សូ វិសាល បានតំណែងតួឯកម្ដងស្ងាត់មួយរយៈ ឥឡូវល្បីថា ត្រៀមថតរឿងថ្មី

2014-09-16 17:40:03
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែង លោក សូ វិសាល ធ្លាប់បានសម្ដែងតួឯកម្ដងក្នុងរឿង "ទុកក្រមុំឲ្យម៉ែមើល" កាលពីជិត ១ ឆ្នាំមុននោះ តែឥឡូវនេះ ស្ងាត់មួយរយៈពីពិភពសិល្បៈ។ ប៉ុន្ដែ លោក សូ វិសាល ប្រាប់គេហទំព័រ Sabay ថា នៅអំឡុងឆ្នំាដើមឆ្នាំ ២០១៥ លោកត្រៀមថតរឿងថ្មី។

សូមចុចអាន៖ តារាល្បីៗខ្មែរ-ថៃ ស្អាតៗអស់ទាស់ក្នុងព្រឹត្តិការណ៍សម្ពោធទូរទស្សន៍ ETV យប់មិញ!

លោក សូ វិសាល ប្រាប់មូលហេតុនៃការបាត់មុខពីសិល្បៈតាមរយៈ Sabay ថា លោកមិនបានបោះបង់ចោលសិល្បៈនោះទេ ពោល គឺលោកនៅតែធ្វើការជាមួយវិស័យសិល្បៈដដែល គ្រាន់តែផ្អាកកុនមួយរយៈសិន មកធ្វើជាអ្នកកាត់តវីដេអូវិញម្ដង។ បច្ចុប្បន្ននេះ តារារូបនេះកំពុងធ្វើជាអ្នកកាត់តវីដេអូឲ្យផលិតកម្ម FCI របស់លោក គាំ ចន្ធី។

លោក វិសាល បានឲ្យដឹងទៀតថា ចាប់តាំងពីលោក គាំ ចន្ធី ចេញទៅរស់នៅ អាមេរិកមក ការងារសិល្បៈរបស់លោកបានផ្អាកទាំងស្រុង ទាំងការសម្ដែងក៏ដូចជា ធ្វើពិធីករ។ មុននេះ វិសាល ធ្លាប់ធ្វើជាពិធីករឲ្យកម្មវិធី ២ ផ្សេងគ្នា ក្នុងនោះមានកម្មវិធី "សុខភាពជាសំខាន់" TV5 និង កម្មវិធី "នេះជាជីវិត” TV 9។

ក្រៅពីរឿង "ទុកក្រមុំឲ្យម៉ែមើល" ដែលលោកបានសម្ដែងជាតួឯកជាមួយ កញ្ញា សារ៉ាយ ព្រះកាយចន្ទ័ តារារូបនេះក៏ធ្លាប់បានថតរឿងមួយទៀតឈ្មោះថា "ភ្លើងព្យាបាទ" និង ស្ប៉តពាណិជ្ជកម្មមួយចំនួនផងដែរ។

ការមកចាប់អាជីពជាអ្នកកាត់តវីដេអូនេះ លោក សូ វិសាល លើកឡើងថា ជាការផ្លាស់ប្ដូរបទពិសោធន៍ការងារមួយ ព្រោះមនុស្សម្នាក់ត្រូវការបទពិសោធន៍ច្រើនសម្រាប់ជីវិត។

លោក សូ វិសាល បានបង្ហើបប្រាប់ជាចុងក្រោយថា នៅដើមឆ្នាំ ២០១៥ លោកគ្រោងសម្ដែងរឿងថ្មីមួយទៀតដើម្បីបំបែកភាពស្ងប់ស្ងាត់ ព្រោះតាមដឹង ផលិតករ គាំ ចន្ធី ដែលជា ថៅកែ របស់លោកនឹងត្រឡប់មកពីអាមេរិក មកប្រទេសកម្ពុជាវិញនៅ ចុងឆ្នាំនេះ ដើម្បីថតរឿងថ្មីមួយទៀត៕

សូមចុចអាន៖ ដួង ហ្សូរីដា រវល់រហូតគ្មានពេលសម្រកទម្ងន់