“Jurassic World” សាងប្រវត្តិសាស្ត្រថ្មី តែ៣ថ្ងៃរកបាន ៥១១លានដុល្លារ

2015-06-15 17:18:32
ចំនួនមតិ 0 | ចំនួនចែករំលែក 0

ចន្លោះមិនឃើញ

រយៈពេលត្រឹមតែ ៣ថ្ងៃ ខ្សែភាពយន្តនិយាយពីការវាយប្រហារពីក្រុមដាយណូស័រ "Jurassic World” អាចរកចំណូលបាន ៥១១,៨លានដុល្លារ ពីជុំវិញពិភពលោក ដែលជាចំណូលខ្ពស់បំផុត និងជាភាពយន្តទីមួយដែលអាចរកបានលើសពី ៥០០លានដុល្លារ ក្នុងប្រវត្តិសាស្ត្រសម្រាប់ការចេញបញ្ចាំងក្នុងសប្ដាហ៍ទី១។

តួឯកប្រុស Chris Pratt និងអ្នកដឹកនាំរឿង Colin Trevorrow

តាមរបាយការណ៍ពីសារព័ត៌មាន Variety រយៈពេល៣ថ្ងៃនៃចុងសប្ដាហ៍មុន ខ្សែភាពយន្ត "Jurassic World” អាចរកចំណូលបាន ២០៤,៨លានដុល្លារ នៅសហរដ្ឋអាមេរិក និង ៣០៧,២លានដុល្លារ ទៀតពីប្រទេសផ្សេងៗដូចជា ប្រទេសចិន អង់គ្លេស អៀរឡង់ ម៉ិកស៊ីកូ កូរ៉េ បារាំង អូស្ត្រាលី និងអាល្លឺម៉ង់ ជាដើម។

“Jurassic World” គឺជាភាពយន្តដំណើរផ្សងព្រេងបែបវិទ្យាសាស្ត្រ និងជាវគ្គ ៤នៃភាពយន្តជាស៊េរី “Jurassic Park” ដែលបានចេញ៣វគ្គរួចមកហើយចាប់តាំងពីឆ្នាំ១៩៩៣មក។ វគ្គថ្មីនេះរៀបរាប់ពីគ្រាមួយនៅពេលដែលសួនកម្សាន្តដាយណូស័រ “Jurassic World” ត្រូវបានបង្កើតឡើង។ តួឯកប្រុស ឈ្មោះ Owen (សម្ដែងដោយ Chris Pratt តួរឿង “Guardian of the Galaxy”) ជាបុគ្គលិកម្នាក់ក្នុងសួនកម្សាន្តនេះនិងជាម្ចាស់របស់ពួកសត្វ ដាយណូស័រ Velociraptor ៤ក្បាលគឺ Blue, Charlie, Delta និង Echo ។

ដោយសារតែការបង្កាត់ពូជរបស់អ្នកវិទ្យាសាស្ត្រផ្សេងទៀតនៅក្នុង សួនសត្វខាងលើនេះខុសបច្ចេកទេសបន្តិចបន្តួចបានបង្កើតចេញជា ដាយណូស័រប្រភេទថ្មីមួយដែលសាហាវជាទីបំផុតឈ្មោះ Indominus rex ។ សត្វមួយក្បាលនេះបានដើរសម្លាប់គេសម្លាប់ឯង រួមទាំងមនុស្សក្នុងសួនសត្វនោះផងដែរ។

ភាពយន្តនេះដឹកនាំដោយលោក Colin Trevorrow និងចំណាយដើមទុនអស់ ១៥០លានដុល្លារ។

ខាងក្រោមនេះគឺជាចំណាត់ថ្នាក់ខ្សែភាពយន្តទាំង១០លើតារាង Box Office អាមេរិកសប្ដាហ៍នេះ (ចំណូលចុងសប្ដាហ៍គិតចាប់ពីថ្ងៃទី១២-១៤ ខែមិថុនា)៖

ល.រ	ចំណងជើងភាពយន្ត	ចំណូលចុងសប្ដាហ៍	ចំណូលសរុប	សប្ដាហ៍ទី
១	Jurassic World	២០៤,៦លានដុល្លារ	២០៤,៦លានដុល្លារ	១
២	Spy	១៦លានដុល្លារ	៥៦,៩លានដុល្លារ	២
៣	San Andreas	១១លានដុល្លារ	១១៩,៣លានដុល្លារ	៣
៤	Insidious Chapter 3	៧,៣លានដុល្លារ	៣៧,៣លានដុល្លារ	២
៥	Pitch Perfect 2	៦លានដុល្លារ	១៧០,៧លានដុល្លារ	៥
៦	Entourage	៤,៣លានដុល្លារ	២៥,៨លានដុល្លារ	២
៧	Mad Max: Fury Road	៤,១លានដុល្លារ	១៣៨,៦លានដុល្លារ	៥
៨	Avengers: Age of Ultron	៣,៦លានដុល្លារ	៤៤៤,៧លានដុល្លារ	៧
៩	Tomorrowland	៣,៤លានដុល្លារ	៨៣,៦លានដុល្លារ	៤
១០	Love & Mercy	១,៧លានដុល្លារ	៤,៧លានដុល្លារ	២