សង្សារជាប់ទៅរៀនស្រុកក្រៅ អ្នកព្រមអោយទៅអត់?

2015-05-24 17:40:11
ចំនួនមតិ 0 | ចំនួនចែករំលែក 0

ចន្លោះមិនឃើញ

សិក្សានៅបរទេស គឺជា បំណងប្រាថ្នាដ៏ធំរបស់យុវវ័យខ្មែរស្ទើរគ្រប់រូបតែស្នេហាក៏ជាសេចក្តីត្រូវការរបស់វ័យដ៏ស្រស់បំព្រងមួយដែរ។

នៅថ្ងៃនេះ យុវវ័យមួយចំនួនបានបញ្ចេញទស្សនៈលើសំណួរថា សង្សារទៅរៀនស្រុកឆ្ងាយគួរចាំគេទេ?

រូបតំណាង

កញ្ញា បានីកា និស្សិតឆ្នាំទី ៤ ផ្នែកទេសចរ នៃសាកលវិទ្យាល័យ NUM បង្ហាញទស្សនៈថា ការនៅឆ្ងាយពីគ្នា ស្នេហាងាយនិងប្រេះឆាណាស់ ដូច្នេះមិនគួរសន្យាចំពោះគ្នាច្រើនពេកទេដូចពាក្យចាស់លោកថា ឃ្លាតឆ្ងាយណាយចិត្ត។

“ យើងគិតមើលមនុស្សយើង បើមិនដឹងនៅចំពោះមុខគ្នានិយាយអីក៏អាចដោះស្រាយបានដល់និយាយគ្នាតាមទូរសព្ទជួនកាលសំឡេងធ្វើអោយយល់ផ្សេង បើផ្ញើសារទៀតជួនកាលអានទៅមានអារម្មណ៍ផ្សឹង ចុះទម្រាំនៅឆ្ងាយពីគ្នារាប់ឆ្នាំទៀត? គេនៅឯណោះក៏ជួបមនុស្សច្រើន យើងនៅឯណេះក៏មិនដឹងថា នឹងជួបរឿងអីខ្លះ។ កាលៈទេសៈខ្លះធ្វើអោយមនុស្សយើងមិនអាចរឹងរូសបានទេបង! ជួនកាលយើងត្រូវតែផ្លាស់ប្ដូរដែរហ្នឹង។ សម្រាប់ខ្ញុំ ខ្ញុំយល់ថាបើគេទៅឆ្ងាយរឺខ្ញុំទៅឆ្ងាយ យើងមិនសន្យាអីទំាងអស់ ចាំពេលណាពេលហ្នឹងទៅ។ យើងនៅរក្សាទំនាក់ទំនងគ្នា តែកុំសន្យា។”

ប៉ុន្តែយុវជន ឯក ភូមិ ម្ចាស់ហាងគ្រឿងសំណង់សុកហុកថ្មីលើកឡើងថា ស្នេហារឹងមំាចាំបួនប្រាំឆ្នាំក៏មិនអីដែរ។

“អ្វីៗសំខាន់លើចិត្តយើង។ បើស្រលាញ់គ្នាមែនគឺយើងត្រូវគិតមើលលើកាលៈទេសៈ រៀបចំផែនការ។ បើមានឱកាសល្អយើងត្រូវចេះបរិច្ចាគ បែកដើម្បីអនាគត។ យើងអោបក្រសោបគ្នា ហើយក្រអត់ប្រាក់ តើស្នេហាយើងស្ថិតស្ថេរដែរអត់? គឺអត់ទេ!សំខាន់យើងត្រូវមានផែនការ បើយើងពិតជាស្រលាញ់គ្នាមែន! ឃ្លាតឆ្ងាយណាយចិត្តវាមិនត្រូវទាំងស្រុងទេ។មនុស្សម្នាក់ៗមានជំហរខុសគ្នា”។

ជាមួយនោះដែរ យុវជនទី សូណារិទ្ធិ និស្សិតផ្នែកទស្សនវិជ្ជាឆ្នាំ ៤ លើកឡើងថា ការទៅរៀនស្រុកក្រៅជារឿងល្អសម្រាប់យុវវ័យគ្រប់រូប ដូច្នេះអោយតែមានឱកាសត្រូវតែទៅ។

“បើសង្សារខ្ញុំវិញ អោយតែគេមានឱកាសខ្ញុំ និង ជំរុញថែម ។ ការសិក្សាជាអ្វីៗទាំងអស់ គ្មានការសិក្សា គឺគ្មានអនាគត។ យើងមិនត្រូវគិតខ្លីមិនត្រូវអាត្មានិយមទេ។ បើខ្ញុំវិញក៏ដូចគ្នា ឧទាហរណ៍ថាខ្ញុំជាប់ ខ្ញុំនឹងប្រាប់នាងថា ខ្ញុំនៅតែរក្សាចិត្តខ្លួនឯងអោយបាន បើយើងស្រលាញ់គ្នាយើងត្រូវទុកចិត្តគ្នា។ មានវិជ្ជាទើបមានអនាគត មានអនាគតទើបស្នេហាយើងបានជួបជុំ”។

ចុះចំណែកអ្នកវិញ អោយសង្សារទៅរៀនស្រុកឆ្ងាយដែរទេ?

សូមចុចអាន៖ ហេតុផល៥ អ្នករៀបការថ្មីថ្មោង គួរទុកដាក់លុយកាក់រួមគ្នា

សូមចុចអាន៖ ភ្ជាប់ពាក្យរួចសឹមរៀបការ និង រៀបការតែម្ដងមួយណាប្រសើរជាង?

សូមចុចអាន៖ ៤ យ៉ាង អ្នកតែងតែយល់ច្រឡំថា គេក៏ស្រលាញ់យើងដែរ