យុវវ័យចេះតែធ្វើការយកលុយចាយ ចុះចេះសន្សំហើយឬនៅ?

2015-06-11 21:27:20
ចំនួនមតិ 0 | ចំនួនចែករំលែក 0

ចន្លោះមិនឃើញ

យុវវ័យជាពិសេសប្រុសៗ ឱ្យតែបើកលុយ ពាក់កណ្ដាលខែមិនទាន់ទេ ដឹងតែថ្ងូរអត់លុយចាយហើយ។ មូលហេតុអ្វី? ពួកគេចេះសន្សំលុយហើយឬនៅ? តាមរបៀបណា? សូមស្ដាប់បទសម្ភាសន៍របស់យុវវ័យជាមួយ Sabay ដូចខាងក្រោម៖

មាឌធំរាងធាត់ ខេវិន បុគ្គលិកផ្នែកទីផ្សារក្រុមហ៊ុនកូកាកូឡា បានប្រាប់ Sabay មិនលាក់លៀមថា ប្រាក់ខែលោកជាង៣០០ដែរ ប៉ុន្តែចាយស្រួលមិនស្រួល ដាច់ខ្យល់ពាក់កណ្ដាលខែ។ ខេវិន ថាបើកប្រាក់ខែមក លោកត្រូវបង់ថ្លៃផ្ទះទឹកភ្លើង ហូបចុក និងដើរលេងជាមួយមិត្តភ័ក្ដិ ដែលអ្វីទាំងនេះធ្វើឱ្យលោកចាយសល់ថ្ងៃរហូត។

អ្នកខេត្តកំពង់ចាមប្រាប់ថា ដោយធុញនឹងជំងឺចាយមិនគ្រប់ លោកបានកំណត់ខ្លួនឯង ធ្វើយ៉ាងណាឱ្យសល់១៥០ដុល្លារក្នុងមួយខែ ដោយត្រូវកាត់បន្ថយការដើរហើរ ថ្លៃសាំងម៉ូតូ ថ្លៃអាហារហូបចុក និងកាហ្វេជាដើម ៖«ពីមុនបាយមួយពេល១ម៉ឺន ឱ្យមកត្រឹម៧ពាន់ ជិះម៉ូតូមួយថ្ងៃពីរលីត្រ ឱ្យមកត្រឹម១លីត្រ និងដើរឈប់ផឹកស៊ីជាមួយមិត្តភ័ក្ដិ។ ខែនេះខ្ញុំសល់១៥០ដុល្លារ នៅក្នុងកុងធនាគារ ទុកគ្រាន់ទិញត្រាក់ទ័រភ្ជួរដី»។

បុគ្គលិករោងចក្រកញ្ញា សុផានិត ដែលមានប្រាក់ខែប្រហែល៣០០ដុល្លារដែរនោះ ប្រាប់ថានាងក៏ធ្លាប់ជួបបញ្ហានេះម្ដងម្កាលដែរ ដូចជាចាយហួសហេតុ លើសំលៀកបំពាក់ គ្រឿងក្រអូប និងការចំណាយផ្សេងៗ។ អ្នកស្រុកចម្ការលើលើកឡើងថា ការចាយលុយមិនដឹងក្បាលកន្ទុយ ធ្វើឱ្យកញ្ញាជួបការលំបាកច្រើន។ ចងចាំទុកជាមេរៀន នារីសម្បុរស្រអែម បានកំណត់ការចាយវាយ និងរៀនពីរបៀបសន្សំប្រាក់ ដោយបានជ្រើសរើសការលេងតុងទីនជាមួយមិត្តរួមការងារ ៖«បើអត់លេង! អត់សល់! ចឹងចេះតែលេងនឹងគេឯងទៅ»។

មុខប្រជាប្រិយ សក់រួញអង្គាដី លោក រស់ សារ៉ែន ជាបុគ្គលិកស្ថាប័នមីក្រូហិរញ្ញវត្ថុមួយ ក្នុងទីក្រុងភ្នំពេញ ហើយបច្ចុប្បន្នលោកមានប្រាក់បៀវត្សរ៍ជាង៤០០ដុល្លារអាមេរិក។ ដោយធ្លាប់ឆ្លងកាត់ភាពក្រខ្សត់ កាលមករៀននៅភ្នំពេញដំបូង រូបលោកមិនហ៊ានចាយខ្ជះខ្ជាយទេ ហើយប្រាក់ខែប៉ុណ្ណឹង លោកអាចចាយគ្រប់គ្រាន់ និងសល់ខ្លះៗតាមការសន្សំ។

«ខ្ញុំចំណាយលើអ្វីដែលចាំបាច់ ហើយខ្ញុំសន្សំលុយក្នុងកុង។ យុវវ័យគួរតែគិតគូរ ពីឥលូវនេះទៅទម្រាំដល់ពេលត្រូវការធ្វើអ្វីមួយ លុយសន្សំនឹងអាចជួយដោះស្រាយបាន»

ដោយឡែកយុវជន ជិន ពិសី បុគ្គលិកក្រុមហ៊ុនឯកជនមួយ តាមបណ្ដោយផ្លូវព្រះមុនីវង្សបង្ហើបថា ៖«មួយឆ្នាំៗលឿនណាស់ ភ្លេចខ្លួនដល់ៗ តែខ្ញុំធ្វើការជិតពីរឆ្នាំហើយ តែដូចអត់ឃើញសល់អីសោះ»។ បុរសខ្ពស់ស្រឡះសុំមិនប្រាប់ពីប្រាក់ខែរូបនេះ តែងចំណាយលុយឆុងៗ ដូចជាជួបជុំមិត្តភ័ក្ដិ និងការហូបចុកជាដើម ដែលស្ទើររាល់ខែលោកត្រូវខ្ចីលុយគេ ដើម្បីសម្រួលជីវភាព។ នៅពេលសួរថា លោកដែលគិតរឿងសន្សំប្រាក់ដែរឬយ៉ាងណា ពិសី ឆ្លើតតបថា ៖«ខ្ញុំចង់សន្សំដែរបង! តែប្រាក់ខែតិចពេក បើកមកគ្រាន់តែសងគេ បង់ថ្លៃបន្ទប់ជួលជិតអស់បាត់ទៅហើយ»។ ទោះបីជាយ៉ាងណាយុវជនដដែលនេះ ថានឹងគិតគូរឡើងវិញ ដើម្បីកាត់បន្ថយការចំណាយ និងធ្វើឱ្យជីវភាពរស់នៅមានភាពល្អប្រសើរ៕

ប្រើរបស់ជជុះបើគេដឹង ជារឿងគួរឲ្យខ្មាសបំផុត មែនទេ?

កន្លែងណាខ្លះពិសេសបំផុតសម្រាប់យុវវ័យក្នុងការអានសៀវភៅ?

អត្ថបទ៖ អ៊ុំ សុភក្តិ