៥យ៉ាងមិនគួរលាតត្រដាងនៅកន្លែងការងារ

2015-06-11 18:41:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ការងារនាំប្រាក់ចំណូល នាំការរីករាយ និងបទពិសោធន៍ ប៉ុន្តែក៏អាចជួបរឿងធុញថប់ច្រើន នៅពេលបរិយាកាសមិនល្អ។ ដោយសារបែបនេះ ទើបបុគ្គលិកមួយចំនួន មិនអាចគ្រប់គ្រងអារម្មណ៍បាន រហូតរៀបរាប់តាមបណ្ដាញសង្គម និងប្រាប់អ្នករួមការងារ។ ទាំងនេះសុទ្ធតែនាំផលអវិជ្ជមានចំពោះខ្លួន ប៉ុន្តែនៅមានរឿងរ៉ាវជាច្រើនទៀតដែលមិនគួរលាតត្រដាងនៅកន្លែងការងារ។

ចំណុច ៥យ៉ាងខាងក្រោមនេះ មិនគួរលើកមកនិយាយនៅកន្លែងការងារឡើយ៖

១. ប្រាក់ខែ

ប្រាក់ខែជារឿងឯកជនបំផុត និងមិនគួរលាតត្រដាងផ្ដេសផ្ដាសឡើយ ហើយប្រសិនបើនៅកន្លែងការងារទៀត រឹតតែមិនត្រូវនិយាយ។ មិត្តរួមការងារដែលកំពុងអង្គុយជិតអ្នក អាចមានប្រាក់ខែតិចជាង ឬលើសអ្នក ទៅតាមសមត្ថភាពជាក់ស្ដែង។ ដូចនេះប្រសិនបើ ទំហំប្រាក់ខែដែលក្រុមហ៊ុនផ្ដល់ឲ្យអ្នកទម្លាយចេញមក នឹងនាំឲ្យមានការច្រណែន ឬអាក់អន់ស្រពន់ចិត្ត ធ្លាក់គុណភាពការងារជាក់ជាមិនខាន។ ទោះយ៉ាងណា បញ្ហានេះអាចលើកមកពិភាក្សាជាមួយមេ និងមនុស្សមួយចំនួនដែលមិនធ្វើឲ្យប៉ះពាល់ដល់ដំណើរការការងារបាន។

២. អារម្មណ៍អវិជ្ជមានចំពោះការងារ

ការងារល្អយ៉ាងណា ក៏មានពេលខ្លះជួបភាពធុញថប់ កើតជាអារម្មណ៍ស្អប់មួយពេល ទៅតាមបរិយាកាស ប៉ុន្តែមិនគួរបង្ហាញចេញមកក្រៅជាសាធារណៈឡើយ។ បញ្ចេញអារម្មណ៍មិនល្អនៅកន្លែងការងារ អាចនាំអ្នកនៅជុំវិញបាត់ភាពរីករាយ និងនាំផលអវិជ្ជមានដល់ខ្លួន។ ម្យ៉ាងវិញទៀត ជៀសវាងដាច់ខាតការជះកំហឹងតាមបណ្ដាញសង្គមនានា ព្រោះវាអាចឲ្យអ្នកដទៃមើលឃើញពីចំណុចខ្សោយរបស់ក្រុមហ៊ុន។ ប្រសិនបើមានបញ្ហា គួរពិភាក្សាចំមនុស្សតែម្ដង... ឧទាហរណ៍ មេកើយ ឬប្រធានផ្នែកបុគ្គលិក។

៣. អារម្មណ៍អវិជ្ជមានចំពោះអ្នករួមការងារ ឬមេកើយ

ជាទូទៅ អ្នកប្រាកដជាមានពេលទទួលទានអាហារជុំគ្នាជាមួយមិត្តរួមការងារ ដែលជាវេលានាំទៅដល់ការពិភាក្សាគ្នាពីរឿងផ្សេងៗ។ ទោះយ៉ាងណា មិនគួរលើកយកបុគ្គលិកណាម្នាក់ក្នុងកន្លែងការងារជាប្រធានបទឡើយ។ ចៀសវាងការលើកឡើងពីចំណុចអាក្រក់របស់អ្នករួមការងារប្រាប់អ្នកផ្សេង បើទោះបីបញ្ហានោះធ្វើឲ្យអ្នករង្កៀសចិត្តយ៉ាងណាក៏ដោយ ប៉ុន្តែត្រូវលើកបញ្ហានេះទៅមេផ្ទាល់ ឬផ្នែកគ្រប់គ្រងបុគ្គលិកតែម្ដង ដើម្បីស្វែងរកដំណោះស្រាយ ជាជាងបង្កើនអារម្មណ៍អវិជ្ជមានបន្ថែមទៅអ្នកដទៃ។

៤. បញ្ហាសុខភាព

បុគ្គលិកភាគច្រើន ពេលសុំច្បាប់ឈប់សម្រាក ច្រើនប្រើហេតុផលថាឈឺមិនអាចធ្វើការបាន ហើយពេលខ្លះទៀតវាគ្រាន់តែជាលេស មិនមែនមូលហេតុពិតផងក៏មាន។ ចំណែកអ្នកខ្លះទៀត ច្រើនប្រាប់មិត្តរួមការងារថា ខ្លួនមានជំងឺប្រចាំកាយ ឬឧស្សាហ៍ឈឺជាញឹកញាប់...។ ទាំងនេះ មានត្រឹមតែ ផលអវិជ្ជមានប៉ុណ្ណោះ ព្រោះស្ថានភាពរបស់អ្នកនឹងក្លាយជាការពិចារណាវាយតម្លៃរបស់មេកើយ។ ចែករំលែក ទម្លាប់ធ្វើឲ្យសុខភាពល្អ កីឡា និងការហាត់ប្រាណ ប្រហែលជាអាចស្វែងរកគុណសម្បត្តិពីការងារច្រើនជាង។

៥. កំពុងស្វែងរកការងារថ្មី

បើអ្នកកំពុងប្រមាញ់ការងារថ្មី ចូលរក្សាភាពស្ងៀមស្ងាត់ មិនត្រូវនិយាយប្រាប់អ្នករួមការងារឲ្យដឹងឡើយ។ អ្នកអាចត្រូវការពេលវេលាដែលកំពុងធ្វើការនេះ ដើម្បីស្វែងរកប្រភពការងារថ្មី ហើយមិត្តរួមការងារនឹងមិនមានអារម្មណ៍អវិជ្ជមានចំពោះអ្នក។ ពេលខ្លះទៀត គម្រោងចាកចេញរបស់អ្នកអាចធ្វើឲ្យជ្រួលច្របល់ដល់បុគ្គលិកនានា ព្រមទាំងនាំឲ្យធ្លាក់ចុះគុណភាពការងារ...៕

ចុចអាន៖ ហេតុផល ៧យ៉ាង ធ្វើឲ្យអ្នកបរាជ័យក្នុងអាជីព

ដោយ៖ គង់ វិសាល ប្រភព៖ careeraddict