិយាយចេញសំឡេងមនុស្សប្រុស។

បុរសជនជាតិកាហ្សាក់ស្ថានឈ្មោះ Ayan Zhademov បានព្យាយាមតែងខ្លួនជាមនុស្សស្រីដូចសង្សារវ័យ ១៧ឆ្នាំរបស់ខ្លួន ដើម្បីប្រលងជួសនាងពេលបញ្ចប់ការសិក្សា។ សង្សាររបស់ Ayan បានប្រាប់លោកថា នាងមានការព្រួយបារម្ភចំពោះការប្រលងចូលថ្នាក់សាកលវិទ្យាល័យ ដែលនឹងឈានចូលមកដល់ក្នុងពេលឆាប់ៗ។

ដោយសារលួងសង្សារមិនបាត់ ទើបបុរសវ័យ ២០ឆ្នាំនេះ មានគម្រោងនឹកស្មានមិនដល់មួយ គឺបន្លំខ្លួនជានាង រួចប្រលងជួសដើម្បីឲ្យនាងបានសប្បាយចិត្តឡើងវិញ។ លោក Ayan បានពាក់សក់ខ្មៅក្លែងក្លាយ ផាត់មុខ និងពាក់អាវស ស្លៀកសំពត់ប្រផេះរបស់សង្សារ។

បន្ទាប់ពីតុបតែងខ្លួន លោក Ayan បានព្យាយាមចូលទៅក្នុងមណ្ឌលប្រលងនៅក្រុង Zhetisai ភាគខាងត្បូងប្រទេសកាហ្សាក់ស្ថាន។ ទោះយ៉ាងណា អនុរក្សបានសង្កេតឃើញថា បេក្ខភាពប្រលងរូបនេះ មានមុខមាត់ប្លែកពីកាត និងឃាត់ខ្លួនដើម្បីធ្វើការសាកសួរ។

អ្នកនាំពាក្យរបស់គណៈកម្មការប្រលងបាននិយាយថា "យើងសង្ស័យថា ប្រហែលជាមនុស្សស្រីផ្សេងមកប្រលងជួស តែមិនសង្ស័យថាជាមនុស្សប្រុសទេ... ទាល់តែចាប់ផ្ដើមនិយាយទើបដឹង"។ អ្នកនាំពាក្យរូបនេះ បានបន្តទៀតថា "គេព្យាយាមនិយាយសំឡេងខ្ពស់ ប៉ុន្តែវានៅតែច្បាស់ថាជាមនុស្សប្រុស"។

លោក Ayan ត្រូវពិន័យជាប្រាក់ជាង ២ពាន់ដុល្លារសម្រាប់ការក្លែងបន្លំនេះ ប៉ុន្តែរូបលោកបានទទួលការកោតសរសើរពីសិស្សដទៃទៀតថាជាមនុស្សដែលមានក្ដីស្នេហ៍ដ៏រ៉ូមែនទិក។ លើសពីនេះ អ្នកជំនួញម្នាក់នៅក្នុងតំបន់ ថែមទាំងទាំងបង់ប្រាក់ពិន័យចំនួនបុរសស្មោះស្នេហ៍ផងដែរ។ ចំណែកនារីដែលសង្សារសំណព្វចិត្តប្រលងជួស ត្រូវរង់ចាំដល់ឆ្នាំក្រោយ ទើបអាចប្រលងឡើងវិញម្ដងទៀត។

សិស្សស្រីម្នាក់ឈ្មោះ Dariga Nesterova បាននិយាយថា "វាជារឿងឆ្កួតៗ តែរ៉ូមែនទិកខ្លាំងណាស់... ពេលខ្លះស្នេហាអាចឲ្យយើងធ្វើរឿងប្លែកៗ... ខ្ញុំចង់ឲ្យមិត្តប្រុសខ្ញុំរ៉ូមែនទិកបែបនេះ"។ ចំណែកសិស្សម្នាក់ទៀតឈ្មោះថា Goga Korzhova បានរៀបរាប់ថា "នាងពិតជាសំណាងណាស់ ដែលមានបុរសក្លាហានដូចនេះ... ហ៊ានប្រថុយគ្រោះថ្នាក់គ្រប់យ៉ាងដើម្បីនាង"៕