ក្លិប​​យក្ស​អេស្ប៉ាញ Real Madrid បាន​ប្រកាស​ជា​ផ្លូវ​ការ​ថា ពួក​គេ​នឹង​ធ្វើ​ដំណើរ​​ទេសចរណ៍​ ទៅ​ប្រកួត​មិត្តភាព​ ឆ្លងកាត់​៣​ទ្វីប​ផ្សេង​គ្នា​នៅ​រដូវ​ក្ដៅ​នេះ ចាប់​ពី​ថ្ងៃ​ទី​១៨ ខែ​​កក្កដា រហូត​ដល់​ថ្ងៃ​ទី​០៥ ខែ​សីហា​ខាង​មុខ។

ចង់​ដឹង​​មាន​ទ្វីប​ណា​ខ្លះ​ សូម​ទស្សនា​ខាង​ក្រោម៖

១. ទ្វីប​អូស្ត្រាលី – ​ប្រទេស​អូស្ត្រាលី

Real នឹង​ត្រូវ​ប្រកួត​មិត្តភាព​ដំបូង​គេ នៅ​ទីក្រុង​ Melbourne ​ប្រទេស​អូស្ត្រាលី នៃ​​ពាន​រង្វាន់​មិត្តភាព​ International Champions Cup ​ដែល​នឹង​ត្រូវ​ប៉ះ Roma ​នៅ​ថ្ងៃ​ទី​១៨ ខែ​កក្កដា និង​ប៉ះ​ Manchester City នៅ​ថ្ងៃ​ទី​២៤ ខែ​កក្កដា។ ការ​ប្រកួត​ទាំង​២​លើក​​នេះ ​នឹង​ត្រូវ​ធ្វើ​ឡើង​នៅ​ទីលាន Melbourne Cricket Ground ​ដែល​ផ្ទុក​អ្នក​ទស្សនា​បាន​ជាង ១០​ម៉ឺន​នាក់ និង​ជា​កីឡដ្ឋាន​ធំ​បំផុត​មួយ​លើ​លោក។

២. ទ្វីប​អាស៊ី – ​ប្រទេស​ចិន

ស្ដេច​ស នឹង​ធ្វើ​ដំណើរ​ទៅ​​ប្រទេស​ចិន ដើម្បី​លេង​​ពាន​មិត្តភាព International Champions Cup ​មួយ​ទៀត ​ដែល​នឹង​ត្រូវ​ប៉ះ Inter Milan ​នៅ​កីឡដ្ឋាន Tianhe ​នា​ទីក្រុង​ Guangzhou ​នៅ​ថ្ងៃ​ទី​២៧ ខែ​កក្កដា និង​ប៉ះ​ AC Milan ​នៅ​ Shanghai Stadium ​ថ្ងៃ​ទី​​៣០ ខែ​កក្កដា។

៣. ទ្វីប​អឺរ៉ុប – ប្រទេស​អាល្លឺម៉ង់

ក្រុម​ជើង​ឯក​កំពូល​អឺរ៉ុប​១០​សម័យ​កាល​មួយ​នេះ នឹង​ត្រូវ​លេង​​ពាន​មិត្តភាព Audi Cup នៅ​ទីក្រុង​ Munich ប្រទេស​អាល្លឺម៉ង់ ដែល​នឹង​ត្រូវ​ប៉ះ Tottenham ​នៅ​ថ្ងៃ​ទី​០៤ ខែ​សីហា ​នៅ Allianz Arena ​ខណៈ​ដែល​ Bayern ប៉ះ​ AC Milan ក្នុង​ថ្ងៃ​ដូច​គ្នា។ បើ​ក្រុម​របស់​លោក​ Rafael Benítez ឈ្នះ​ នឹង​អាច​ប៉ះ​ក្រុម​ជើង​ឯក​អាល្លឺម៉ង់ ឬ​ក្រុម​អ៊ីតាលី ​វគ្គ​ផ្ដាច់ព្រ័ត្រ នា​ថ្ងៃ​ទី​០៥ ខែ​សីហា​បន្ត​ទៀត៕

ចុះ​ប្រិយមិត្ត​ជឿ​ថា Real អាច​នឹង​លើក​ពាន​មិត្តភាព​ទាំង​៣​ ខាង​លើ​នេះ​បាន ឬ​ទេ?

-ចុចអាន៖ Simeone៖ Real Madrid អាច​​លើក​ពាន​La Liga រដូវ​កាល​ក្រោយ

​​ប្រែ​សម្រួល៖ វិន ជីវ័ន្ត ​ប្រភព៖ realmadrid