ទឹកចិត្តសប្បុរសរបស់តារាកូរ៉េ ចំពោះប្រជាជនកម្ពុជា

2015-06-23 13:05:03
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្វីបើសិល្បករកូរ៉េ មិនសូវបង្ហាញវត្តមានលើឆាកតន្ត្រីកម្ពុជាញឹកញាប់ ដូចជានៅប្រទេសជិតខាងផ្សេងៗក្ដី ប៉ុន្តែទឹកចិត្តរបស់ពួកគេតែងមកដល់អ្នកគាំទ្រកម្ពុជា តាមរយៈសកម្មភាពសប្បុរសធម៌ផ្សេងៗជារឿយៗ។ ចង់ដឹងថាតារាកូរ៉េណាខ្លះ ធ្លាប់រួមចំណែកជួយដល់ប្រជាជនកម្ពុជា សូមតាមដានជាមួយ Sabay ខាងក្រោមនេះ៖

១. តារាសម្ដែង Song Jae Rim

តារាសម្ដែងក្នុងរឿង "Surplus Princess” Song Jae Rim ជាឯកអគ្គរដ្ឋទូតសុឆន្ទៈរបស់អង្គការ Plan Korea បានមកធ្វើការងារស្ម័គ្រចិត្តនៅស្រុកស្រីស្នំ ខេត្តសៀមរាប កាលពីថ្ងៃទី២៦ ដល់ថ្ងៃទី៣០ ខែវិច្ឆិកា ដើម្បីជួបផ្ទាល់ជាមួយកុមារដែលគេបានឧបត្ថម្ភ និងបាននាំយកសម្ភារៈសិក្សាទៅចែកជូនសិស្សានុសិស្សនៅទីនោះ។ ក្រៅពីនេះ Song Jae Rim និងអង្គការ Plan Korea ក៏បានឧបត្ថម្ភអណ្ដូងទឹកដល់អ្នកភូមិនៅទីនោះដែរ។

២. កីឡាការិនី Sin Soo Ji

អតីតអត្តពលិកកូរ៉េខាងត្បូងផ្នែក Rhythmic Gymnast កញ្ញា Sin Soo Ji ជាឯកអគ្គរដ្ឋទូតសុឆន្ទៈរបស់អង្គការ Plan Korea បានមកកម្ពុជាកាលពីពាក់កណ្ដាលខែវិច្ឆិកា ដើម្បីជួបផ្ទាល់ជាមួយកុមារដែលនាងបានឧបត្ថម្ភកន្លងមក និងបានធ្វើទស្សនកិច្ចសិក្សានៅសាលារបស់ពួកគេ។ Sin Soo Ji បានបង្ហាត់ក្មេងៗអំពីវិធីហាត់ប្រាណដើម្បីសុខភាព និងបានចែកអំណោយខ្លះៗដល់ពួកគេ។

៣. តារាសម្ដែង Gong Yoo

ក្នុងនាមជាតំណាងគណៈកម្មការអង្គការមូលនិធិសហប្រជាជាតិដើម្បីកុមារ UNICEF តារាសម្ដែង Gong Yoo បានធ្វើដំណើរមកប្រទេសកម្ពុជារយៈពេលមួយសប្ដាហ៍ ចាប់ផ្ដើមពីថ្ងៃទី៨ ខែតុលា ដើម្បីសិក្សាស្វែងយល់ពីជីវភាពរស់នៅ និងបញ្ហាសិទ្ធិកុមារនៅកម្ពុជា។ តួឯកប្រុសក្នុងរឿង "Coffee Prince” រូបនេះ បានទៅដល់ខេត្តស្វាយរៀង និងតំបន់អនាធិបតេយ្យមួយចំនួន។ ចាប់ពីថ្ងៃទី១២ ដល់ថ្ងៃទី២៨ ខែធ្នូ អង្គការ UNICEF បានរៀបចំពិធីពិព័រណ៍រូបថតមួយនៅប្រទេសកូរ៉េបង្ហាញពីសកម្មភាពរបស់ Gong Yoo នៅប្រទេសកម្ពុជា ដើម្បីផ្សព្វផ្សាយពីបញ្ហាសិទ្ធិកុមារ និងស្វែងរកមូលនិធិសម្រាប់ទ្រទ្រង់សិទ្ធិកុមារនៅប្រទេសកម្ពុជា។

http://youtu.be/TU2jX1cyUXk

៤. ក្រុមចម្រៀង BTOB

កាលពីខែឧសភា ឆ្នាំ២០១៣ ក្រុមចម្រៀង BTOB ដែលមានសមាជិក ៧នាក់ បានមកប្រទេសកម្ពុជាចំនួន ៣ថ្ងៃ ដើម្បីប្រគំតន្ត្រី និងជួបផ្ទាល់នឹងអ្នកគាំទ្រ។ ក្រោយការប្រគំតន្ត្រី ពួកគេបានទៅសួរសុខទុក្ខ និងយកអំណោយខ្លះៗចែកជូនកុមារៗ នៅមណ្ឌលកុមារកំព្រា Light House។

៥. ក្រុមចម្រៀង Girls' Generation

កាលពីខែកញ្ញា ឆ្នាំ២០១១ ក្រុមចម្រៀង Girls' Generation បានជួយជីវិតក្មេងស្រីកម្ពុជាម្នាក់ឈ្មោះ ស្រីរី តាមរយៈការឧបត្ថម្ភថ្លៃវះកាត់បេះដូងរបស់នាង។ ស្រីរី មានជំងឺបេះដូងប្រហោងយូរមកហើយ ប៉ុន្តែនាងមិនអាចវះកាត់បានដោយសារជីវភាពគ្រួសារខ្វះខាត។ ក្រោយវះកាត់ ស្រីរី បានសម្រាកនៅប្រទេសកូរ៉េ ចំនួន៣សប្ដាហ៍ ទើបត្រលប់មកប្រទេសកម្ពុជាវិញ។ ទស្សនារឿងរ៉ាវរបស់ ស្រីរី ដែលចាក់ផ្សាយក្នុងកម្មវិធី "Love Request” របស់ស្ថានីយទូរទស្សន៍ KBS៖

៦. ក្រុមចម្រៀង SHINee

កាលពីខែកុម្ភៈ ឆ្នាំ២០០៨ ក្រុមចម្រៀង SHINee បានមកប្រទេសកម្ពុជា ចំនួន ៦ថ្ងៃ ដើម្បីប្រគំតន្ត្រី និងថតកម្មវិធីផ្សេងៗ។ មុនចាកចេញពីប្រទេសកម្ពុជាពួកគេបានបរិច្ចាគប្រាក់ចំនួន ១ម៉ឺនដុល្លារ សម្រាប់អង្គការមូលនិធិកុមារកម្ពុជា CCF។

ក្រៅពីទឹកចិត្តផ្ទាល់របស់តារាកូរ៉េ អ្នកគាំទ្ររបស់ពួកគេមួយចំនួនក៏បានសហការរៃអង្គាសប្រាក់ដើម្បីបរិច្ចាគមកកាន់ប្រជាជនកម្ពុជាដែរ ដូចជា៖

កាលពីខែមេសា ឆ្នាំ២០១៥ អ្នកគាំទ្រក្រុម Block-B បានឧបត្ថម្ភអណ្ដូងស្នប់ដល់ប្រជាជនក្នុងខេត្តសៀមរាប ដើម្បីអបអរខួប៤ឆ្នាំដែល Block-B បានចេញបទចម្រៀង។

កាលពីខែកក្កដា ឆ្នាំ២០១៤ អ្នកគាំទ្រតារាចម្រៀង Jung Yong Hwa សមាជិកក្រុម CNBLUE បានបរិច្ចាគអង្ករចំនួន៥តោន រួមជាមួយចំណីអាហារមួយចំនួន ដល់កុមារៗក្រីក្រកម្ពុជា ក្នុងអង្គការ Holt ដើម្បីសុខុមាលភាពកុមារ។